Лъэпкъ проектэу «Культурэм» къызэрэдилъытэу, 2019-рэ илъэсымкIэ зэнэкъокъум текIоныгъэ къыщыдэзыхыгъэ тхылъеджапIэхэр арых модельнэ шапхъэр зыгъотыхэрэр.

Адыгеим джырэкIэ ащ фэдэу мы илъэсым ичъэпыогъу мазэ 2 щагъэ­псыгъ: Джэджэ районымкIэ станицэу Дондуковскэм имодельнэ тхылъеджэпIэ- къутамэу N 4-р ыкIи къалэу Мыекъуа­пэкIэ тхылъеджэпIэ-къутамэу N 1-р — урамэу Курганнэм тетыр.

Джыри ахэм зы къахэхъо, ар чъэпыогъум и 18-м къуаджэу Кощхьаблэ къыщызэIуахыгъ. ИскусствэхэмкIэ кIэлэцIыкIу еджапIэм иунэ чIэт кIэлэцIыкIу тхылъеджапIэр ары ащ лъапсэу иIэр.

2019-рэ илъэсым модельнэ тхылъ­еджапIэхэр къызэIухыгъэнхэм пэIуагъэ­хьанэу федеральнэ ыкIи республикэ бюджетхэм мылъкоу къатIупщыгъэм муниципальнэ образованиеу «Кощхьэблэ район» зыфиIорэм сомэ мин 600 хилъхьагъ.

Ахъщэр тхылъеджапIэм иматериальнэ-техническэ зытет гъэкIэгъэным пэIухьагъ: кIэлэцIыкIухэм ыкIи Iэта­хъом апае псэолъакIэхэу ящыкIагъэхэр зэрагъэгъотыгъэх, техникэу агъэфедэщтыр ащэфыгъ – тхылъ фондыр экземпляр 2850-кIэ агъэкIэжьыгъ. ТхылъеджапIэм иIофышIэхэм яшIэныгъэхэм курсхэм ащахагъэхъуагъ. НэмыкIэу къэпIон хъу­мэ, модельнэ шапхъэм диштэу тхылъеджапIэр агъэпсыгъ, информацие-культурэ шъолъырым итэу, охътакIэм диштэу Iоф ышIэным фэхьазыр.

Модельнэ тхылъеджапIэхэм ягъэхьазырын-къызэIухын къыгъэпсынкIагъ ащ Урысые къэралыгъо тхылъеджапIэм иIофышIэхэу А. С. Шинко ыкIи В. В. Дьяченкэр зэрэхэлэжьагъэхэм.

(Тикорр.).