УсакIоу ЯхъулIэ Сэфэр къызыхъугъэр илъэси 105-рэ хъугъэ
«Дышъэу сихэкур, сыдэу удаха!»
Ыгу къигушIукIэу, усэ сатырхэр пщынэ макъэу бзэрабзэхэу, изэхашIэхэр хыор уалъэу бгъэм дэлъыр къизыIотыкIын зылъэкIыщтыр цIыф хьалэл гу къабзэу, хьарамыгъэнчъэ зэчыйкIэ Тхьэр къызэтагъэу, Родинэр, хэку гупсэр, цIыфхэр гъунэнчъэу зикIасэр ары. Джащ фэдагъ титхэкIо нахьыжъхэм ащыщэу ЯхъулIэ Сэфэр.
ИкIыгъэ лIэшIэгъум ия 30-рэ илъэсхэм акIэм адыгэ литературэм къыхэхьагъ, хьалэлэу Iоф щишIагъ, ар ыгъэбаигъ. Иусэхэр гукъэбзагъэр, шъэбагъэр къахэщэу тхыгъэх, жъыу мэкъэмэ зэдиштэр ахэм зэфэдэкIэ ащэIорышIэ. Илъэс 40 Iэпэ-цыпэм литературэм хэтыгъ, итворчествэ зэфэдэкIэ хэгъэгу шIулъэгъур, зэкъошныгъэ-ныбджэгъуныгъэр, шъыпкъагъэр, ежь фэдэ цIыфыбэм, анахьэу, лэжьэкIо Iэпшъэ цIыф мыпшъыжьхэм афыриIэ лъытэныгъэр, къешIэкIыгъэ дунаим идэхэгъэ-кIэрэкIагъэ ыкIи щыIэкIакIэм — Совет хабзэм хэлъ чэф-зэфагъэр, тхъагъор къыщыриIотыкIыгъ; мамыр щыIэкIакIэм къыритыгъэ амалым ишIуагъэкIэ, гу шъхьафитым ыбзэ къытIэтагъ — усэ-орэдхэр бэу ытхыгъэх. Охътэ хъугъэ-шIагъэхэр — Совет хабзэр зэрагъэуцугъэр, Хэгъэгу зэошхор ыкIи советскэ цIыфхэм япсэемыблэжьныгъ; зэоуж илъэсхэм зэтырагъэуцожьыгъэ щыIакIэм цIыф жъугъэхэм якIочIэпсэу хэхьагъэр; жъи кIи зэдырагъаштэу, советскэ щыIэкIакIэм яIахь зэрахишIыхьагъэр; Урысыем ыкIи ащ хахьэхэрэ шъолъырхэм ащыпсэухэрэ цIыф лъэпкъхэм азыфагу зэкъошныгъэр зэрэщыпытэрэр гум хапкIэу усэкIэ къыриIотыкIыгъ.
С. ЯхъулIэм ытхыхэрэр 1937-рэ илъэсым къыщегъэжьагъэу къыхиутыщтыгъэх. АдыгабзэкIи урысыбзэкIи тхэщтыгъэ, поэтическэ тхылъ 11 фэдиз къыдигъэкIыгъ. Ахэм гуихыгъэгъэ-къэбзагъэр, къешIэкIыгъэ цIыфхэм усакIом афыриIэ шъхьэкIэфэныгъэр ыкIи Родинэм паемэ зэрэзышъхьамысыжьыщтыгъэр, ар гущыIэ къодыеу армырэу, икъэхъукIэ, ищыIэкIагъэр, исабигъо-кIэлэгъу зыфэдагъэр къыIуатэзэ, Хэгъэгум шIоу къыфишIэгъэ пстэур зэхишIэу, фэразэу, цIыфы зэрэхъугъэр мэкъэ IэтыгъэкIэ иусэ зэфэшъхьафхэм къащиIуагъ.
ЯхъулIэ Сэфэр шэкIогъум и 7-м, 1914-рэ илъэсым Теуцожь районым ит къуаджэу Пэнэжьыкъуае къыщыхъугъ. А уахътэр шIункI-жъалымыгъ, байхэм тетыгъор заIыгъыгъ, тхьамыкIэхэм — мэкъумэщышIэ лэжьакIохэм бжьыр апшъэ дэлъыгъ. А зэкIэми апкъ къикIэу мафэ къэс зэпыщыт классхэм азыфагу зэутэкIыныгъэхэр къитаджэхэ хъугъагъэ; «тызэфэдэм» кIэдэухэу, гупсэфыгъо яIэжьыгъэп. Мы уахътэм ыцыпэ ежь Сэфэри къыхиубытагъ, ылъэгъугъ, байхэм ятесыегъагъэ, яжъалымыгъэ ныбжьырэу ыгу къинагъэх. Октябрэ революциешхом ихьатыркIэ шъхьафит щыIакIэм игъогу фаузэнкIыгъ; Совет хабзэр агъэпсыгъ, народыр шъхьафит ащ ышIыжьыгъ, щыIэкIэ-псэукIэ амали иIэ хъугъэ. Ынэ пэкIэкIыгъэр, гукIэ зэхишIэгъэ пстэур ибэу къызэнэм ЯхъулIэм усэкIэ къыIуагъ:
Сыегъэзыгъэу, сытхьамыкIэу СикIэлэгъур сэ исхыгъ. Тятэ мылъкоу къыкIэныгъэм Тихьагъожъи емнэцIыгъ. Зэхэпцагъэу пыт ебагъэм Бжыхьэ жьыбгъэр щыхъушIагъ, КIэлэ ибэу сыкъэнагъэшъ, — Сыдэ гущэ сиамал… («Насып»).
Ау революцием итыгъэ къафыкъокIи, цIыф жъугъэхэм аригъэIотэжьыгъ, ЯхъулIэ Сэфэри ахэм ахэтыгъ. Ежь инасыпи къызэрэфэсыгъэр къеIо усэкIэ. ЯхъулIэ Сэфэр еджагъ, гъэсэныгъи, сэнэхьати, шIэныгъи ыгъотыгъ. Мэкъумэщ техникумыр къыухи, агрономэу Iоф ышIагъ. ЕтIанэ комсомолым ихэку комитет иинструкторыгъ. Марксизм-ленинизмэмкIэ зэдзэкIэкIо-редакторхэм я Гупчэ курсхэу КПСС-м и ЦК щыIэхэм ащеджагъ. Народнэ судьяу Мыекъуапэ Iоф щишIагъ, уголовнэ IофхэмкIэ хэку судым итхьамэтагъ. Юридическэ академиер къыухыгъагъ. Заом игъом дзэ гарнизоным итрибунал итхьамэтагъ, партием хэтыгъ. ЧIыпIэ зэфэшъхьафхэм прокурорэу Iоф ащишIагъ, ащ ыужым Адыгэ тхылъ тедзапIэм общественнэ-политическэ литературэмкIэ иредакторыгъ.
Илъэс 12 Адыгэ хэкум ирадио- комитет иредакторыгъ, 1963-рэ илъэсым къыщегъэжьагъэу СССР-м итхакIохэм я Союз хэтыгъ. Иусэ тхылъхэм зэфэдэкIэ хэгъэгум, иадыгэ лъэпкъ, Адыгеим идэхэгъэ-нэфынагъэ, цIыфхэм язэфэгъэ-хъупхъагъэ къызыщыриIотыкIыгъэ усэхэр къадэхьагъэх. Ау поэтымкIэ анахь мэхьанэ зиIагъэр Родинэр ары. Нэу узыпIугъэмрэ Хэгъэгумрэ зэфигъадэу, шъхьафит-гуфитэу игупшысэ егъэпсы:
Ным нахь лъапIэ Насып бгъотына, Родинэм фэдэ Ны тэ къипхына. («Родинэр»).
Шъхьафит-гуфитэу жьы къыщэжьыгъэу, къыдэхъугъэ пстэумкIэ разэу къеIо:
Насыпыгъэр! О фэсапщи, ХьакIэ мафэу укъысфакIу, УмыкIожьэу гъэшIэныгъэм Сэ сигъашIэ къыбдэбакъу!
Мамырныгъэ огум, щыIэкIэ рэхьатым, зэгурыIоныгъэм, зэрэцIыфэу зэрагъэлъапIэрэм гухахъо хегъуатэ, ежь зэрэфэамалэу усэм зырегъэIэты:
ЩыIэныгъэм ипшыс, сидунай иорэд — Сыгу къэпIэтэу, сигъашIэ бгъэраз. СызыпIугъэу, сихэку, сянэ лъапIэм уфэд, Адыгееу сигупсэу, сикIас. («Адыгееу сикIас»).
ЕплъэкIырэп, езэщырэп Адыгэ хэкум идахэ ыIоным, зэлъаригъэшIэным:
Уихьэсэ шIагъэхэр сыдэу гухахъуа! Щытхъоу о уиIэм щысэ тырахы. СичIыгу гупсэр сыпсэм ихахъуа, Дышъэу сихэкур, сыдэу удаха! («Сыдэу удаха»).
Хэгъэгу зэошхом ТекIоныгъэр къыщыдэзыхыгъэхэу, Советскэ Союзым и ЛIыхъужъыцIэр къызфагъэшъошагъэу Къош Алый, Бэгъужъэкъо Лелэ афитхыгъэ усэхэм мамырныгъэм илъэпIагъэ, лIыгъэу адыгэ лъэпкъым заом щызэрихьагъэм илъэгагъэ, ауасэ ащыкIигъэтхъыгъ.
ЯхъулIэ Сэфэр къыгъэшIагъэр бэп, илъэс 63-рэ ныIэп, ащ щыщэу илъэс 30-м ехъур творчествэм фигъэшъошагъ. ЯхъулIэ Сэфэр ыгуи, ыпси етыгъэу итхылъ пэпчъ пейзаж лирикэм чIыпIэ щыфишIыгъ: тикъушъхьэхэм, типсыхъохэм, тимэзхэм, тикъэлэ шъхьаIэу Мыекъуапэ ядэхагъэ ренэу ынэгу кIэтыгъэх, иусэ сатырхэм емызэщыжьэу ахэр ащигъэшIуагъэх.
Ахэми язакъоп, Сэфэр поэмэ дэгъухэри ытхыгъэх («Комиссар», «Хъусен») зэошхом итемэ апхырыщыгъэу; «Айтэч изымаф» — нахьыжъ Iушхэр щыIэкIакIэм зэрэхэуцохэрэр ыкIи яIушыгъэ- губзыгъагъэкIэ ащ хахъо зэрэфашIырэм ехьылIагъ мы аужырэр; поэмэхэу «ПсыорыпI», «Поэтым иорэд жъынч» зыфиIохэрэм гъэшIэ гумэкIыгъо Iофыгъохэу лъэпкъым пэкIэкIыгъэхэр къащиIотыкIыгъэх. УсакIоу ЯхъулIэ Сэфэр иусэ пычыгъо жъынч макъэр хэIукIэу, орэдым фэдагъ, арэу къычIэкIын ащ иусэхэм ащыщыбэр тикомпозиторхэм орэдышъом зыкIыралъхьагъэхэр. ШIулъэгъоу мы дунэешхор щызыгъаIэу, лъызыгъэкIуатэрэм ехьылIэгъэ усабэ ытхыгъ Сэфэр, ахэм ащыщых: «Тыдэ ущыIах», «Саидэ», «Гупшыс», нэмыкIхэри.
Сигупшысэ IэшIу, синэшIуцIэ дах, Нэфылъы орэд, тыдэ ущыIах?.. УишIулъэгъу ишъэф зыми емыIуат, СинэшIуцIэ дах, зыми емыIуат. («Тыдэ ущыIах?»).
Щэч хэлъэп адыгэ литературэм хэзыгъэхъуагъэу, лъэпкъ поэзиер лъэоенакIэ тезыгъэуцуагъэу ЯхъулIэ Сэфэр зэрэщытым, итхылъхэмкIэ, итворчествэкIэ лъэпкъ гупшысэр, адыгэ поэзиер зэригъэбаигъэм, игущыIэ шъэбэ-къабзэкIэ цIыфхэр зыфищэнхэр зэрэфызэшIокIыгъэм.
Мамырыкъо Нуриет.