ЩыIэныгъэм дештэх
Хэгъэгум театрэм и Илъэс игъэкIотыгъэу щэкIо. Адыгэ Республикэм и Лъэпкъ театрэу Цэй Ибрахьимэ ыцIэ зыхьырэм къэгъэлъэгъонхэр щэкIох.
Урысыем изаслуженнэ артистэу, Адыгеим инароднэ артистэу Мурэтэ Чэпай ипьесэу «IэнатIэм игъэрхэм» техыгъэу «Ощхым ор еукъэбзыжьы» зыфиIорэ спектаклэр Нэгъой Инвер ыгъэуцугъ. Ащ икъэгъэлъэгъон хэлажьэх артистхэу Ахъмэт Артур, Мурэтэ Рустем, Хьакъуй Андзаур, КIэмэщ Разыет, Къэбэхьэ Анзор, Болэкъо Адамэ, Бэгъушъэ Анзор.
Ахъщэ къуалъхьэхэр ашIыхэзэ пащэм елъэIух. IэнатIэхэр къыдэзыхыхэ зышIоигъохэм афэгъэхьыгъэ къэгъэлъэгъоным артистхэм ярольхэр дэгъоу къыщашIых. КультурэмкIэ республикэм иминистрэ хъунэу фаем, артистыр А. Къэбахь, нэмыкIхэм уядэIузэ, къэгъэлъэгъоныр щыIэныгъэм къыхэхыгъэу зэрэщытым псынкIэу гу лъыотэ, театрализованнэ едзыгъохэр ащ къегъэбаих.
Iэшъхьэтетым ироль фэгъэзэгъэ артистэу А. Ахъмэтым анахьэу къыхэдгъэщырэр цIыфхэм ядэIун, унашъохэр ышIынхэ зэрилъэкIырэр ары. Ощхышхом хэтэу хъурэ-шIэрэм уасэ фешIы… IэнатIэмрэ шэн-зекIуакIэхэмрэ зэбгъэпшэнхэм пае артист пэпчъ ролэу къышIырэм уасэ фэошIы, щыIэныгъэр нахьышIоу къыбгурыIо пшIоигъоу гупшысэхэм узэлъакIу.
«Гум зэрихьэрэ шъэф»
Нэгъой Инвер пьесэр къэгъэлъэгъоным фигъэхьазырыгъ. Артистхэм щыIэныгъэм гукIэ ухащэ. КIыкI Юрэ ироль анахь къинхэм ащыщ. Хэгъэгу зэошхом иветеран, икIалэ заом щыфэхыгъ. Артистым зэгъэпшэнхэр ешIых, ыкъо заом зэрэхэкIодагъэм къытегущыIэ зыхъукIэ, нэпсыр залым чIэсхэм къызэряхырэр тэлъэгъу. КIалэр ныбжьыкIагъ, щыIэныгъэм гушIуагъуи, насыпи щимыгъотэу дунаир ыхъожьыгъ.
ШIулъэгъу къабзэм ишъэфи къэгъэлъэгъоным чIыпIэшхо щыриI. ГукIэ мыплъэрэм сыда ылъэгъущтыр? КIалэхэм агу рихьыщтыгъэ пшъашъэм ироль Урысыем изаслуженнэ артисткэу, Адыгеим инароднэ артисткэу Кушъу Светэ къешIы. ЯкIэлэгъур къаIуатэзэ, шIулъэгъу мыгощы-гъэр тинеущырэ уахътэ хъугъэм фэдэу къызыщагъэхъу.
Ацумыжъ Нурбый, КIыкI Юрэ, ХьатхьэкIумэ Аскэрбый ярольхэр гукIэ щэчыгъуаех.
— Сыд дунаим тызыфытетыр, хэт тырищыкIагъ? — къэупчIэ ветераным ироль къэзышIырэ Ю. КIыкIыр.
ОрэдыIо ансамблэ зэхищэ шIоигъу нахь ныбжьыкIаIом ироль фэгъэзэгъэ А. Къэбэхьым. ШыкIэпщынэр ыIыгъэу ар пчэгум къехьэ, бзэпсхэр «къыгъэгущыIэхэ» шIоигъу…
Режиссерэу Нэгъой Инвер шIушIагъэу фэтлъэгъурэр макIэп. Адыгабзэм изэгъэшIэн, игъэфедэн имэхьанэ зыкъызэриIэтырэр зэдэгущыIэгъухэм къахэогъэщы. Сэмэркъэур, гущыIэ щэрыор зыщыбгъэфедэщтхэр IупкIэу къызэIуахы.
Спектаклэм Улапэ къикIыгъэ купышхо еплъыгъ. Къоджэ тхылъеджапIэм иIофышIэу Гъубжьэкъо Фатимэ язэхэщакIоу щытыгъ. Ащ къызэрэтиIуагъэу, къэгъэлъэгъоныр лъэшэу агу рихьыгъ, джыри Мыекъуапэ къэкIощтых.
Сурэтым итхэр: артистхэр къэгъэлъэгъоным хэлажьэх.