«АГУ-Адыиф» Мыекъуапэ – «Луч» Москва – 29:27 (14:14). Чъэпыогъум и 19-м спорт Унэшхоу Кобл Якъубэ ыцIэ зыхьырэм щызэIукIагъэх. Зезыщагъэхэр: Алина Казанцева, Кристина Казанцева.

«Адыиф»: къэлэпчъэIутхэр: Баскакова, Кожубекова, ешIакIохэр: Краснокутская – 4, Зубова – 2, Дмитриева – 3, Загайко – 4, Дьяченко – 3, Кобл – 7, Серадская – 1, Кириллова – 4, Дворцевая – 1.

Урысыем и Кубок къыдэхыгъэнымкIэ финалым и 1/8-м «Адыифыр» «Лучым» щыIукIагъ. ТекIоныгъэр зышIуахьырэр зэнэ­къокъум къыхэзы. Ар къыдалъы­тэзэ, командэхэр яшъыпкъэу зэдешIагъэх. «Адыифым» яIэпэ­IэсэныгъэкIэ къыхэщыгъэх Кобл Зурет, Анастасия Загайко, Елизавета Краснокутскаяр, Ксения Дьяченкэр, нэмыкIхэри.

«Адыифыр» текIоныгъэм нахь пэблэгъагъ. Кобл Зурет гупчэм итэу ухъумакIохэм апхырыкIызэ псынкIэу къэлапчъэм екIущтыгъ, Iэгуаор хъагъэм ридзэщтыгъ. «Лучым» иешIакIохэр З. Коблым къыпэуцущтыгъэх, ау зэтыраIэжэн алъэкIыщтыгъэп.

Елизавета Краснокутскаям тигъэгушIуагъ. ОшIэ-дэмышIэу ыпэкIэ илъызэ ухъумакIохэр къы­зэренэкIых, хъагъэм Iэгуаор редзэ. Анастасие тикъэлапчъэ щыригъажьэзэ, «Лучым» иешIа­кIохэр пхъашэу къыпэуцунхэу игъо имыфэхэзэ хъагъэм Iэгуаор зэрэридзэрэр шIушIагъэу фэтэлъэгъу.

Анастасия Загайко «Адыифым» анахь дэгъоу щешIагъэу зэхэщакIохэм къыхахыгъ, хэушъхьафыкIыгъэ нэпэеплъ шIухьафтын фашIыгъ. А. Загайко IапшъэкIэ къэлапчъэм Iэгуаор зэрэди­дзэрэм мэхьэнэ ин етэты. Ухъу­ма­кIохэр ыпашъхьэ щытхэу лъхъан­чэу Iэгуаор едзышъ, пчъа­гъэм хегъахъо.

Къэгъагъ Iэрамым фэдэу «Адыифыр» ешIагъ. Гандболыр спорт къызэрыкIоу зэрэщымытыр къы­гъэлъэгъоныр къыдэхъугъ. Гупчэм пхырыкIынхэр, лъагэу дэпкIэенхэшъ, Iэгуаор адзыныр, ошIэ-дэмышIэу бэрэ ыпэкIэ илъынхэр, нэмыкI амалхэри зэрагъэфедагъэхэм ишIуагъэкIэ «Адыифым» текIоныгъэр къыдихыгъ.

Пресс-зэIукIэр

«Лучым» итренер шъхьаIэу Алексей Жаворонковым зэри­лъытэрэмкIэ, Москва икомандэ текIоныгъэр къыдихын ылъэкIыщтыгъэ. Кубокым фэгъэхьыгъэ зэнэкъокъум къыхэзыгъэми, «Лу­чыр» ауж къинэхэрэм бэрэ ахэтынэу фаеп, Урысыем изэIукIэгъухэм нахь чанэу ахэ­лэжьэщт.

«Адыифым» итренер шъхьаIэу Александр Реввэ типшъашъэхэм ащыщхэр зэрэсымаджэхэм къы­хэкIэу ешIэгъур къин къафэ­хъугъэу къыIуагъ. Кубокым икъы­дэхын «Адыифыр» фэхьазырэп, хэгъэгум изэнэкъокъу нахь чанэу хэлэжьэным пылъыщт. «Адыифым» изичэзыу ешIэгъухэр Ижевскэ, Уфа, Тольятти ащыкIощтых.

Сурэтхэм арытхэр: «Адыифыр» «Лучым» дешIэ; Анастасия Загайко.