Республикэм и Камернэ музыкальнэ театрэу Хьанэхъу Адамэ ыцIэ зыхьырэм кIэлэцIыкIухэм апае къэгъэлъэгъон гъэшIэгъонхэр щызэхащэх.

ЗэлъашIэрэ драматургэу, усакIоу Къуекъо Налбый илъэс 80, композитор цIэрыIоу Тхьабысымэ Умарэ илъэси 100 зэрэхъугъэхэм афэгъэхьыгъэ театрализованнэ къэшIынхэр артистхэм къагъэлъагъох. Н. Къуекъом «Рыу, сибэщ» зыфиIоу ытхыгъэм техыгъэ музыкальнэ спектаклэм республикэм икIэлэцIыкIухэр Мыекъуапэ щеплъых.

— «Рыу, сибэщым» орэдышъоу щыжъынчырэр Тхьабысымэ Умарэ ыусыгъэхэм къахэтхыгъ, — къыти­Iуагъ камернэ музыкальнэ театрэу А. Хьанэхъум ыцIэ зыхьырэм ихудожественнэ пащэу, Урысыем, Адыгеим искусствэхэмкIэ язаслуженнэ IофышIэшхоу, режиссерэу Сулейманов Юныс. – Спектаклэм игъэуцун хэлэжьагъ артистэу Виктор Серебрянскэр.

Шъыпкъэныгъэм, укъызыщыхъугъэ чIыгур бгъэлъэпIэным, нахьыжъхэм лъытэныгъэ афэпшIыным, лъэпкъ шэн-хабзэхэр къэухъумэгъэнхэм афэ­гъэхьыгъэ къэгъэлъэгъоным хэлэжьэрэ артистхэр дахэу фэпагъэх. Кобл Зурет, ЛIый Беллэ, Исуп Муратэ, Сергей Тарусиным, Надежда Максимовам, Светлана Корневам, Хьамырзэкъо Джумалдинэ, фэшъхьафхэм рольхэр къашIых.

КIэлэцIыкIухэр ягуапэу къэгъэлъэгъо­ным еплъых.

Сахьидэкъо Нурбый.