Дунаим ушумкIэ изэнэкъокъу Китаим щыкIуагъ. Къэралыгъуи 100-м къехъумэ яспортсменхэр зэIукIэгъухэм ахэлэжьагъэх.

— Тиреспубликэ щапIугъэ пшъашъэр Урысыем ихэшыпыкIыгъэ командэ хэтэу бэнагъэ. Шъобжхэр къытыращагъэх нахь мышIэми, текIоныгъэм икъыдэхынкIэ гуетыныгъэ ин къызхигъэфагъ, джэрзыр къыфагъэшъошагъ. Кристина Морозовам, ащ итренер сафэгушIо, текIоныгъакIэхэр къыдихынэу фэсэIо, — къы­Iуагъ Адыгеим и ЛIышъхьэу КъумпIыл Мурат.

Кристина Морозовам зызыщигъэсэрэ рес­публикэ спорт еджапIэу N 2-м, пащэр Урысыем, Адыгеим язаслуженнэ тренерэу Хъот Юныс, К. Морозовам итренерэу, Адыгэ Рес­публикэм изаслуженнэ тренерэу НэмытIэкъо Аскэр, ежь спортсменкэ цIэрыIоу К. Морозовам гъэзетымкIи афэгушIохэ ашIоигъоу телефонкIэ къытфытеуагъэхэм, макъэ къы­тэзыгъэ­Iугъэхэм тафэраз, «тхьашъуегъэпсэу» ятэIожьы.

Республикэ общественнэ движениеу «Адыгэ Хасэм» Кристина Морозовар рагъэблэ­гъэщт, къыфэгушIощтых.