Сурэтхэр япсэукIэ щыщых
КIэлэцIыкIухэмрэ ныбжьыкIэхэмрэ яIэпэIэсэныгъэ фэгъэхьыгъэ сурэт къэгъэлъэгъонэу «Уахътэр зэзыпхырэр» зыфиIорэр Мыекъуапэ къыщызэIуахыгъ.
Адыгэ Республикэм искусствэхэмкIэ икIэлэцIыкIу еджапIэу Лъэцэрыкъо Кимэ ыцIэ зыхьырэм республикэм культурэмкIэ и Министерствэ IэпыIэгъу къыфэхъуи, Iофтхьабзэр зэхащагъ.
Республикэм лъэпкъхэу исхэм язэпхыныгъэхэр гъэпытэгъэнхэм, Урысыем икультурэ, итарихъ нахьышIоу зэгъэшIэгъэнхэм, тыкъэзыуцухьэрэ дунаир, Адыгеим ичIыопс кIэлэцIыкIухэм шIу ягъэлъэгъугъэнхэм зэнэкъокъур афэгъэхьыгъ.
Адыгэ къэралыгъо университетым искусствэхэмкIэ и Институт икIэлэегъаджэу, педагогикэ шIэныгъэхэмкIэ кандидатэу Хьабэхъу Адамэ зэнэкъокъум хэлэжьагъэхэм къафэгушIуагъ, хагъэунэфыкIхэ- рэ чIыпIэхэр къыдэзыхыгъэхэм щытхъу тхылъхэр, нэпэеплъ шIухьафтынхэр аритыжьыгъэх.
Адыгэ Республикэм искусствэхэмкIэ иеджапIэхэм якIэлэеджакIохэм яIэпэIэсэныгъэ зэрэхагъахъорэр зэнэкъокъум къыщылъэгъуагъ. Джэджэ, Тэхъутэмыкъое, Мыекъопэ, Красногвардейскэ, Кощхьэблэ районхэм ыкIи къалэу Мыекъуапэ яныбжьыкIэхэр чанэу хэлэжьагъэх.
IофшIэгъи 110-рэ къыхахыгъ. ОсэшI купым ипащэу, Адыгеим исурэтышIхэм я Союз ипащэу Елена Абакумовар, зэлъашIэрэ сурэтышIэу Бырсыр Абдулахь, Хьабэхъу Адамэ зэфэхьысыжьхэр ашIыгъэх.
Аныбжьхэм ялъытыгъэу кIэлэеджакIохэмрэ ныбжьыкIэхэмрэ купи 4-у гощыгъагъэх. ТекIоныгъэр кIэлэеджэкIо 20-мэ къыдахыгъ. ЩытхъуцIэр къызыфаусыгъэхэм ащыщ Адыгэ Республикэм искусствэхэмкIэ иколледж икIэлэегъаджэу Ольга Амаловар.
— Бгъэфедэн плъэкIыщт искусствэм, сурэтхэм апылъхэ кIэлэеджакIохэм яIэпэIэсэныгъэ хагъахъо, — къытиIуагъ Ольга Амаловам. — Урысхэр, адыгэхэр, ермэлхэр, къэндзалхэр, нэмыкI лъэпкъхэр зэнэкъокъум хэлажьэх. Искусствэр зышIогъэшIэгъонхэр ебгъаджэхэзэ, щыIэныгъэм зэхъокIыныгъэу фэхъухэрэр нахьышIоу олъэгъух.
Анастасия Мироновам «КIэлэцIыкIугъом ипшысэхэр» зыфиIорэ сурэтхэмкIэ щыIэныгъэм еплъыкIэу фыриIэр къегъэлъагъо. Вера Сафоновам иIофшIагъэ славянхэм ятарихъ ехьылIагъ. ХьапэкIэ Заринэ илъэс 14 ыныбжь. Мэзмае итарихъ сурэтищкIэ къегъэлъагъо. Нэгъой Дарые адыгэхэм яIэшIагъэхэм яхьылIэгъэ сурэтхэмкIэ игупшысэхэр къытфызэIуехых.
Шыу бланэм, лIыхъужъым ясурэтхэр, чIыопсым ехьылIэгъэ IофшIагъэхэр гъэшIэгъоных. Адыгэ республикэ гимназием тарихъымкIэ икIэлэегъаджэу ЕмтIылъ Юсыф ипхъорэлъф игъусэу къэгъэлъэгъоным къэкIуагъ. Пшъэшъэжъыем республикэм искусствэхэмкIэ икIэлэцIыкIу еджапIэ зыщегъасэ, сурэтхэр ышIыхэзэ цIыф цIэрыIохэм щысэ атырехы.
ИскусствэхэмкIэ кIэлэегъаджэхэр IофшIагъэхэм яплъыгъэх, зэфэхьысыжьхэр ашIыгъэх. Хьабэхъу Адамэ изэгъэпшэнхэм къащыхигъэщыгъ искусствэм зыфэзыгъасэхэрэ кIэлэеджакIохэм, ныбжьыкIэхэм щыIэныгъэм зыкъыщагъотыным фэшI непэ лъэпсэшIу зэрашIырэр.