Адыгэ Республикэм и Лъэпкъ театрэу Цэй Ибрахьимэ ыцIэ зыхьырэм «Сомэ мин 600» зыфиIорэ спектаклэр къыщагъэлъэгъуагъ.

А. шэртанэм ытхыгъэм техыгъэ спектаклэр режиссерэу А. Хьакъуим ыгъэуцугъ. Мыекъуапэ дэсхэр, тирайонхэм къарыкIыгъэхэр къэгъэлъэгъоным ягуапэу еплъыгъэх.

Артистхэу КIыкI Юрэ, Уджыхъу Марыет, Кушъу Светланэ, Зыхьэ Мэлайчэт, КIэмэщ Разыет, Тхьаркъохъо Теуцожь, Джолэкъо Рэщыдэ, Болэкъо Адамэ рольхэр къашIыгъэх. Джымэ Заремэ хъулъфыгъабэ зэпсэлъыхъорэ пшъашъэм ироль фэгъэзагъэу щытыгъ.

ШIулъэгъум дихьыхыгъэхэм, унагъом игъэпытэн афэгъэхьыгъэ къэгъэлъэгъоным ехьылIэгъэ пьесэм уегъэщхы, щыIэныгъэм илъэныкъохэр нахьышIоу къыбгурегъаIох. Артисткэу Джымэ Заремэ къэшъуакIоу ансамблэу «Мыекъуапэ инэфылъэхэм» хэтыгъ, джы артисткэ дэгъу хъугъэу тэлъытэ. IупкIэу мэгущыIэ, ролым икупкI лъэIэсы.

О, си Тхь, къысфэгъэгъу!», «Дэхэбаринэ ихьакIэщ» зыфиIорэ къэгъэлъэгъонхэр чъэпыогъум и 25-м ыкIи и 29-м Лъэпкъ театрэм щыкIощтых.

ЕмтIылъ Нурбый.