Ядэхагъэ щыIэныгъэм къыщыхэщы
Шъолъыр фестиваль-зэнэкъокъоу «Адыгэ пшъашъ» зыфиIорэр Адыгэ Республикэм ящэнэрэу щыкIуагъ.
Республикэм культурэмкIэ и Министерствэрэ лъэпкъ культурэм и Гупчэрэ зэхащэгъэ зэнэкъокъум пшъэшъи 9 хэлэжьагъ. Iофтхьабзэр зыщырекIокIыгъэ Адыгэ Республикэм и Къэралыгъо филармоние ичIэхьапIэ пшъашъэхэм яхэдыкIынхэр, лIэкъо тамыгъэхэр, адыгэ шъуашэхэр, фэшъхьаф лъэпкъ тхыпхъэхэр къыщагъэлъэгъуагъэх.
Мыекъуапэ щыпсэурэ ЛIыбзыу Шан, Тэхъутэмыкъое районым къикIыгъэ Сыджыхь Хъан, нэмыкIхэм якъэгъэлъэгъонхэм узыIэпащэ. Хъ. Сыджыхьым илIэкъо тамыгъэ зэпэжъыужьы, IэпэIасэм иIэпэIэсэжь ышIыгъэу плъытэзэ, купкIэу хэлъым уегупшысэ.
Адыгэ шъуашэхэр къэзыгъэлъэгъорэ Цурмыт Рузанэ сэе дахэу ышIыгъэхэм ныбжьыкIэхэр къяуцокIыгъэх, ны-тыхэри къапэчыжьэхэп. УпчIэхэм яджэуапхэр Рузанэ зэгъэфагъэу къеIуатэ. Саер щыгъын къодыеу зэрэщымытыр, адыгэ шъуашэр тарихъ намысэу зэрилъытэрэр иеплъыкIэхэм къащыхегъэщы.
Саер
Зэнэкъокъум хэлэжьэрэ пшъашъэ пэпчъ саер щыгъ. Лъэпкъ шъуашэм къегъэдахэх, нэр пIэпахы. Адыгэ бзылъфыгъэхэм лIэшIэгъу пчъагъэхэм зэIэпахызэ пшъашъэм игъэсэн фэгъэхьыгъэ амалэу агъэфедэщтыгъэхэр къытлъыIэсыжьыгъэх.
Зэхахьэр зезыщэхэрэ Беданыкъо Замирэрэ Хьакъуй Андзауррэ пшъашъэхэм ацIэхэр къыраIозэ пчэгум къырагъэблагъэх: Сыджыхь Хъан – Тэхъутэмыкъое район, ЛIэхъусэжъ Анжел – Теуцожь район, Датхъужъ Джэнэт – Джэджэ район, Унэрэкъо Дан – Кощхьэблэ район, ЛIыбзыу Шан – Мыекъуапэ, Гъыщ Фатим – Шэуджэн район, ДыдыкI Камил – кIэлэегъэджэ колледжэу Андырхъое Хъусен ыцIэ зыхьырэм щеджэ, ЖэнэлI Асет —Адыгэкъал, Трахъо Залин — республикэм искусствэхэмкIэ иколледжэу Тхьабысымэ Умарэ ыцIэ зыхьырэм щеджэ.
Губзыгъэх
Пшъашъэхэр губзыгъэх, IупкIэу мэгущыIэх. ЛIакъохэм ятарихъ къытегущыIэхэ зыхъукIэ, къэбарэу къаIуатэрэр къызэраугъоигъэр пшIогъэшIэгъонэу укIэупчIэ.
— Зэнэкъокъум сызэрэхэлэжьагъэм анахь шIуагъэу къыхэсхыгъэр зызгъэхьазырызэ тилIакъо итарихъ игъэкIотыгъэу къэсIотэн слъэкIынэу зэрэхъугъэр ары. Саем идэхагъи, ар пщыгъэу пчэгум укъихьаным имэхьани къыхэсэгъэщых, — къытиIуагъ Унэрэкъо Данэ.
Адыгэ шъуашэр щыгъэу Гъыщ Фатимэ къызэрэшъуагъэм, лъэпкъ гупшысэм нахь фэщагъэ зэрэхъугъэм къатегущыIагъ. Усэхэм къяджагъэхэм, адыгэ орэд къэзыIуагъэхэм, лъэпкъ шхыныгъохэм ягъэхьазырын пыщагъэхэм яеплъыкIэхэри тшIогъэшIэгъоныгъэх. ДыдыкI Камилэ, Трахъо Залинэ, нэмыкIхэм зэнэкъокъур ягъашIэ шIукIэ къыхэнэжьыщт.
«ЫIэ дышъэр пэзы»
НахьыпэкIэ адыгэмэ арэущтэу аIощтыгъэ. Зэнэкъокъум хэлэжьэгъэ пшъашъэхэм орэд къаIощтми, къашъор къашIыщтми уащытхъунэу зыкъагъэлъэгъуагъ. Сирием къикIыжьыгъэ ЛIыбзыу Шан шыкIэпщынэр «къыгъэгущыIагъ», лъэпкъ мэкъамэхэр ыгъэжъынчыгъэх. Пшъашъэхэр губзыгъэх, IупкIэу адыгабзэкIэ къаIорэм уигуапэу уедэIу.
Зэгъэпшэнхэр
Джэныкъо машIом, пщэрыхьапIэм, унагъом фэбагъэу илъыщтым уатегущыIэзэ, бзылъфыгъэм имэхьанэ къыхэогъэщы.
ОсэшI купым ипащэу ЛIыхъукIэ Андзаур, зэхэщэкIо купым итхьаматэу ШъэуапцIэкъо Аминэт, осэшI купым хэтхэу Зыхьэ Заурбый, лъэпкъ IэпэIасэу Еутых Асе, нэмыкIхэм зэхахьэм къыщаIуагъэр илъэсыбэмэ ателъытагъэу щыт.
Унэгъо хъызмэтым, анахьэу пщэрыхьаным, яхьылIэгъэ упчIэхэр щыIэныгъэм щыщых. ГущыIэм пае, лыр зэрэбгъэжъэщтым, лылыбжьэм ишъэфхэм, джэнчым хэпшIыкIыщт шхыныгъохэм, пIастэм, фэшъхьафхэм ягъэхьазырын бысымгуащэр афэIэзэн фае. Зыхьэ Заурбый пшъашъэхэр къымыубыхэу яшIэныгъэхэм ахагъэхъонымкIэ щысэшIухэр къыхьыгъэх.
Зэнэкъокъум еплъыгъэхэм къытаIуагъ пшъашъэхэм ацIэхэр къызыраIокIэ, къахэкIыхэзэ пчэгум нахь зыкъыщагъэлъэгъон зэрэфаер – нахьышIоу ашIэнхэм фэшI. ОсэшI купым имызакъоу, залым чIэсхэри пшъэшъэ дахэм икъыхэхын хэлажьэхэ ашIоигъу.
ЩытхъуцIэ зыфаусыгъэхэр
«Пшъэшъэ Iэдэб» — ЖэнэлI Асет, «Пшъэшъэ къэшъуакIу» — ЛIыбзыу Шан, «Пшъэшъэ гъэсагъ» — Гъыщ Фатим, «Пшъэшъэ Iуш» — ЛIэхъусэжъ Анжел, «Пшъэшъэ губзыгъ» — Датхъужъ Джэнэт, «Пшъэшъэ IэпэIас» — Трахъо Залин. «Пшъэшъэ хэбзэ зехь» зыфиIорэр, ящэнэрэ чIыпIэр ДыдыкI Камилэ фагъэшъошагъ. «Пшъэшъэ дах» зыфиIорэр Унэрэкъо Данэ ыхьыгъ. Апэрэ чIыпIэр зыфагъэшъошэгъэ Сыджыхь Хъан «Пшъэшъэ тхьамат» зыфиIорэ цIэр фаусыгъ. Ар Пэнэхэс щыщ, Краснодар дэт апшъэрэ еджапIэм щеджэ.
ЗэхэщакIохэр, осэшIхэр пшъашъэхэм афэгушIуагъэх, нэпэеплъ шIухьафтынхэр аратыжьыгъэх. Сыджыхь Хъан янэжъ пIашъэу Сурэ къызэрэтиIуагъэу, зэнэкъокъур цIыфхэм ашIогъэшIэгъон, типшъашъэхэм уащытхъунэу зыкъагъэлъэгъон алъэкIы. Мэшэлахь! Тхьэм бэгъашIэ, насыпышIо ешIых.
ЕмтIылъ Нурбый.