Гуетыныгъэ ин ашIэрэм фыряI
Адыгэ Республикэм ит тхылъеджапIэхэм гъэсэныгъэ-пIуныгъэ дэгъу къыткIэхъухьэхэрэм агъотынымкIэ, ныбжь зэфэшъхьафхэм арытхэр щыIэкIэ-псэукIэм хэхъухьэрэ пстэумэ нахь апэблагъэ шIыгъэнхэмкIэ сыдигъуи зэралъэкIэу Iоф ашIэ.
Джы лъэпкъ проектэу «Культурэм» ишIуагъэкIэ ахэм ащыщхэм гъэцэкIэжьын-гъэхьазырын IофшIэнышхохэр зыщыкIохэрэр ахэтых, джыри зэ къыхэтэгъэщы, Адыгеим модельнэ шапхъэм ит тхылъеджэпIищ къызэритэджагъэр.
Зигъо Iофыгъом ипхырыщын зэнэкъокъу шIыкIэм тетэу макIо.
Мы илъэсымкIэ Урысые Федерацием исубъект 78-мэ къаратхыкIыгъэ лъэIу тхылъ 500-м нахьыбэ зэнэкъокъум хэлэжьэнхэмкIэ къатыгъагъ. Ахэм ащыщэу субъект 52-м ятхылъеджэпIи 110-м къыхэхыгъом текIоныгъэр къыщыдахыгъ. 2020-рэ илъэсым ахэр охътакIэм диштэрэ гъэсэныгъэ ыкIи шIэныгъэ гупчэ хъущтых. Адыгэ РеспубликэмкIэ зэнэкъокъум пае къыхэхыгъом муниципальнэ тхылъеджэпIи 8 хэлэжьагъ, ахэр къалэу Мыекъуапэ, Джэджэ, Красногвардейскэ, Теуцожь, Кощхьэблэ ыкIи Тэхъутэмыкъое районхэм арытхэр арых.
АдыгеимкIэ текIоныгъэр къыдэзыхыгъэхэр тхылъеджэпIитIу: Красногвардейскэ гупчэ тхылъеджэпIэ системэмкIэ Хьатикъое къоджэ тхылъеджэпIэ-къутамэу N 16-мрэ муниципальнэ образованиеу «Къалэу Мыекъуапэ» и ЦБС культурэмкIэ иIофшIапIэу къэлэ кIэлэцIыкIу тхылъеджапIэмрэ.
Урысые Федерацием культурэмкIэ и Министерствэ къызэритырэмкIэ, модельнэ муниципальнэ тхылъеджапIэхэм ягъэпсын ыкIи ахэм шIуагъэ къатэу, яIофшIэн дэгъугъэ шапхъэ егъэгъотыгъэным апэIуагъэхьанэу федеральнэ мылъкоу сомэ миллион 700 къатIупщыщт. Ащ ихьатыркIэ унэхэр агъэцэкIэжьынхэ ыкIи агъэкIэжьынхэ, фондхэм хэгъахъо афашIын, тхылъеджэпIэ зэтегъэпсыхьэгъэ гупчэхэу, Интернетым епхыгъэхэу къэралыгъо информационнэ системэу «Лъэпкъ электроннэ тхылъеджапIэм» хэуцонхэр афэукIочIыщт.
ТхылъеджапIэхэу текIоныгъэр зэнэкъокъум къыщыдэзыхыгъэхэу модельнэ шапхъэр зэзыгъэгъотыщтхэм федеральнэ бюджетым къикIэу сомэ миллиони 5 зырыз къаратыщт.
Ащ фэшъхьафэу, чIыпIэ бюджетми ащ ипроценти 10 фэдиз къафыхигъэхъощт. Анахь шIагъор тхылъеджапIэхэм яамал- лъэкI а зэкIэми хэпшIыкIэу къызэраIэтыщтыр ары.
(Тикорр.).