Редакцием къатхырэ письмэхэр
Хэукъоныгъэп
Тигъэзет икъыдэкIыгъоу чъэпыогъум и 26-м, номерэу 195-рэ зытетым ит къэбарэу «Рыу, сибэщыр!» къагъэлъагъо» зыфиIорэм фэгъэхьыгъэу тиредакцие тхыгъэ къыIукIагъ. Къуекъо Налбый ипьесэ техыгъэ спектаклэу Камернэ музыкальнэ театрэм ыгъэуцугъэм журналистэу ЕмтIылъ Нурбый къытегущыIагъ.
Редакцием къатхыгъэм мырэущтэу къыщеIо: «…Сянэжъ ышэу Пэрэныкъо Муратэ ытхыгъэр Къуекъом ытхыгъэу аIуи къатхыгъ…ар хэукъоныгъэшхо хъугъэ».
Письмэм джэуап тигъэзет щеттыжьы тшIоигъу – Къуекъо Налбый кIэлэцIыкIухэм апае тхэщтыгъэ, нысхъэпэ театрэхэм мэхьанэшхо аритыщтыгъэ. Ащ ытхыгъэхэм ащыщ пьесэу «Рыу, сибэщ!» зыфиIорэри. Ары, Пэрэныкъо Мурат ытхыгъ ащ фэдэ пшысэ, ау Къуекъо Налбый ащ фэдэ пьесэ иI — жэрыIо народнэ творчествэм ар техыгъэу щыт, арышъ, тхакIо пэпчъ итхыгъэкIэ ар къызфигъэфедэн ылъэкIыщт. Арэу зыхъукIэ, гъэзетым хэукъоныгъэ хэхъухьагъэп, хъугъэ-шIагъэу щыIагъэр къыщыттхыжьыгъ ныIэп.