ХэушъхьафыкIыгъэу мэгупшысэ
Республикэм культурэмкIэ и Министерствэ исурэт къэгъэлъэгъуапIэ Александр Резюкиным иIофшIагъэхэм, ищыIэныгъэ гъогу афэгъэхьыгъэ зэхахьэ щыкIуагъ.
СурэтышIыр илъэс 70-рэ зэрэхъурэм ехьылIэгъэ къэгъэлъэгъоныр зэхэщакIохэм гъэшIэгъонэу зэрагъэфагъ. Мыекъопэ районым икъутырэу Советскэм Александр къыщыхъугъ. Ростов-на-Дону дэт художественнэ еджапIэу М. Грековым ыцIэ зыхьы- рэм театрэмкIэ икъутамэ къыухыгъ. 1973 — 1993-рэ илъэсхэм Адыгэ драматическэ театрэм Iоф щишIагъ, иIэпэIэсэныгъэ графикэм, живописым къащигъэлъэгъуагъ.
«Насыпым игъогу», «Дэхэбаринэ ихьакIэщ», «Тартюф», «Пачъыхьэу Лир», нэмыкI спектаклэхэм ащагъэфедэхэрэ сурэтхэр А. Резюкиным ышIыгъэх. «Робинзонде» зыфиIорэ сурэт купыр тыкъэзыуцухьэрэ дунаим, зекIоным ахэлажьэхэрэм афэгъэхьыгъ.
ХьакIэм узэрэпэгъокIыщтым, шыур бзылъфыгъэм зэригъэкIотэжьырэм, Робинзон нэпкъым тетэу е мэзым хэсэу уахътэр зэригъакIорэм, нэмыкIхэм яхьылIагъэхэ сурэтхэм щыIэныгъэм нахь куоу ухащэ. Лъэпкъ шъуашэм изехьакIэ сурэтхэм унэгу къыкIагъэуцо. Живописым къоджэ щыIакIэр хэолъагъо. Бзылъфыгъэхэм япсэукIэ, сабыир зыпIурэ ным игумэкI, игупшысэхэр сурэтхэм къаIуатэ.
Адыгэ Республикэм исурэтышIхэм я Союз ипащэ игуадзэу Ольга Бреславцевар, республикэм культурэмкIэ и Министерствэ иотдел ипащэу Шэуджэн Бэлэ, Адыгэ Республикэм и Къэралыгъо премие къызыфагъэшъошэгъэ сурэтышI цIэрыIоу Гъогунэкъо Мухьарбый, нэмыкIхэри зэхахьэм къыщыгущыIагъэх, Александр Резюкиным фэгушIуагъэх.
— Графикэм гукIэ зыритыгъэу, зы жанрэр хихыгъэу сурэтхэр Александр Резюкиным ешIых. Исэнэхьат хэшIыкI ин фыриI, — къытиIуагъ Гъогунэкъо Мухьарбый.
А. Резюкиным къыфэгушIуагъэхэм, иIофшIагъэхэр зышIогъэшIэгъонхэм «тхьашъуегъэпсэу» къариIожьыгъ. Сурэти 150-м нахьыбэ шэкIогъум и 12-м нэс Мыекъуапэ къыщагъэлъэгъощт.
Сурэтыр зэхахьэм къыщытетхыгъ.