Адыгеим орэд къыфаIо
Адыгэ Республикэм и Къэралыгъо филармоние «Орэд къаIо, си Адыгей» зыфиIорэ пчыхьэзэхахьэр гъэшIэгъонэу щыкIуагъ.
ТхакIоу Жэнэ Къырымызэ, композиторэу Тхьабысымэ Умарэ яюбилейхэм афэгъэхьыгъэ орэдхэр зэхахьэм щагъэжъынчыгъэх. Урысыем, Адыгеим язаслуженнэ артисткэу Баджэ Дзэхъанэ, Адыгэ Республикэм инароднэ артисткэу Нэгъой Маринэ Тхьабысымэ Умарэ, Тыкъо Къэплъан яорэдхэр къаIуагъэх. Сэмэгу Гощнагъо иорэдхэу «Гупшысэр», адыгэхэм яшэнхабзэхэм афэгъэхьыгъэр, фэшъхьафхэри пчыхьэзэхахьэм щыIугъэх.
Композиторэу Нэхэе Аслъан иоперэ къыхэхыгъэу Нэгъой Маринэ къыIуагъэр, Хъупэ Муратэ ипроизведениехэм ащыщхэр, МэщбэшIэ Исхьакъ игущыIэхэм атехыгъэхэ орэдхэр, Сихъу Рэмэзанэ ыусыгъэхэр, нэмыкIхэри искусствэр зышIогъэшIэгъонхэм зэхахыгъэх.
КъумпIыл Къадырбэч игущыIэхэм атехыгъэу Андзэрэкъо Чеслав Адыгэ хэкум фэгъэхьыгъэу ыусыгъэмкIэ пчыхьэзэхахьэр аухыгъ. ЗэкIэ концертым хэлэжьэгъэ артистхэм а орэдыр къызэдаIуагъ.
Сергей Трутневыр, Анна Шапоровар, Никита Гнидиныр, Наталья Амельченкэр, Сергей Пособиловыр, Нэгъой Бэлэ, нэмыкI артистхэри зэхахьэм хэлэжьагъэх. ФортепианэмкIэ Набэкъо Бэлэ къадежъыугъ. Пчыхьэзэхахьэр Ирина Ибрагимовам зэрищагъ.
Сурэтым итхэр: Нэгъой Бэл, Баджэ Дзэхъан, Нэгъой Марин, Набэкъо Бэл.