Лъэпкъхэм яорэдыIу
Хэгъэгум иорэдыIо цIэрыIоу, Адыгэ Республикэм инароднэ артистэу, Урысыем икомпозиторхэм я Союз хэтэу Андзэрэкъо Чеслав непэ имэфэкI — къызыхъугъэр илъэс 80 мэхъу.
— Андзэрэкъо Чеслав патриот шъыпкъ. Ихэгъэгу, илъэпкъ шIу афишIэ шIоигъоу псэугъэ. Искусствэр сэ лъэшэу сыгу рехьы. Тикомпозиторхэм аусыгъэ орэдхэм сядэIу зыхъукIэ, гукIэ сакъыдэшъо. Андзэрэкъо Чеслав лъэпкъхэм яорэдыIу, ымакъэ псынкIэу къэсэшIэжьы, сегъэгушхо, — къытиIуагъ Адыгэ Республикэм иапэрэ Президентэу Джарымэ Аслъан.
ШэкIогъум и 7-м Джарымэ Аслъани, Андзэрэкъо Чеслави Кощхьэблэ районым къыщыхъугъэх, цIыф цIэрыIо хъугъэх.
Чеслав янэжъэу Гулэ пщынэо IэпэIасэу зэрэщытым ишIуагъэкIэ яунэ цIыфыбэ къихьэщтыгъ. Чеслав зэхихырэр, ылъэгъурэр гум къинэжьыщтыгъ. Сэнэхьатэу къыхихыщтымкIэ упчIабэ иIагъэп. Музыкальнэ училищыр Налщык, къэралыгъо консерваториер Ленинград къащиухыгъэх. Адыгэ къэралыгъо ансамблэхэм, филармонием, Адыгэ къэралыгъо университетым, нэмыкIхэм илъэсыбэрэ Iоф ащишIагъ.
МэщбэшIэ Исхьакъ, КъумпIыл Къадырбэч, фэшъхьафхэм яусэхэм атехыгъэ орэдхэр ыусыгъэх. Кавказ заом, лъэпкъ шIэжьым яхьылIэгъэ произведениехэр икъэлэмыпэ къычIэкIыгъэх.
— Мэкъэ Iэтыгъэ дахэ зиIэ орэдыIоу Урысыем щыпсэухэрэм Адзэрэкъо Чеслав къахэсэгъэщы, — къытиIогъагъ зэлъашIэрэ орэдыIоу, СССР-м, Адыгеим янароднэ артистэу Иосиф Кобзон. — Тызэгъусэу концертхэр хэгъэгум къыщыттыхэу бэрэ къыхэкIыгъ.
— Андзэрэкъо Чеслав Ленинград зыщеджэм ыуж Адыгеим къымыгъэзэжьэу хэгъэгум ишъолъырхэм орэд къащиIощтыгъэмэ, искусствэм нахь щыцIэрыIо хъущтыгъэ, — къеIуатэ Урысыем, Абхъазым язаслуженнэ артисткэу, Адыгеим инароднэ артисткэу Нэхэе Тэмарэ. — Илъэпкъ, Адыгэ Республикэр зэригъэлъапIэхэрэм яхьылIэгъэ орэдэу ыусыгъэхэр гъашIэм къыщаIох.
Республикэ къэралыгъо филармонием иоркестрэу «Русская удалым» Ч. Андзэрэкъор хэтэу Москва, Мыекъуапэ, нэмыкIхэм орэдыбэ ащигъэжъынчыгъ.
— Адыгэ музыкальнэ Iэмэ-псымэхэр зыхэт оркестрэ тиреспубликэ щызэхащэмэ сигуапэу сыхэхьащт, орэд къыщысIощт, — игупшысэхэм Ч. Андзэрэкъом тащигъэгъуазэщтыгъ. — Искусствэр сэ сищыIэныгъ...
Андзэрэкъо Чеслав ыкъоу Долэт Санкт-Петербург щэпсэу, композитор, ятэ игъогу рэкIо. Чеслав ыпхъоу Марзет республикэм искусствэхэмкIэ икIэлэцIыкIу еджапIэу Лъэцэрыкъо Кимэ ыцIэ зыхьырэм ипащ, ишъхьэгъусэу Светланэ кIэлэегъэджэ колледжэу Андырхъое Хъусенэ ыцIэ зыхьырэм илъэсыбэрэ адыгабзэмкIэ щыригъэджагъэх, игущыIэхэм атехыгъэ орэдхэр композиторхэм аусыгъэх.
Адыгэ Республикэм икъэралыгъо гъэпсыкIэ игъэпытэн Ч. Андзэрэкъор гукIи, псэкIи хэлэжьагъ. Ащ ыусыгъэ орэдхэу «Си Адыгей», «Адыгэ шъуаш», «Адыгэ быракъ» зыфиIохэрэр ансамблэу «Ислъамыем», оркестрэу «Русская удалым», журналистэу Беданыкъо Замирэ, артисткэ цIэрыIоу Кушъэкъо Симэ, нэмыкIхэм концерт хэхыгъэхэм къащаIох. Чеслав Тыркуем, Болгарием, фэшъхьаф хэгъэгухэм ащыIагъ, иорэдхэмкIэ цIыфыбэ ыгъэгушIуагъ. Опсэу, Чеслав! Илъэс 80 узэрэхъурэм фэшI тыпфэхъохъу, тигъэзетеджэмэ ацIэкIэ шIоу щыIэр къыбдэхъунэу, нарт бэгъашIэ ухъунэу пфэтэIо.
Адыгэ шъуаш
Орэдышъор: Андзэрэкъо Чеслав ГущыIэхэр: ЕмтIылъ Нурбый
Адыгэ шъуашэр тарихъ намысэу, Кавказ илъэпкъхэм аштагъ. ПчыкIэм уфэдэу пчэгум укъехьэ, Къашъоми зеогъэIэт.
Жъыу:
Ей, ей, адыгэ шъуаш, Дунаем ущызэлъашI. Ей, ей, адыгэ къашъу, Налмэс-налкъутэу тикъашъу.
Бгъэгу ищыгъэм шыр егъэуджы, ЛIыгъэм ишапхъэу хьазыр. Пшъэшъэ нэгушIом гохьэу зегъазэ, Исэе дахи кIэракI.
Жъыу:
Пщынаом пщынэр егъэбзэрабзэ, КIэлакIэр къашъом хелъас. Уишъхьэрыхъон бзыу тамэу мэбыбы, Джэгуми лъагэу зеIэт.
Жъыу:
Нэнэжъ-тэтэжъмэ тфагъэпытагъэу, Тихабзэ тыгу имыкI. НыбжьыкIэу тиIэр тэ тфэбэгъонэу, Нарт лIыхъужъ хъунхэу тыфай.
Жъыу:
ЕмтIылъ Нурбый.