Лъэпкъхэм язэгурыIоныгъэ гъэпытэгъэным фэIорышIэ
Урысые Iофтхьабзэу «Большой этнографический диктант» зыфиIорэр шэкIогъум и 1-м сыхьатыр 11-м Адыгеим щатхыщт. Мы Iофтхьабзэр лъэпкъ зыкIыныгъэм и Мафэ ипэгъокI. Мыгъэ я 4-рэу ар Урысыем щыкIощт.
Гъэсэныгъэу иIэм, динэу ылэжьырэм, исэнэхьат, игражданствэ ямылъытыгъэу урысыбзэр зышIэрэ пстэуми амал яI мы Iофтхьабзэм хэлэжьэнэу.
Iофтхьабзэм изэхэщакIох лъэпкъ IофхэмкIэ Федеральнэ Агентствэр, Удмурт Республикэм лъэпкъ политикэмкIэ и Министерствэ. ТиреспубликэкIэ мы Iофтхьабзэм кIэщакIо фэхъугъэх лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ Комитетымрэ АР-м гъэсэныгъэмрэ шIэныгъэмрэкIэ и Министерствэрэ.
Тихэгъэгу щыпсэухэрэ лъэпкъхэм яхьылIагъэу цIыфхэм ашIэрэр къызщагъэлъэгъощт диктантым упчIэ 30 хэтыщт. ЯкъиныгъэкIэ зэфэдэу гъэцэкIэнхэр Iофтхьабзэм хэлажьэхэрэм къаратыщтых. Ахэр IахьитIоу гощыгъэщтых — федеральнэ ыкIи региональнэ упчIэхэр. Тест шIыкIэм тетэу атхыщт диктантыр такъикъ 45-кIэ бгъэцэкIэн фае. Баллэу зэкIэмкIи къэпхьын плъэкIыщтыр 100.
Ушъхьагъу гъэнэфагъэхэм къахэкIыкIэ зишIэныгъэ а площадкэхэм ащызымыушэтышъущтхэм сайтэу www.miretno.ru онлайн-тестированиер шэкIогъум и 1 — 4-хэм щакIун алъэкIыщт. Мы сайт дэдэм тыгъэгъазэм и 12-м къыщегъэжьагъэу шъхьадж иIофшIагъэ икIэуххэр ригъотэщтых.
Шъолъыр площадкэм икураторыр Адыгэ къэралыгъо университетым адыгэ филологиемрэ культурэмрэкIэ ифакультет. Кураторыр тарихъ шIэныгъэхэмкIэ кандидатэу Цэй Зарем. ШъуищыкIэгъэщт къэбарыр телефонэу 8(8772) 52-46-91-м шъутеомэ зэжъугъэшIэн шъулъэкIыщт.
Iофтхьабзэр Адыгэ къэралыгъо университетым инаучнэ тхылъеджапIэ щыкIощт.
Iэшъынэ Сусан.