Партием и Тхьаматэу, Урысыем и Премьер-министрэу Дмитрий Медведевым шъолъырхэм япащэхэм тыгъуасэ Москва зэIукIэгъу щадыриIагъ. Адыгеим и ЛIышъхьэу КъумпIыл Мурат ащ хэлэжьагъ.

Партиеу «Единэ Россием» ишъолъыр къутамэхэм яIоф­шIэнкIэ анахьэу анаIэ зытырагъэтын фаехэр, партием изэфэ­сэу шэкIогъум и 23-м щыIэнэу агъэнэфагъэм изыфэгъэхьазырын илъэныкъо шъхьаIэхэр Дмитрий Медведевым къыгъэ­нэфагъэх.

«Типартие пэрытныгъэр ыIыгъ, ар тигуапэ. Ау мыщ дэжьым къэIогъэн фае политикэ зэнэкъо­къуныгъэ пхъашэ зыщыкIорэ лъэхъаным тызэрэхэтыр. Мафэ къэс Iофэу тшIэрэмкIэ цIыфхэм цыхьэу къытфашIырэр къэдгъэшъыпкъэжьын фае. Хэти чIыпIэу зыдэщыIэм елъытыгъэу ащ ына­Iэ зэрэтыригъэтырэр сэшIэ. Ма­фэ къэс производствакIэхэр къызэIутэхых, гъогукIэхэр тэшIых, щагухэр зэтетэгъэпсыхьэх — ахэр зэкIэ цIыфхэр зыгъэгумэкIырэ Iофыгъо гъэнэфагъэу щытых, шъолъыр пстэуми ащагъэцэкIэрэ Iофыгъох», — къы­Iуагъ партием и Тхьаматэ.

ЗэIукIэгъум илъэхъан шъо­лъыр­хэм къырахьыжьэрэ Iофыгъохэм язэшIохынкIэ IэпыIэгъу къызэрафэхъурэм пае партием ипащэ зэрэфэразэр КъумпIыл Мурат къыIуагъ ыкIи партием ышIырэ унашъохэм ягъэцэкIэн, джащ фэдэу цIыфхэм ящыIакIэ нахьышIу шIыгъэнымкIэ программэхэм язэшIохын Адыгеир зэрафэхьазырыр къыхигъэщыгъ.

«Партием иIэпыIэгъу ренэу зэхэтэшIэ. Арэу щымытыгъэмэ непэ республикэм фэхъурэ зэхъокIыныгъэхэр щыIэщтыгъэ­хэп, ыпэкIи тылъыкIотэн тлъэкIы­щтгъагъэп. Партием пшъэдэ­кIыжь ин ехьы стратегическэ Iофыгъохэм язэшIохынкIэ, социальнэ-экономикэ лъэныкъомкIэ Iофыгъоу къэуцухэрэм язэшIохынкIи мэхьэнэ гъэнэфагъэ ахэм яIэу щыт. Анахьэу партием ынаIэ зытыригъэтырэр цIыфхэм яфедэхэм япхыгъэ Iофыгъохэр ары. МыщкIэ щысэу къэпхьын плъэкIыщтых чIыпIэ­хэм ащыпсэурэ цIыфхэр къыхагъэлажьэхэзэ ущыпсэунымкIэ гуIэтыпIэу къалэр шIыгъэным, общественнэ чIыпIэхэр ыкIи щагухэр зэтегъэпсыхьэгъэнхэм япхыгъэ Iофтхьабзэхэу зэшIуа­хыхэрэр. Партием илIыкIохэм ягъусэхэу а IофшIэнхэр зэшIуа­хых ыкIи ащ фэдэ зэдэлэжьэныгъэм кIэухышIоу фэхъухэрэр непэ зэкIэми янэрылъэгъу, осэшIуи афашIы», — къыхигъэ­щыгъ Адыгеим и ЛIышъхьэ.

Республикэм исоциальнэ- экономикэ хэхъоныгъэкIэ программэу щыIэр пхырыщыгъэным къызэрэдыригъаштэрэм пае Урысые Федерацием и Премьер-министрэ зэрэфэразэр КъумпIыл Мурат къыIуагъ. Адыгеим и ЛIышъхьэ зэрилъытэрэмкIэ, программэм къыдилъытэрэ Iофтхьабзэхэм республикэм ихэхъоныгъэ кIочIакIэ къыхалъхьащт.

«Единэ Россием» ипрограммэ къыдилъытэрэ Iофтхьабзэхэр нахь шIогъэ ин хэлъэу щыIэныгъэм щыпхырыщыгъэнхэмкIэ, джащ фэдэу лъэпкъ проектхэр гъэцэкIэгъэнхэмкIэ республикэм Iофыгъо зэфэшъхьафхэр зэрэщызэшIуахыхэрэр Адыгеим и ЛIышъхьэ къыхигъэщыгъ.

Партиеу «Единэ Россием» и Тхьаматэу Дмитрий Медведевым къыдыригъэштагъ шъолъыр­хэм япэщэ заулэхэм ягукъэкI — партием ишъолъыр къутамэхэу ярегионхэм ащыIэхэм пэщэныгъэ адызэрахьаным.

«ХэдзакIохэм цыхьэу къытфа­шIырэр мафэ къэс Iофэу дгъэцакIэрэмкIэ къэдгъэшъыпкъэ­жьын фае. Ар гъэнэфагъэу, зэкIэлъыкIуакIэ иIэу щытын фае, тишъолъырхэм ащыпсэурэ цIыф­хэм яеплъыкIэхэр, яшIоигъоныгъэ­хэр зэдгъэшIэнхэм ренэу ыуж титын фае, джащыгъум мэкъэ­ты­ныр зыщыкIощт мэфэ зыкIым, джащ фэдэу Къэралыгъо Думэм ихэдзынхэу 2021-рэ илъэ­сым щыIэщтхэм дэгъоу за­фэдгъэ­хьазырын тлъэкIыщт», — къы­Iуагъ партием и Тхьаматэу, Премьер-министрэу Дмитрий Медведевым.

Адыгэ Республикэм и ЛIышъхьэ ипресс-къулыкъу