«Улапэ сэркIэ Париж»
УсакIом фэгъэхьыгъэ пчыхьэзэхахьэ къуаджэу Улапэ игурыт еджапIэ щызэхащэгъагъ.
Зэхахьэм хэлэжьагъэх гуманитар ушэтынхэм апылъ Адыгэ республикэ институтым ишIэныгъэлэжьхэр, тхакIохэр, сурэтышIхэр, иIахьылхэр, къуаджэм инахьыжъхэр, культурэм иIофышIэхэр, кIэлэегъаджэхэр, кIэлэеджакIохэр, журналистхэр.
Пчыхьэзэхахьэр пэублэ гущыIэкIэ къызэIуихыгъ ыкIи зэрищагъ къуаджэм иветеранхэм я Совет итхьаматэу ЛIыунэ Аслъан. КъумпIыл Къадырбэч цIыфхэм афэхьалэлэу, ыгу афызэIухыгъэу, Iэдэбышхо хэлъэу зэрэщытыгъэр, къоджэдэсмэ шъхьэкIэфэшхо зэрэфашIыщтыгъэр, усакIом гъэшIэшхо имыIагъэми, лъэуж дахэ къызэригъэнагъэр ащ къыIуагъ.
Къоджэ псэупIэм ипащэу Гъубжьэкъо Тимур гущыIэр зыратым, Къадырбэч ишIу пIотэныр къылэжьыгъэу зэрэщытыр, ар илъэс щэкIырэ Адыгэ автоном хэкумкIэ къэралыгъо шъэфхэр хэутыным къыщыухъумэгъэнхэм лъыплъэщтыгъэ отделым зэрэщылэжьагъэр, ыужырэ илъэсипшIым отделым ипащэу Iоф зэришIагъэр къыIуагъ. Ежь къытхэмытыжьми, итхыгъэхэр непэ зэрэтигъусэхэр къыхигъэщыгъ. Нэужым Къадырбэч зышIэщтыгъэ хьакIэу пчыхьэзэхахьэм къеблэгъагъэхэмрэ къуаджэм иупчIэжьэгъу нахьыжъэу къекIолIагъэхэмрэ афэразэу «тхьашъуегъэпсэу» къариIуагъ.
Республикэм лъытэныгъэшхо зыщыфашIырэ Дзыбэ Кимэ ипсалъэ щыхигъэунэфыкIыгъ КъумпIыл Къадырбэч зыщылэжьэгъэ ыкIи зыщыпсэугъэ лъэхъаным цIыфхэм шIошъхъуныгъэ зэряIагъэр, усакIор адыгэ лъэпкъэу къызхэкIыгъэм шъыпкъагъэкIэ зэрэфэлэжьагъэр, ар лIэшIэгъуищми щысэтехыпIэу къызэрахэнагъэр.
— Тхылъэу мы къэгъэлъэгъоным тетхэм къагъэнафэ ащ илъэпкъ, ихэку ыгъэдахэу зэрэпсэугъэр. Непэ Улапэ зэдеIэжьныгъэ-зэфыщытыныгъэу дэлъыр, районым илъыр къызыпкъырыкIырэр цIыф щысэтехыпIэхэр бэу зэрэтиIэхэр ары. Зэфагъэу, шъыпкъагъэу хэлъыгъэмкIэ Къадырбэч щысэтехыпI, — къыIуагъ ащ.
Лъэныкъо пстэумкIи тхакIом игугъу шIукIэ къышIыгъ икъоджэгъоу ХьацIыкIу Нухьэ. Ащ анахьэу ынаIэ зытыридзагъэр Къадырбэч узэхъопсэн цIыфыгъэ зыхэлъыгъэр, адыгэлIэу зэрэщытыгъэр ары.
— Чылэм ихъяри икъини къыддиIэтэу ренэу къытхэтыгъ, лъэгъупхъагъэ, IэпкIэ-лъэпкIагъ, шэн дахэ иIагъ. Иусэхэр къыткIэхъухьэрэ ныбжьыкIэхэмкIэ щысэшIух, мары непэ тиеджакIомэ агъэжъынчэу къаIох, ащ сыд ымыуас? Арышъ, тщыгъупшэщтэп. ЦIыф зэфагъ, лIы- гъи хэлъыгъ, — къыIуагъ ащ.
Нэужым гущыIэр зэратыгъэ Дзыбэ Аслъан къызэриIуагъэмкIэ, Къадырбэчрэ ежьыррэ зэдеджагъэх, щэIэфэ зэIукIагъэх, зэлъыкIуагъэх. Ащ узэрэIукIагъэм укIигъэгушIужьыщтыгъ, дахэу къыппэгъокIын, къыбдэзекIон ылъэкIыщтыгъ. ЦIыф шIэгъуагъ, ныбджэгъухэмкIэ хьалэлыгъ, зэфагъэ. Акъыл зыхэпхын псалъэ фэшъхьаф къыIушIыкIыщтыгъэп, цIыф рэхьатыгъ, ащ ищытхъу пIо зэпытыгъэми уухыщтэп, жъи, кIи ыгъэшIон ылъэкIыщтыгъ.
КъумпIылхэм яблагъэу Фэдз щыщэу Атэжьэхьэ Аслъан гущыIэр зыратым, къыIуагъ: «Зэблагъэ тызыхъугъэм щегъэжьагъэу лIакъом щыщхэм шъхьэкIэфэныгъэ къыддызэрахьэ. Тэри тырэгушхо КъумпIыл Къадырбэч фэгъэхьыгъэ зэхахьэхэр зэрэзэхащэхэрэм, къылэжьыгъэм игугъу дахэкIэ зэрашIырэм. Ар опсэуфэ илъэпкъ фэлэжьагъ, фэусагъ». КъумпIыл лIакъом тапэкIи хэхъоныгъэхэр ышIынхэу, бэгъонхэу къафэлъэIуагъ.
Пчыхьэзэхахьэм изещэн лъигъэкIотагъ къоджэ тхылъеджапIэм иIофышIэ чанэу Гъубжьэкъо Фатимэ. Дунаеу тызытетым гухахъо хэдгъотэным, щыIэныгъэм уасэ фэтшIыным, тиIофшIэн тегугъуным, тиныбжьыкIэхэм гъэсэныгъэ-пIуныгъэ тэрэз яIэным, шIуагъэ къытэу цIыф пэпчъ зэрэпсэун фаем усэкIошхом итхыгъэхэмкIэ тафещэ. Къадырбэч къыгурыIощтыгъ, ышIэщтыгъ гущыIэр щыIэныгъэм ылъапсэу зэрэщытыр, ащ уиукIыни, уиIэтыни, уигъэшIони иамал къызэрихьырэр. Тыбзэ ибаиныгъэ, ащ идэхагъэ къизыIотыкIырэ ыкIи шIулъэгъоу афыриIэр къызхэщырэ усэхэр ытхыгъэх. Къадырбэч иусэхэм арылъэу орэд макIэп тикомпозиторхэм атхыгъэр. Ахэм ащыщых «Адыгэ хэку», «Улапэ сэркIэ Париж», «ЦIыфыр цIыфы зышIырэр IофшIэн», «О утыгъ, сэ сытыгъэгъаз», нэмыкIхэри.
КъумпIыл Къадырбэч иусэу «Улапэ сэркIэ Париж» зыфиIорэмкIэ зэхахьэр къызэIуахыгъ. Орэдыр къэзыIуагъэр Хьаджымэ Марзият, пщынэм къезыгъэIуагъэр Дэкъщакъо Лен. «Адыгэ хэку» зыфиIорэ орэдыр ыгъэжъынчыгъ Абэсэ Долэт.
Видео шIыкIэм тетэу Тхьайшъэо Сарэ усакIом фэгъэхьыгъэ псалъэу къышIыгъэм цIыфхэр ягуапэу едэIугъэх. Джащ фэдэу «Орырэ сэрырэ» зыфиIорэ усэу Къадырбэч ытхыгъэм, ащ икъорэлъфэу КъумпIыл Тахьир къызэреджэрэм ыумэхъыхэу едэIугъэх.
ПIуныгъэмрэ гъэсэныгъэмрэ зиIахьышIу ахэзылъхьэрэ кIэлэегъаджэу Шэуджэн Джантыгъэ усакIом итворчествэ гуфэбэныгъэ хэлъэу къытегущыIагъ, ипоэтическэ гупшысакIэ икъэкIопIэ шъхьаIэхэм ным иобраз зэращыщыр хигъэунэфыкIыгъ. Усэхэу «Сятэ исурэт», «Тятэ фэсэтхы» зыфиIохэрэри анахь кIуачIэ зиIэ усэхэу зэрэщытхэм къыкIигъэтхъыгъ. КIэлэеджакIохэу Нэгъой Адэлбыйрэ Пчэнэшэ Залинэрэ IупкIэу Къадырбэч иусэхэм къяджагъэх.
ГущыIэ шъхьаIэ зэхахьэм къыщишIыгъ институтым литературэмкIэ иотдел ипащэу, филологие шIэныгъэхэмкIэ докторэу, тхакIоу, усакIоу ЩэшIэ Щамсэт. Къадырбэч адыгэ литературэм иIахьышхо хэзылъхьагъэмэ зэращыщыр, усэу, поэмэу ытхыгъэхэм уасэ зэрафашIырэр, ахэр тиныбжьыкIэмэ агукIэ зэраштагъэхэр, акъыл зыхагъотэн гупшысэхэр къызэрэтфыщинагъэр къыIуагъ.
Филологие шIэныгъэхэмкIэ докторэу, профессорэу, литературоведэу ыкIи критикэу Мамый Руслъанэ ипсалъэ зыфэгъэхьыгъагъэр, ежь Къадырбэч усэхэр зэритхыщтыгъэм имызакъоу, нэмыкI цIыф лъэпкъхэм ащыщ усакIохэм яусэхэр адыгабзэкIэ зэдзэкIыгъэнхэми зэрэдэлэжьагъэр ары.
ЗэлъашIэрэ сурэтышIэу, тхакIоу Къат Теуцожь зэхэсыгъом къекIолIагъэхэм игуапэу шIуфэс псалъэкIэ закъыфигъазэзэ, къуаджэу Улапэ бэрэ къызэрэдэхьагъэр, Къадырбэч тхылъэу къыдигъэкIыгъэр зэкIэ, пшIым ехъурэр, сурэтхэмкIэ зэригъэкIэрэкIагъэр къыIуагъ. «УсакIомрэ сэрырэ тызэгурыIоу, тызэдиштэу тызэдэлэжьагъ. Иллюстрациеу иусэхэм афэсшIыгъэхэр зэкIэ философскэ- лирическэ мэхьанэ къарыкIэу гъэпсыгъэх. УсакIор зэриныбджэгъугъэр, ышнахьыкIэм фэдэу къызэрэфыщытыгъэр, гъэсэпэтхыдэу къыриIуагъэр зэрэбэр, непэ къызнэсыгъэм дахэкIэ ыгу къызэринэжьыгъэр, ишъхьэгъусэу Светэрэ ежьыррэ унэгъо дахэ зэрэзэдашIагъэр, кIэлэ шIагъохэр зэрапIугъэхэр, къорэлъфхэр зэряIэхэр, ухигъэплъыхьанэу зэрэцIыфышIу-хьалэлыгъэр, лIыгъэ зэрэхэлъыгъэр, цIыфхэм яшIэжь дахэкIэ укъыхэнэныр IэрымышI сын зыфэзыгъэуцужьыгъэм зэрэфэдэр къыIуагъ.
УсакIом фэгъэхьыгъэ игукъэкIыжьхэмкIэ къадэгощагъ иIахьылэу Хъунэ Рыкъуят. Къадырбэч дунаим еплъыкIэ шIагъо зэрэфыриIагъэр, ащ иIахьылхэми, икъоджэгъухэми шIур апигъохэу зэрэщытыгъэр, зэрэцIыф гупцIэнагъэр ынэгу зэрэкIэтыр, ащ иусэ пэпчъ пIоми хъунэу адыгэ IорыIуатэмрэ тарихъымрэ зэракIэбзагъэр Рыкъуят ипсэлъэ зэгъэфагъэ къыщыхигъэщыгъ.
КъумпIыл Къадырбэч ыкъохэу Маратрэ Тимуррэ кIэлэеджакIохэу хэлэжьагъэхэм шIухьафтынэу къафащэгъэ тхылъхэмрэ фотоальбомхэмрэ аратыгъэх. Нэужым тиныбжьыкIэхэм зэхахьэр къагъэбжьышIоу «Лъэпэрышъор» къашIыгъ.
ШIэныгъэлэжьэу ЩэшIэ Щамсэт усакIом фэгъэхьыгъэ литературнэ музей къоджэ гурыт еджапIэм къыщызэIухыгъэн зэрэфаер къызеIом, къекIолIагъэхэм игъоу алъытагъ.
Пчыхьэзэхахьэр шъуашэу зезыщэгъэ ЛIэунэ Аслъан Къадырбэч ишъхьэгъусэу Светланэ гущыIэ фабэхэр риIозэ къэгъэгъэ Iэрам ритыгъ. КъумпIыл лIакъом ыцIэкIэ усакIом ышэу Юрэ гущыIэр зыретым, лыузымрэ гукIэгъумрэ къыхэщэу Къадырбэч фэгъэхьыгъэ пчыхьэзэхахьэм къекIолIагъэхэм, зэхэщакIохэм, зэкIэ хэлэжьагъэхэм «тхьашъуегъэпсэу» къариIуагъ.
ШэкIо Мир. ШIэныгъэлэжь.