Апэрэ адыгэ гъэсэгъэшхоу Нэгумэ Шорэ къызыхъугъэр илъэс 225-рэ мэхъу
Лъэпкъым къыхэкIыгъэ лIышIу
Адыгэ просветительхэу апэрэ шIэныгъэ бзыгъэр изыхыгъэхэу, гъэсэныгъэм игъогу шъуамбгъо лъэпкъым фыпхырыщыгъэнымкIэ Iофышхо зылэжьыгъэхэм яапэрэ сатырэ тет Нэгумэ Шорэ.
Зэман къин, зэман шIункI жъалымыгъ, адыгэ лъэпкъым ищыIэныгъэ дэкъацэм зыдэлъыгъ, зэо зэпымычыжьхэу къарашIылIэхэрэм адыгэхэм ашъхьэ къаримыгъэIэтэу, щыкIэгъабэу зыфэныкъохэри ашIомыIофыжьхэу, шъхьэехьыжьэжь-псэехьыжьэжьым зыхэтыгъэх; лъэпкъгъэкIодым зыкъызэрэIэпахыжьыщтым ыкIи зыкъызэраухъумэщтым нахь гупшысэ яIэжьыгъэп. Джа охътэ хьылъэм къыхэхъухьагъ акъылышхокIэ, гулъытэкIэ, шIэныгъэшхокIэ, чыжьэрыплъагъэкIэ Тхьэр къызэтэгъэгъэ Нэгумэ Шорэ. Ежь фэдабэм акъылкIэ зэрашъхьащыщырэр мыгъуащэу, ащ адыгэ лъэпкъыр зыфэныкъоу, анахьэу къызэтезыгъэнэщт лъэныкъо- хэм пасэу гу алъитэгъагъ.
«Емыджагъэр нэшъу» зыIогъэ адыгэхэм ягушъхьэлэжьыгъэ, ягубзыгъагъэ къызэтегъэнэнхэм фэшI гъэсэныгъэ-шIэныгъэр ягъэгъотыгъэн, апкъырылъхьэгъэн зэрэфаер зэхишIагъ.
Зэо-бэнэ тхьамыкIэгъо зэпымычыжьхэм лъэпкъыр алэжьагъэу, ацIыцIыгъэу ыгу ефэхыгъагъ. А лъэхъан къиным Нэгумэ Шорэ ежь ышъхьэкIэ илъэпкъ пкъы ыкIи шъхьэ зыфишIыныр фэукIочIыгъ. КъыгъэшIагъэр бэп, ау фызэшIокIыгъэр, уехъопсэнэу бэдэд: имафэ пэпчъкIэ щыIэкIэ-псэукIэр нахьышIу шIыгъэныр, цIыф жъугъэхэм къинэу ателъыр афигъэпсынкIэныр, шIункIым, гъогу къурпэным къытырищынхэшъ, нэфынэм фищэнхэр игупшысэ иныгъ, ыгъэхъагъэри нэбгыри 100-м е миным ашIэщтым зэхэтэу кIэхьэ ыкIи пеIэ. Нэгумэ Шорэ илъэхъан ицIыфышхоу зэрэщытым ар шыхьат фэхъу.
Нэгумэр илъэпкъ паекIэ зышъхьасыжьыгъэп; щыIэныгъэ гухэлъыбэу иIагъэхэм алъыкIуагъ, шIэныгъэ-гъэсэныгъэм илъэгъохэщыгъ, иухъумэкIуагъ. А охътэ чыжьэм чIыпIэ къин итыгъ адыгэ лъэпкъыр. Ау лIыгу, акъылрэ къулайрэ зиIэхэу адыгэхэм къахэкIыгъэхэм, Ш. Нэгумэм фэдэхэм, зи къатенагъэп, агу остыгъэу лъэпкъым фагъэблагъ. Нэгумэр ары гъэсэгъабэхэм апэрэу адыгэхэм шъхьафит ыкIи мамырны- гъэ щыIакIэр агъотынымкIэ тхылъыбзэр анахь мэхьанэ зиIэу зэрэщытыр кIэзыгъэтхъыгъэр; ежь ышъхьэкIи мы Iофышхохэм язэшIохын — кIэлэцIыкIухэр абзэкIэ егъэджэгъэнхэм, зэреджэщтхэ хьарыфылъэм изэхэгъэуцон, адыгэхэм ятарихъ итхын ыкIи ныдэлъфыбзэм играмматикэ изэхэгъэуцон, IорIуатэхэм яугъоижьын дэлэжьагъ, бзэхэр бэу зэришIэщтыгъэр, шIэгъошIу зэриIагъэр а зэкIэмкIэ лъэшэу къышъхьэпагъэх.
ИщыIэныгъэ ыкIи итворческэ гъогу
Нэгумэ Шорэ къызыхъугъэ илъэсыр тIэкIу зэтекIэу биографхэм къатхыми, анахь къыхэщыгъэр 1794-рэ илъэсым ар къуаджэу псыхъоу Джуцэ Iусыгъэм (джы п. Каменномостскэм пэчыжьагъэп) къызэрэщыхъугъэр ары. Шорэ ятэ ыцIагъэр Бэчмыз, ащ ятэжъ абдзахэщтыгъ, ау я ХVIII-рэ лIэшIэгъум Абдзахэр ащ ыбгыни, Къэбэр-тае кIожьыгъагъэ. Ятэжъ пIашъэм къытекIыгъэхэр тыжьын оркъхэу Къэбэртае къинэжьыгъагъэхэу аIоми, ежь Нэгумэ Шорэ унагъоу къызэрыхъухьагъэр баигъэп. Байхэм якIалэхэр еджакIо Урысыем икъэлэшхохэм агъакIощтыгъэх, ау ащ фэдэ амал Шорэ янэ-ятэхэм яIагъэп. КIэлэ дэдэу Шорэ Дагъыстан ит къуаджэу Эндери имедрысэ щеджэнэу агъэкIуагъ ыкIи молацIэр иIэу къыгъэзэжьыгъагъ. Ау молэ IэнатIэр псынкIэу ыгъэтIылъыжьыгъ. Ежь кIалэр зылъызыщэщтыгъэр шIэныгъэу тхылъхэм арытхэр ары. Iушыгъэ, сэнаущыгъэ ин хэлъыгъ, зэ зэхихырэр пытэу ышъхьэ риубытэщтыгъ. ШIэныгъэлэжь-гъэсагъэхэу Ш. Нэгумэр зышIэщтыгъэхэм къатхыжьы Шорэ арапыбзэр, персыбзэр, тыркубзэр, урысыбзэр, абэзабзэр ежьежьырэу къызIэкIигъэхьагъэхэу зэрэщытыгъэр. АщкIэ зишIуагъэ къэкIуагъэр медрысэр ары.
Шорэ къалэу къызщыхъугъэр щымыIэжь зэхъум, Пятигорскэ пэблагъэу щысыгъэ къуаджэм, етIанэ чылэу Хьадж-Къэбэкъ кощыжьыгъагъэх. Пятигорскэ дэжь чыристан диным изегъэушъомбгъун фэгъэзэгъэ цIыфхэр (миссионерхэр) колониеу Карасс зыфаIорэм щыпсэущтыгъэх, ахэм бзэ зэфэшъхьафхэмкIэ тхыгъэхэр, хэутыгъэ тхылъхэр яIагъэх, ахэри къышъхьэпагъэх къэбэртэе кIэлэкIэ чан Iушым; ишIэныгъэхэм зэрахахъорэм ыгъэгушIощтыгъ, бзэхэр зэрэIэкIэлъхэм Нэгумэ Шорэ илъэпкъэгъухэм къахигъэщыщтыгъ. Кавказ линием икомандование Шорэ ынаIэ къытыредзэ, зэдзэкIакIоу егъэнафэ.
1818-рэ илъэсым къыщегъэжьагъэу урыс командованием къулыкъу фешIы. Ыпшъэ къыралъхьэрэр дэгъу дэдэу сыдигъуи зэшIуихыщтыгъ, ащ готэу, урысыбзэр нахь куоу зэрэзэригъэшIэщтым сыдигъуи пылъыгъ. Тхылъхэм бэу яджэ ыкIи нэмыкIыбзэхэр нахь зэрэзэригъэшIэщтхэми дэшъхьахырэп, усэхэр ахэмкIэ зэредзэкIых. Илъэси 10-рэ дзэ къулыкъур щытхъу хэлъэу зихьыгъэ уж ащ зэпыупIэ фэхъу. 1828 — 1829-рэ илъэсхэм Шорэ Налщык кIэлэцIыкIухэр урысыбзэмрэ тыркубзэмрэкIэ щырегъаджэх.
1830-рэ илъэсым Нэгумэ Шорэ дзэ къулыкъум педзэжьы. Кавказскэ-Горскэ полуэскадроным илейб-гвардие иIэшэзехьэу Шорэ Петербург къулыкъур щырегъэжьэжьы. Дзэ пшъэрылъхэр чанэу егъэцакIэх, зэо хьылъэхэми ахэлэжьэн фаеу мэхъу, лIыхъужъныгъэблэнагъэу къыхэфагъэм дзэ щытхъуцIэхэр ыкIи Урысыем инаградэ инхэр — Шыихъэу Георгий иорденэу я V-рэ шъуашэр зиIэр, ащ ыуж дышъэ медалэу «За усердие» зыфиIорэр къыратыгъэх.
Дзэу зыхэтыр чIыпIэу зыдагъакIорэм епхыгъэу Нэгумэ Шорэ Iоф зэфэшъхьафхэри зэшIуихыщтыгъэх, зэ Петербург, зэ Къэбэртае, зэ Тифлис ащыпсэущтыгъ. Ау тыдэ зыщэIи, сыд пшъэрылъ ин зыфагъази ыгу имыкIэу илъыгъэр илъэпкъ епхыгъэ гухэлъыр ары, иныдэлъфыбзэ-тхылъыбзэ ыкIи ащ ибзэ-хабзэхэр зэрэзэхигъэуцощтхэр ары. А мурадыр нахь къэзыгъэпсынкIагъэр 1832-рэ илъэсым офицерыцIэр къызыратыр ары, ежь изакъоу исынэу, щеджэнэу, щыгупшысэнэу фэтэр джащыгъум ыубытыгъагъ. Петербург щыпсэугъ, тхэн-еджэн Iофыгъохэр щызэшIуихыгъэх, зэдзэкIын Iофыри дэгъоу къыIэкIэхьэгъагъ. Мы лъэхъаным Нэгумэ Шорэ Урысые Академием хэтэу Ф. Шармуа нэIуасэ фэхъу, адыгабзэм ибзэ-хабзэхэм язэхэгъэуцонкIэ мызэу, мытIоу нэбгыритIур гущыIэгъу зэфэхъух.
Тифлис Шорэ загъакIом, ащ адыгабзэм ибзэ-хабзэу ежь къыхихыгъэм академикэу А. Шегрен нэIуасэ фешIы. НэмыкI чIыпIэхэми къэбэртэябзэм ибзэ-хабзэхэр зэрэптхын фаем игъэкIотыгъэу ащытегущыIэх, зэупчIыжьых.
1837-рэ илъэсым къэбэртэябзэм ибзэ-хэбзэ кIэкI зэрэхаутыщтым ыуж ехьэ Нэгумэ Шорэ, 1843-рэ илъэсым тхылъым хэплъэжьы, кIешIыкIыжьы, ащ тыригъэгущыIэнхэу 1844-рэ илъэсым Петербург макIо, сымаджэ щэхъу.
Нэгумэ Шорэ итхылъхэр хаутыгъэу къылъэгъужьыныр инасып къыхьыгъэп, 1844-рэ илъэсым, мэкъуогъум и 10-м (22) Нэгумэ Шорэ дунаим ехыжьыгъ.
ШIэныгъэлэжьхэм ятхыгъэхэм къызэрэщаIорэмкIэ, Шорэ зыщагъэтIылъыгъэр Петербург, ау икъэ джынэс къагъотын алъэкIыгъэп. Нэгумэ Шорэ джащ фэдэу ятацIэр дзэ къулыкъур ыхьы зэхъум зэхагъэкIуакIи, ылъэкъуацIэу ашIи, Шора Бекмурзин хъугъэ, ежь ылъэкъоцIэ шъыпкъагъэр — Нэгумэр къырамытыжьызэ, ащ кIэлъэIоу лъэIу тхылъ ытхыгъагъэми, дунаим ехыжьыгъ. ЗыщымыIэжьым мэзибгъу тешIагъэу Шорэ ылъэкъоцIэ шъыпкъэр иеу къэзыушыхьатырэ тхылъыр Кавказскэ-Горскэ полуэскадроным къыIэкIэхьажьыгъ.
Нэгумэ Шорэ иакъыл-гулъытэ, игубзыгъагъэ щэIэфэ лъэпкъым ищыIэныгъэ нахьышIу шIыгъэным фигъэшъошагъ, адыгэхэм якультурэ, ягъэсэныгъэ, яшIэныгъэ зэрэлъыкIотэщтхэм ыкIи зэриухъумэщтхэм мыпшъыжьэу фэбэнагъ. Нэгумэ Шорэ иIофшIэгъэ инхэу «История адыгейского народа» ыкIи «Филологические труды» зыфиIохэрэр хэгъэгу ыкIи кавказ шIэныгъэм чIыпIэшхо ащызиIэх.
Мамырыкъо Нуриет.