Илажьэп
Кавказ кином зеушъомбгъу. Адыгэ режиссерхэм тырахырэ фильмхэм илъэс къэс ахэхъо. Зэуж итхэу «экран иным» адыгэ кинохэр ратIупщыхьэх. Налщык уикIынышъ, фестиваль-зэнэкъокъу инэу Францием ит къалэу Канны щызэхащэрэм ухэлэжьэныр Iоф къызэрыкIом фэдэу хъугъэ. Ащи шъхьадэкIыхэшъ, Оскар къафагъэшъошэным адыгэ кIалэмэ тырахыгъэ фильмэхэр кIэдэух. Кавказым киноискусствэ къыщэуща? Кино тезыхыгъэ режиссерэу, Адыгеим искусствэхэмкIэ изаслуженнэ IофышIэу ЕмкIуж Андзор упчIэм иджэуап къыритыгъ. Ащ тырихыгъэ фильмэу «Невиновен» зыфиIорэр шэкIогъум и 7-м къыщегъэжьагъэу Урысыем икинотеатрэхэм къащагъэлъэгъощт.
— Андзор, тепхыгъэ фильмэу «Невиновен» зыфиIорэр хьазыр. Кинотеатрэ инхэм къащагъэлъэгъощт. ТыпфэгушIо мыщ фэдэ уахътэри къызэрэсыгъэмкIэ. Сэ къызэрэсшIошIырэмкIэ, джа жъугъэу кинор бгъэлъэгъоным иIизын нахь охътаби, кIуачIи ыхьыгъ. Адрэ техын, зэхэгъэуцожьын, мэкъэ кIэлъхьаныр шIэхэу зэшIопхыгъэ фэдэу къысщэхъу.
— Ар апэрэ нэплъэгъу ныIэп. Шъыпкъэу пIощтмэ, зэкIэ едзыгъомэ кIуачIэу ахьыгъэр макIэп. Гупшысэу щыIэр сценарие птхыжьыныр, актерхэр къыхэпхынхэр, зыщытепхыщт чIыпIэхэр бгъэнэфэнхэр. А зэпстэур джыри фильмым итехын уфемыжьэзэ зэогъэзафэ. Дэпкъыр зэрагъэуцоу, чырбыщ-чырбыщэу зэтеслъхьэзэ, сылъыкIотагъ. Тэрэз, кинотеатрэм узэрэчIэхьащтыр анахь къиныгъ. Сыда пIомэ тэ, Кавказ шъолъырхэмкIэ, фильмыр зэрэпщэщт шIыкIэр тшIэрэп, ащ фэдэ IофшIэныр зэшIозыхыщт компании тиIэп. Джыри ащ фэдизэу кино къыдэгъэкIыным тыфэкъулаеп. Тетхыщт, монтаж тшIыщт, макъэхэр едгъэкIущтых. Ау кинор цIыфхэм ябгъэлъэгъуным укъынэсыфэ шапхъэу бгъэцэкIэн фаер макIэп.
— Ащ пая уахътэу шъукъызщыдэкIыщтыр зыкIызэкIэшъухьажь зэпытыгъэр?
— Ары адэ. АпэрэмкIэ, фильмым фестиваль щыIэныгъэ къыкIун фае. Мары тэ тикиностудиеу «Кавказфильмым» тырихыгъэ кинор Канадэ, Шъачэ, Москва, Санкт-Петербург, Карелием ащыкIуагъэхэ зэнэкъокъу-фестивальхэм ахэлэжьагъ. Ащ илъэс фэдиз ыхьыгъ. Ащ ыуж кинотеатрэм тызэрэчIэхьащт гъогум тытехьагъ. Тилъэгъохэщыр «Урысые фильм куп» зыфиIорэ компаниеу Москва дэтыр ары. Апэрэ мафи тиIэпыIэгъухэу, продюсерхэу Къэрдэнэ Ризван, Хъуажъ Аминэт, Шыумахэ Арсен, Алексей Петрухиным, КIыкI Аскэр мы мэхьэнэ ин зиIэ IофшIэныр зэпыгъэфэгъэнымкIэ яшIогъэшхо къэкIуагъ.
— А зыфапIорэ кино щэн компанием фэдэ адэ Кавказым игъэуцогъуая?
— Iоф псынкIэп. Ау зэпымыгъэфэнэу щытэп. Фильмхэр нахьыбэу зэрэтырахы хъугъэр къыдыхэплъытэмэ, ащ фэдэ шIэныгъэ зиIэ цIыфхэр тищыкIагъэ хъущтых. Къэралыгъом мы Iофым изэшIохын иамал рихьылIэн, имылъку хилъхьан фай. Мары зекIоным зетэгъэушъомбгъу, хэхъоныгъэхэм тафэблэ, пэрыт шъолъырхэм тахэтынэу пшъэрылъхэр тэгъэуцух. Ахэр дгъэцэкIэнхэм пае тыкъызэрэлъагъорэм мэхьанэ иI. Кино о тепхыгъэу, оуиеу уиIэ зыхъукIэ, уасэу къыпфашIырэм хэхъощт.
— Ори, узипащэ «Кавказфильм» зыфиIорэ компаниеми апэрэу кинотехыныр шъупэкIэкIыгъ. КъызгурэIо, пэрыохъухэр мэкIагъэп. Ау зэкIэмэ уапхырыкIыгъ, укъызэтеуцуагъэп.
— Сыкъызэтеуцомэ, сы ЕмкIужэп. СекIущтэп, сезэгъыщтэп Iоф зымышIэрэм. Сэр дэдэми сызэкIужьыщтэп. Сценарие тхыным къыщыублагъэу техыным, зэхэгъэуцожьыным, экраным нэгъэсыгъэным нэсыжьэу, зэкIэмэ сахэлэжьагъ. Сэр-сэрэу зэкIэ спэкIэкIынэу сыфэягъ. Хэта зышIэрэр, джыри зы проект къыкIэлъыкIомэ, псычIэгъ мыжъоу узэлъэпэошъущтхэр джы нафэу сэшIэх. Творческэ гъогур къызэпытчыфэ купэу къыздэлэжьагъэм зэхъокIыныгъэхэри фэхъухэу хъугъэ. Сыда пIомэ сыхьат 20 зэпымыоу Iоф пшIэныр зыфэмыукIочIыгъэхэр къыхэкIыгъэх. Ау гъогум къыздытехьэхи, зесэгъэжьакIэм зы сомэ сиджыбэ имылъэу, фильмэр кинотеатрэм къыздынэзыгъэсыгъэхэм зэкIэмэ сафэраз.
— Тхьапша адэ тефагъэр зэкIэмкIи фильмым итехын, изэхэгъэуцожьын?
— Сомэ миллион 18. Федэ къыхэтымыхыжьми, а мылъкур тыугъоижьымэ сезэгъыщт. Ахъщэ кином къыхэзылъхьагъэхэм афызэкIэбгъэкIожьын фаеба.
— Ахъщи уимыIэу уиIоф инэу зебгъэушъомбгъугъ. Кинор Кавказ шъолъыр пчъагъэхэм ащытепхыгъ, Москва, Санкт-Петербург шъуанэсыгъ. Къушъхьэхэм мэфитIо лъэсэу шъуакъыщекIокIыгъ. Ащ фэдизым актерхэр, операторхэр къепщэкIынхэ фаеба яфэIо-фашIэхэр зэкIэ ябгъэгъотызэ. Къэбэртэе-Бэлъкъарым уимыкIэу тепхын плъэкIыщтыгъэба?
— СфэмыгъэцэкIэщтыр пшъэрылъэу згъэуцужьыгъэп. Апэрэ фильмэу тесхырэм зэкIэ адыгэ республикэхэр къыщызгъэлъэгъонхэу сыфэягъ. Тишъолъырхэр джэнэтых, чIыпIэ къыхэхынымкIэ къин тлъэгъугъэп. Шъолъыр зэфэшъхьафхэр къызэрэщыгъэлъэгъуагъэм дыкIыгъоу актерхэри къызэрыкIыгъэхэр зэфэшъхьафыгъэх. Адыгеим, Къэбэртэе-Бэлъкъарым, Къэрэщэе-Щэрджэсым, Москва, Украинэм ащыщ актерхэр хэлэжьагъэх. Джыри техыпIэм зэритхэзэ, ахэр зэшIунхэ фэягъэ. Фильмым итемэ шъхьаIэ — зэкIэ цIыфхэр зэфэдэх — ащ дэжьым щыпхырысщынэу сыублэгъагъ.
— Лъэпкъ зэхэдзыр, зэмызэгъыныгъэр — ары фильмэу «Невиновен» къыщыбгъэлъагъорэр. Скинхедхэм адыгэ кIалэ аукIы. Мы темэр пштэ зэхъум, пхырымыкIын ымылъэкIынэу уегупшысагъэба?
— Сыда зыкIыпхырымыкIыщтыр, Свет?
— Я 90-рэ илъэсхэм къащегъэжьагъэу Урысыем щытырахырэ фильмхэм Кавказым къикIыгъэхэр ары укIакIохэу къащагъэлъагъохэрэр.
— Сэ тесхыгъэм хэти щызэфэд. АукIыгъэ кIалэми, зыукIыгъэ кIалэми зи ялажьэп. Сыд адэ укIын Iоф къызкIыхэхьагъэр? Зы ушъхьагъу горэ иIэнба? УкIакIом зи имылажьэу мэхъуа? Фильмым ащ джэуап къыритыщт. Сэгугъэ цIыфхэм ар къагурыIонэу. Мыщ дэжьым зэкIэ къыщысIотэщтэп. ШэкIогъум и 7-м къакIохэмэ, алъэгъущт.
— Кавказ кинор сыд фэдэн фая?
— Кино тэрэзын фае. «Тэрэз» сIомэ къизгъэкIырэр — зекIокIэ тэрэзхэр къыщыгъэлъэгъогъэнхэ фае. Кавказым хабзэу илъыр мыукъуагъэу, лIыгъэр щызэрахьэу, щысэшIу хъущт цIыфхэр хэтхэу, шIулъэгъу къыщыбгъэлъагъомэ, ар шIулъэгъу къабзэу, напэр щымыуцIэпIыгъэу щытын фае.
— Ащ фэда «Невиновеныр»?
— Сегугъугъ ащ фэдэнэу. Ау уасэ къыфэзышIыщтхэр еплъыщтхэр ары.
— Урысыем икинотеатрэхэм зэкIэми къащагъэлъэгъощта фильмыр?
— ЗэкI пIоми хъущт. Чыжьэ дэдэхэу, Сыбыр е Темыр къуапэхэм ащыIэхэ шъолъырхэр къызэдедгъэубытыгъэхэп. Сыда пIомэ джыри ащ фэдизэу тыцIэрыIоп, мэзэ мэкъэгъэIу къодыекIэ цIыфхэм анаIэ къызытырябгъэдзэшъущтэп. Кавказ шъолъырхэм зэкIэми къащагъэлъэгъощт. Ащ нэмыкIэу къэлэ гупчэхэу Москва, Санкт-Петербург фэдэхэм ащыкIощт.
— Фильмыр теохыфэ театрэ IофшIэныр зэпыбгъэугъа? Хьауми птIупщыжьыгъа а Iофыр?
— Театрэр — сищыIэныгъ. Ары сызфагъэсагъэр, сызфеджагъэр. Тхьэм джэнэт къырет, сикIэлэегъэджагъэу Марк Захаровыр бэмышIэу дунаим ехыжьыгъ, мырэущтэу ыIощтыгъэ: «Проект заулэ зэдэпфы хъущтэп. Шъхьэр зэрэпсаоу узхэт IофшIэным ептын фае». Театрэм спсэ хэлъ, ар стIупщыщтэп егъашIэми, кинор тесэхыфэ зэпыугъо фэсшIыгъагъэгу. Шъыпкъэ, фильмыр тэгъэхьазырыфэ клип заулэ тикиностудие тырихыгъ. Ау ахэри тымышIынхэм шIокI иIагъэп. Ахъщэ гори къэбгъэхъэн фаеба…
— Гухэлъ благъэхэр…
— Фильмэу «Невиновен» зыфиIорэр лъэпэ мафэ едгъэжьэныр ары джыдэдэм зыуж титыр. ЗэкIэ къыблэ къуапэр къэткIухьагъ, журналистхэм гущыIэгъу тафэхъугъ. АщкIэ адыгэ телевидениеми, республикэ гъэзетхэми лъэшэу сафэраз, анаIэ къыттырагъэты зэпыт. ШэкIогъум и 7-м къэгъэлъэгъонхэр аублэщтых.
— Шапхъэу щыт тхьамэфитIур ара ар къызэрагъэлъэгъощтыр, хьауми джыри лъагъэкIотэщта?
— ЦIыфхэр къызэрэкIощтхэм елъытыгъэщт. Ахэм ялъытыгъэщт тигухэлъхэри. Зичэзыу фильмэр зыфэдэщтыр сэшIэ. Сценарие тхыныр едгъэжьэгъах. Тыкъэуцущтэп. «Кавказское кино» аIомэ — ар зыфаIорэ фильмхэр зыфэдэхэр унэ къыкIэуцохэу хъуным тыфэлэжьэщт.
ДэгущыIагъэр ТIэшъу Светлан, АР-м изаслуженнэ журналист.