«АГУ-Адыиф» Мыекъуапэ — «Луч» Москва — 29:22 (14:13). Чъэпыогъум и 18-м спорт Унэшхоу «Кобл Якъубэ» зыфиIорэм щызэдешIагъэх. Зезыщагъэхэр: Алина Казанцева, Кристина Казанцева. «Адыиф»: къэлэпчъэIутхэр: Кожубекова, Баскакова; ешIакIохэр: Серадская — 4, Краснокутская — 1, Мо­розова, Дмитриева — 2, Дьяченко — 5, Кобл, Никулина, Зубова — 2, Куцевалова Ангелина, Кириллова — 3, Дворцевая — 6, Загайко — 6.

ЗэIукIэгъум пчъагъэр зэрэщылъыкIуатэрэм тигъэгумэкIэу, тигъэгушIоу къыхэкIыгъ: 2:0, 4:3, 5:4, 6:6, 8:8, 9:9, 9:10. Къэла­пчъэм Iэгуаор дэзыдзэхэрэм Анастасия Загайко, Ксения Дьяченкэр, Алиса Дворцеваяр, Анастасия Серадскаяр нахь ­къа­хэщыщтыгъэх. А. Загайко IапшъэкIэ лъхъанчэу ыкIи ошIэ-­дэмышIэу Iэгуаор къэлапчъэм дедзэ. К. Дьяченкэм лъэшэу ыдзырэ Iэгуаор къэлэпчъэIутым къызэкIидзэжьыныр къехьылъэкIы. З. Коблым псынкIэу ыпэкIэ ыдзырэ Iэгуаор К. Дьяченкэм «къегъоты», Ксение хъагъэм Iэгуаор редзэ.

«Адыифым» иешIакIэ кIэу хэт­лъагъорэр къэлэпчъэIутым Iэгуаор псынкIэу ыпэкIэ зэридзырэр, къэлапчъэм Iэгуаор дэзыдзэн зылъэкIыщтыр ешIапIэм зэ­ритыр ары. Жьы зы­кIэт ешIакIэр къэмыгъотэу непэ гандболым текIоныгъэр къыщыдэпхын плъэ­кIыщтэп.

А. Голиковам, К. Хватовам, А. Пуленкэм, А. Борисовам, нэмыкIхэм тиухъумакIохэр бэрэ агъэгумэкIыщтыгъэх. Арэу щытми, тэ тифедэу пчъагъэр лъы­кIуатэщтыгъ: 15:13, 16:16, 19:16. Кирилловам пенальтир дэгъоу егъэцакIэ — 21:17. А. Дворцеваяр ухъумакIохэм апхырэкIы, хъагъэм Iэгуаор редзэ — 22:17. К. Дьяченкэм гъогогъуищэ къэлапчъэм Iэгуаор дедзэ, 25:19. ТикъэлэпчъэIутэу Л. Баскаковар цыхьэшIэгъоу ешIэ, бэрэ Iэгуаор къызэкIедзэжьы. ТиешIа­кIохэр ащ егъэгушхох, апэкIэ лъэкIуатэх. Зэхэщэн Iофыгъохэр дэгъоу агъэ­цакIэхэзэ А. Двор­цеваям, А. За­гайко хъагъэм Iэгуаор радзэ, пчъагъэр — 28:21, къэнагъэр такъикъищ…

Пресс-зэIукIэр

ЕшIэкIо анахь дэгъухэу къыхахыгъэхэ Ксения Хватовамрэ Людмила Баскаковамрэ «Адыифым» ипащэу Къудайнэт Мэ­джыдэ афэгушIуагъ, нэпэеплъ шIухьафтынхэр аритыжьыгъ.

«Лучым» итренер шъхьаIэу Александр Жаворонковым, ешIа­кIоу Ксения Хватовам къаIуагъ текIоныгъэр къыдахыным яцыхьэ телъэу Мыекъуапэ къызэрэкIуагъэхэр. «Лучым» иухъумакIохэр «Адыифым» иешIакIэ икъоу пэуцунхэ алъэкIыгъэп.

«Адыифым» итренер шьхьаIэу Александр Реввэ къыIуагъ ти­пшъашъэхэр ныбжьыкIаIох нахь мышIэми, апэ ит команди 8-мэ ащыщ хъунхэм зэрэфэбанэхэ- рэр. IэпэIэсэныгъэм гуетыныгъэр игъусэу тапэкIи ешIэщтых.

«Адыифым» мыгъэ апэрэ те­кIоныгъэр къыдихыгъ, ыпэкIэ лъы­кIотэнэу фэтэIо.

Сурэтхэм арытхэр: «Адыифым» иешIакIохэу Ксения Дья­ченкэр, Людмила Баскаковар, Алиса Дворцеваяр; «Адыифыр» «Лучым» дешIэ.