Ищытхъу хегъахъо
Дунаим ушумкIэ изэнэкъокъу Китаим икъалэу Шанхай щыкIуагъ. Урысыем ихэшыпыкIыгъэ командэ хэтэу Кристина Морозовар зэIукIэгъухэм ахэлэжьагъ.
Адыгэ Республикэм испорт еджапIэу N 2-м ипащэу, Урысыем ыкIи Адыгеим язаслуженнэ тренерэу Хъот Юныс къызэрэтиIуагъэу, Кристина Морозовам джэрзыр дунаим къыщыдихыгъ.
Республикэм испорт еджапIэу N 2-м зыщызыгъэсэрэ Кристина Морозовар килограмм 70-м нэс къэзыщэчыхэрэм янэкъокъугъ. Адыгэ Республикэм изаслуженнэ тренерэу НэмытIэкъо Аскэр ипащэу спорт зэнэкъокъухэм зафегъэхьазыры.
Адыгэ къэралыгъо университетым физкультурэмрэ дзюдомрэкIэ и Институт ия 4-рэ курс К. Морозовар щеджэ, зэнэкъокъухэм хагъэунэфыкIырэ чIыпIэхэр къащыдехы. Урысыем изэнэкъокъу гъогогъуи 6 дышъэр къыщихьыгъ. Урысыем и Кубок фэгъэхьыгъэхэ зэIукIэгъухэм гъогогъуи 5 дышъэр къащихьыгъ.
Тиспортсменкэ цIэрыIо Европэм изэнэкъокъу тыжьыныр къыщыфагъэшъошагъ. Дунаим и Кубок къыдэхыгъэным фэгъэхьыгъэ зэIукIэгъум джэрзыр къыщихьыгъ. Олимпиадэ джэгунхэм ахэхьэрэ спорт лъэпкъэу боксымкIэ Къыблэм изэнэкъокъу К. Морозовам дышъэр къыщыдихыгъ. КъокIыпIэм къыщежьэгъэ спорт лъэпкъхэмкIэ игъэхъагъэхэм ахегъахъо.
— Кристина Морозовам къиныгъохэр щыIэныгъэм щызэпичыгъэх, — къеIуатэ Адыгэ Республикэм изаслуженнэ тренерэу НэмытIэкъо Аскэр. — Шэуджэн районым иеджэпIэ-интернат икIэлэцIыкIугъо щыкIуагъ. Пшъашъэр ылъэ пытэу теуцонэу фежьи, спортым гукIэ зыритыгъ. Тиспорт еджапIэу N 2-м ипащэу Хъот Юныс, физкультурэмрэ дзюдомрэкIэ Институтым ипащэу Бгъуашэ Айдэмыр, нэмыкIхэу Кристина Морозовам IэпыIэгъу къыфэхъухэрэм лъэшэу тафэраз. Пшъашъэм лъэпкъ шэн-хабзэхэр зэрехьэх, гукIэгъу хэлъ.
— Адыгэ Республикэм имэфэкI мафэхэм сигуапэу сахэлажьэ, — къытиIуагъ Морозовам. —ЦIыфхэр зэфэнэгушIох. Урысыемрэ Адыгеимрэ якъэралыгъо быракъхэр тэгъэбыбатэх. Гъогу чыжьэ сызытехьэкIэ, Адыгэ Республикэм ибыракъ зыдэсэштэ. Спортышхом гъэхъагъэу щысшIырэр Адыгэ Республикэм, сикIэлэегъаджэхэм, тренерхэм афэсэгъэхьых.
К. Морозовам Китаим джэрзыр къызэрэщихьыгъэм тигъэгушIуагъ. Республикэм щапIугъэ пшъашъэм нэмыкI зэнэкъокъухэм зафегъэхьазыры.