Хабзэ хъугъэу щызэIокIэх
Лъэпкъ зыкIыныгъэм и Мафэ къыдыхэлъытагъэу АР-м и Лъэпкъ тхылъеджапIэ культурнэ-гъэсэныгъэ Iофтхьабзэу «Ночь искусств-2019» зыфиIорэр щыкIуагъ. Искусствэм пстэури зэрэзэрипхырэм ар ишыхьатыгъ.
Лъэпкъ тхылъеджапIэм иIофышIэу Кучмэз Аминэт тызэрэщигъэгъозагъэмкIэ, мыщ фэдэ Iофтхьабзэхэр илъэс къэс зэхащэх. Непэрэм пшъэрылъ шъхьаIэу иIэр мэфэкIым ихэгъэунэфыкIын тарихъэу пылъыр зыдэт тхылъхэм цIыфхэр нэIуасэ афэшIыгъэнхэр, Адыгеим щыпсэурэ лъэпкъхэм якультурэ къизыIотыкIыхэрэр Iофтхьабзэм къекIуалIэхэрэм арагъэлъэгъуныр ары.
Iофтхьабзэр зыщыкIогъэ уахътэм къыкIоцI тхылъеджапIэм площадкищымэ Iоф щашIагъ. Музыкальнэ-поэтическэ площадкэм артист цIэрыIохэм, творческэ купхэм орэд къыщаIуагъ, бзэ зэфэшъхьафхэмкIэ усэхэм къяджагъэх.
«Творческая мастерская» зыфиIорэм къэралыгъом щыпсэурэ лъэпкъхэм афэгъэхьыгъэ тхыгъэу тхылъеджапIэм ифонд чIэлъхэр къыщагъэтIылъыгъэх. Ахэм пстэуми нэIуасэ зафашIын амал яIагъ. Ижъырэ тхыгъэхэм къащегъэжьагъэу непэрэ мафэм къыдагъэкIыгъэхэм анэсэу площадкэм щызэгъэфэгъагъэх. Джащ фэдэу сурэтышI цIэрыIоу Евгений Козловым итворчествэ шIоигъоныгъэ зиIэхэм зыщагъэгъозэн алъэкIыгъ. Сэнаущыгъэ ин зыхэлъ Евгений Козловыр тхылъеджапIэм къеблэгъагъэхэм гущыIэгъу афэхъугъ, сурэтшIыныр зышIогъэшIэгъонхэм мастер-класс къаригъэлъэгъугъ. Мы площадкэр хэдыкIыным, хъэным, нэмыкIхэми защыуушэтын плъэкIыным фытегъэпсыхьэгъагъэх.
Бзылъфыгъэхэм ашIогъэшIэгъон хъущт лъэныкъори зэхэщакIохэм Iофтхьабзэм къыщыдыхалъытагъ. «Искусство быть красивой» зыфиIорэ площадкэм визажистым зызэрэбгъэлэщтым «шъэфэу» иIэхэр къыщиIотагъэх, фаехэм ащ зыщагъэдэхагъ.
АР-м и Лъэпкъ тхылъеджапIэ Iофтхьэбзэ гъэшIэгъоным еплъын, хэлэжьэн зышIоигъоу къеблэгъагъэр макIэп. Шъхьадж ежь пэблэгъэ лъэныкъом екIуалIэщтыгъ, ишIэныгъэхэм зэрахигъэхъощтым пылъыгъ.
Гъонэжьыкъо Сэтэнай. Сурэтыр Артур Лаутеншлегер тырихыгъ.