Лъапсэм къыфэтэгъэзэжьы
Шъолъырхэм яфестивалэу «Лъапсэм къыфэзыгъэзэжьырэм зеужьыжьы» зыфиIорэр шэкIогъум и 12-м Адыгэ Республикэм и Камернэ музыкальнэ театрэу А. Хьанэхъум ыцIэ зыхьырэр зычIэт унэм щыкIощт.
1997-рэ илъэсым къыщыублагъэу фестивалыр республикэм щызэхащэ. 2007-рэ илъэсым шъолъырхэм яфестиваль хъугъэ Iофтхьабзэм хэпшIыкIэу зеушъомбгъу.
Лъэпкъхэм язэпхыныгъэхэр гъэпытэгъэнхэмкIэ, патриотическэ пIуныгъэр лъэхъаным диштэу гъэпсыгъэнымкIэ фестивалым имэхьанэ зыкъеIэты. Къэралыгъо екIолIакIэу фашIыгъэм ишIуагъэкIэ культурэм иIофышIэхэр, унагъохэр, еджакIохэр чанэу хэлажьэх. Къашъохэм, орэдхэм, фольклорым ехьылIагъэхэм, гущыIэ щэрыохэм, лъэпкъ IэпэIасэхэм зэхахьэр къагъэдэхэщт.
ЕмтIылъ Нурбый.