Оперэм Урысыем щеплъых
Республикэм и Къэралыгъо филармоние иIофтхьабзэ Адыгеим и Къэралыгъо орэдыIо-къэшъокIо ансамблэу «Ислъамыер» хэлажьэзэ, концерт гъэпсыкIэм тетэу зэIукIэгъухэр Урысыем ишъолъырхэм щызэхащэх.
Ростов-на-Дону, Элиста, Астрахань, Москва, нэмыкI къалэхэм композиторэу Нэхэе Аслъан ыусыгъэ апэрэ адыгэ оперэу «Бзыикъо заор» къащагъэлъэгъуагъ. МэщбэшIэ Исхьакъ ироманэу «Бзыикъо заом» техыгъэ оперэр гъэшIэгъонэу Урысыем щэкIо.
Татарстан икъалэу Казань концертым щеплъыгъэх. Искусствэм пыщагъэхэм пчыхьэзэхахьэр лъэшэу ашIогъэшIэгъоныгъ.
Къэралыгъо грантыр къызыфагъэшъошэгъэ республикэ филармонием ипащэу Къулэ Мыхьамэт къытиIуагъ концертхэр Геленджик, Щэрджэскъалэ, Налщык, фэшъхьаф къалэхэм зэращыкIощтхэр.
Сахьидэкъо Нурбый.