Тыгъэнэбзый
Дышъэ пкIашъ – бэрэчэт
Ти Адыгей ичIыопс зы охътэ дэй иIэп: игъатхи кIэракI, икIымафи нэхъой, игъэмафи къаигъэп, ибжыхьэшъ – дышъэ пкIашъ – бэрэчэт. Арэу къычIэкIын зэчыйкIэ Тхьэр къызэтагъэхэр – тхакIохэр, усакIохэр, орэдусхэр, гупшысакIохэр, сурэтышIхэр, журналистхэр, нэмыкIхэр – ятворчествэкIэ узылъащэу тиреспубликэ бэу зыкIиIэхэр. КъытэшIэкIыгъэ дунэе дахэр, къыдготхэ цIыфхэр арыба гур зыгъэшIухэу, хэти тызгъэчанэу тызгъэлъэшырэр!
Ары. Рэхьатэу, зыпкъ итэу, чIыгъушъэ-тыгъэпсэу, жьыри шъэбэ-фабэу макIо бжыхьэр. Тыгъуасэм фэд Iоныгъо мазэу илъэсыкIэ еджэгъур къэсыным цIыкIуи ини ашIуабэ шIэу зежэщтыгъэхэр.
Ари къэсыгъ, илъэси 7 хъугъэ кIэлэцIыкIухэр тиреспубликэ ит ублэпIэ еджапIэхэм япчъэшъхьаIу гушIохэу, гугъэхэу, ны-тыхэри къалъыплъэхэу, гумэкIхэу, зэпырыкIыгъэх; джы ахэр, мэзитIум, еджэным хэгъозагъэх: загъэхъупхъэу сэламыр аIуп; лъытакIи ашIэ, еджакIэми зыфагъасэ; анахь шIагъор – еджэныр зэщыгъоп, гъэшIэгъоныбэу зэхэлъ; яапэрэ кIэлэегъаджэшъ, пстэуми афэхъупхъ, афэзаф.
ЯтIонэрэ бжыхьэ мазэу чъэпыогъур, дышъэ пкIашъ, гъэбэжъу закIэу, бэрэчэт. Чэми, мэли, чэт-тхьачэти щагу Iупэхэм аIуолъагъох. Пхъэшъхьэ-мышъхьэхэу – мыIэрысэ нэкIушъхьаплъхэр, къужъIэрысэхэр чъыг шъхьэпэ лъагэхэм гъэдэхалъэу къапынагъэхэм фэдэхэу, апысых. Дэшхо-дэжъыехэри къызэлъыхъугъэхэу, чъыг чIэгъхэм ачIэтэкъуагъ, хэти зэрэфэамалэу зэкIашыпыхьэх.
ХэтэпэкIэ пырэжъыеми пизыбз, ащ чъэп дэгъоу зеокIэ, уешхэкIырэп, етIани, Iэзэгъушхо. Адыгэ къэбыр анахь гъомылэ IэшIоу тихатэхэм къадакIэхэрэм ащыщ, игъо шъыпкъ, зэралъэкIэу Iуахыжьы. Сыдми, бжыхьэм тиконхэр сыдигъуи гъомылэ зэфэшъхьафкIэ къеушъэх. ТичIыгу хъарзын, типсыхэри къабзэх, тиуашъуи къаргъо. Мамырныгъэ-рэхьатым пеIэн щыIа?! Къэсыгъ ящэнэрэ бжыхьэ мазэу шэкIогъур, ари ыпэрэхэм афэдэу, гупсэф-гушIубзыунэу Тхьэм телъэIу, къеблагъ, шэкIогъур!
Ным и Маф
ШэкIогъум иаужырэ тхьаумафэ Урысыем ным и Мафэ щыхагъэунэфыкIы. Ны! Мы гущыIэм ифэбагъэ, илъэшыгъэ зэхэпх къодыеми къыпфырегъашIэ. «Ныр – нэ» еIо гущыIэжъым, псэр къыуитыгъ, нэфым, дунэешхом укъытыригъэхъуагъ. Ны пстэуми мэфэкIымкIэ тафэгушIо, псауныгъэрэ гъэшIэ насып кIыхьэрэкIэ тафэлъаIо. «Ны»цIэр зилъапIэу, зыIэтэу, къэзыгъэшъыпкъэжьхэу зезыхьэхэрэм шъхьащэ зыфыуагъэшIы. ПIуныгъэ тэрэз зыгъотыгъэ цIыф пэпчъи – жъи, кIи, «ны» пIо къодыемэ, агу бэ щыхъэу зэхашIэрэр; ным емыпхыгъэ гъашIэ гори зэрэщымыIэр хэткIи нафэ. Ным ифабэу, игукIэгъоу къытхэхьагъэр ары хэти куцI тфэхъоу мы дунаим тыкъыщезыхьакIырэр!Жэнэ Къырымыз
Синан Типсыхъо сыкIэдэIукIымэ, Умакъэ ащ къыхэIукIы, Чъыгы бырабэмэ япкIашъэ О пцIэкIэ къысэIушъашъэ.
Синанэу, синэнэ дах, Дунаер сфэогъэдах. Насыпыр о къысэптыгъ, Дунаер о сфыхэпхыгъ.
ГукIэгъуныгъэу о пхэлъым ЦIыфыгъэм сыфеузэнкIы, Дэхагъэу о угу илъым Дунаер къегъэкIэркIэ.
МэщбэшIэ Исхьакъ
Сиапэрэ псалъ
Зы мэфэ закъуи, тян, гум уимызэу ГъашIэм илъагъо къинми, сырэкIо, Гугъэм сыхэтэу, скуцIи изэу, Бзэу къысIуплъхьагъэм шIуагъэр рысэIо.
Хъуаджэ икъэбархэм ащыщ
Нахь шIэхэу нэф орэшъы
Зэгорэм Хъуаджэр чэщыгум къэущи, щагум икIыгъ. ТIэкIурэ щыти, атэкъэ IуакIэ зыригъэшIэу Iоу ыублагъ. Ягъунэгъоу къыгъэущыгъэхэр хъугъэр амышIэу къакIохи къеупчIыгъэх: — Сыда пшIэрэр, Хъуаджэ? — Сэ непэ Iофыбэ сиI, — ыIуагъ Хъуаджэм. — Арышъ, нахь шIэхэу нэф къэшъынэу сыфай.
МэфэкIхэмкIэ бай
Аужырэ бжыхьэ мазэу шэкIогъур мэфэкIхэмкIэ бай: Хьыкум приставхэм, зэрэдунаеу тет хъулъфыгъэхэм, лъэпкъ зыкIыныгъэм, дзэ разведчикым, фашизмэм, расизмэм апэшIуекIогъэным, МВД-м иIофышIэхэм, ныбжьыкIэхэм я мафэхэр, мыхэм анэмыкIхэри мы мазэм хагъэунэфыкIых. Тидунай тыдэкIи щымамырэу, гушIуагъор, тхъагъор къытэбэкIэу тыщыIэнэу тэлъаIо.
Адыгэ тхакIохэу шэкIогъум къэхъугъэхэр
Бэгъ Нурбый
Бэгъ Нурбый Нухьэ ыкъор Теуцожь районым ит къуаджэу Нэчэрэзые шэкIогъум и 18-м, 1937-рэ илъэсым къыщыхъугъ.
Ытхыхэрэр Нурбый 1962-рэ илъэсым щегъэжьагъэу хиутыщтыгъэх. Н. Бэгъым усэхэмрэ поэмэхэмрэ зыдэт тхылъи 8 адыгабзэкIэ ыкIи зы тхылъ урысыбзэкIэ къыдигъэкIыгъэх: «Хъярым пчъэр фыIусэхы», «Тыгъэпс», «Гъэбэжъу огъот», «Гъэтхэ нэплъэгъу», «Къошыныжъым итхыд», «ЧIыгум игупсэф», «ГъэшIэрэ тын», усэкIэ тхыгъэ романэу «МэшIочIэ мыкIуас», «Поле добра» зыфиIорэ тхылъыр урысыбзэкIэ Москва къыщыдигъэкIыгъ. Иусэхэм ащыщхэр композиторхэм орэдышъохэм аралъхьагъэх.
Бэгъ Нурбый АР-м культурэмкIэ изаслуженнэ IофышI, Андырхъое Хъусен ыцIэкIэ щыт премием илауреат. Урысые Федерацием итхакIохэм я Союз 1989-рэ илъэсым къыщегъэжьагъэу хэтыгъ.
Хъалыщ Сэфэрбый
Хъалыщ Сэфэрбый Ахьмэд ыкъор Тэхъутэмыкъое районым къэкощыжьыгъэ шапсыгъэ къуаджэу Натыхъуае шэкIогъум и 9-м, 1940-рэ илъэсым къыщыхъугъ.
ИсэнэхьаткIэ кIэлэегъадж, ытхыхэрэр 1963-рэ илъэсым къыщыублагъэу хеутых. Тхылъхэу «СшIошъ мэхъу», «Чэтэ чIэгъым», кIэлэцIыкIухэм апае усэхэр зыдэтэу «Гъогу маф, пцIэшхъо цIыкIур» къыдигъэкIыгъэх. Хъалыщ Сэфэрбый Урысыем итхакIохэм я Союз 1997-м къыщегъэжьагъэу хэт.
ЯхъулIэ Сэфэр
ЯхъулIэ Сэфэр Мыхьамодэ ыкъор къуаджэу Пэнэжьыкъуае шэкIогъум и 7-м, 1914-рэ илъэсым къыщыхъугъ. Ибэу къани, сабыизэ къин ылъэгъугъ. Ауми, еджагъ ыкIи епщэжьыгъ, сыд фэдэрэ Iофи егугъоу ыгъэцэкIагъ.
Ытхыхэрэр 1938-рэ илъэсым къыщегъэжьагъэу хиутыщтыгъэх. Усэхэмрэ поэмэхэмрэ зыдэт тхылъхэр къыдигъэкIыгъэх: «Орэд къэсIощт», «Ытхыгъэмэ ащыщхэр», «Стиххэр», «ПсыорыпI», «Мэз тамэу си ПкIашъ», зыщымыIэжь уж «Джэрпэджэжь» зыфиIорэр къыдэкIыгъ. УрысыбзэкIэ къыдигъэкIыгъэхэр: «Родине», «Стихи», «Всем сердцем», «С тобою, товарищ!», «Твоими устами». Сэфэр иусэхэм ащыщхэр орэдышъомэ аралъхьагъэх.
ЯхъулIэ Сэфэр 1963-рэ илъэсым къыщегъэжьагъэу УФ-м итхакIохэм я Союз хэтыгъ.
НэкIубгъор зыгъэхьазырыгъэр Мамырыкъо Нуриет.