ПIуныгъэ мэхьанэшхо яI
КIэлэцIыкIу емышIэ-шIумышIэхэм кIоныр, гущыIэныр зэрэрагъажьэу, амышIэрабэр ашIогъэшIэгъонэу упчIэрые дэдэх. Алъэгъуи, зэхахи — жьыр къыздикIрэри, псыр зэрычъэрэри, чъыгхэр къызэрэкIхэрэри — зыкIэмыупчIэхэрэ щыIэп.
Мы зэкIэми, сабыйхэм нахь псынкIэу зыкъаштэнымкIэ, дэIонхэ алъэкIэу, япIоу зэхахырэр агу раубытэу есэнхэмкIэ, гущыIэкIэ шIыкIэми, пIорэм гъэсэпэ-ушъыеу хэлъми бэ ялъытыгъэр. АщкIэ пIуныгъэ лъэныкъор гъэлъэшыгъэнымкIэ анахь мэхьанэ зиIэхэр пшысэхэр арых. Ахэм акIэдэIукIхэрэ сабыйхэр Iуш цIыкIухэу, гущыIэныр нахь къафэпсынкIэу, гулъытэ-зэхэшIэ дэгъу яIэу мэхъух.
Мы шIошIыр иI тхакIоу, Адыгэ Республикэм и Къэралыгъо шIухьафтын илауреатэу Надежда Байновами. «КIэлэцIыкIум, илъэсым къыщегъэжьагъэу ыкIи нахь ныбжь иIэ зыхъукIэ, ренэу зыгорэ фэпIотэн фае, ащ кIэбгъэгушIузэ (зэхихырэр гурыIогъошIу фэпшIызэ), щыIэныгъэм хэощэ. АщкIэ анахь амал дэгъур пшысэхэр арых. Сэ сшъхьэкIэ сабыитф спIугъэшъ, шъыпкъэ, джы ахэр ны-тых, ежьхэм атешIыкIыгъэхэ пшысэхэр афызэхаслъхьэхэзэ згъэдаIощтыгъэх, — еIо бзылъфыгъэ Iушым. — Джыри сикъорэлъф-пхъорэлъфхэм пшысэхэр якIасэх лъэшэу, сэри сфэлъэкIэу зи къыстенэрэп».
Надежда Байновам апэдэдэ тхэныр зэрэригъэжьэгъагъэр пшысэхэр ары, ишъаоу Дим ары ахэмкIэ къаигъагъэр, ыкIэ ытIупщыщтыгъэп, ренэу зэпымыоу къыфэпIотэ зэпытыгъэми, емызэщэу къызэрэдаIощтыгъэр ным щыгъупшэрэп.
«Обижать нельзя друзей» зыфиIорэ тхылъэу Н. Байновам бэмышIэу къыдигъэкIыгъэу кIышъо пкIырапкIынэр зиIэр анахь цIыкIу дэдэхэу кIэлэцIыкIу IыгъыпIэм кIохэрэм атегъэпсыхьагъ. Мыщ усэ 35-рэ ыкIи пшыситф «Костя и гномики» ыIоу къыдэхьагъэх. Ахэм къаIуатэрэм елъытыгъэу сурэтшIыгъэхэу кIэлэцIыкIухэм шъо зэфэшъхьафхэмкIэ агъэлэжьынхэ фаехэр дэтых. Зэхахырэр ашъхьэ зэрэраубытэщтым нэмыкIэу, къэлэм IыгъыкIэри, сурэт шIыкIэри ашIэщт, аIэпкъ-лъэпкъхэми нахь Iоф ашIэщт.
Усэ цIыкIу пэпчъ зы шэн-гъэпсыкIэ горэ щыкIэгъэтхъыгъ: гущыIэм пае, ныбджэгъухэм агу хэбгъэкIы зэрэмыхъущтыр, IэпэIэсагъэм зызэрэфэбгъэсэщтыр, шъыпкъэр пIон зэрэфаер, нэмыкIхэри.
«Костя и гномики» зыфиIорэ пшысэ зэхэтхэри уинми узIэпащэу, сабыигъо-къэбзагъэр нэм къыкIагъэуцожьэу, кIэлэцIыкIу дунай нэфым ухэзыщэх.
Мы тхылъым къыдэхьэгъэ усэ цIыкIухэри, пшысэхэри кIэлэцIыкIухэм къяшIэкIыгъэ пстэур нахь ашIэнымкIэ, гущыIэкIэ тэрэзыр къаIэкIэхьанымкIэ, зэхахыгъэр е алъэгъугъэр къаIотэжьышъоу есэнхэмкIэ, дэгъур ыкIи дэир тIэкIу-тIэкIузэ къагурыIонымкIэ амалышIух. гущыIэ зафэр ары цIыфыр зэрапIоу, хэти анахь ищыкIагъэр.
Мамырыкъо Нуриет.