Анахь дахэр къыхахыщт

Шъолъыр фестиваль-зэнэкъокъоу «Адыгэ пшъашъэр» Адыгэ Республикэм и Къэралыгъо филармоние чъэпыогъум и 23-м щыкIощт.

Адыгэ Республикэм культурэмкIэ и Министерствэрэ рес­публикэм лъэпкъ культурэмкIэ и Гупчэрэ фестиваль-зэнэкъокъур зэхащэ. Къалэу Мыекъуапэ, районхэм япэшIорыгъэшъ зэIукIэгъу­хэм къащыхахыгъэхэ пшъашъэхэр кIэух зэхахьэм хэлэжьэщтых.

Пшъашъэхэр едзыгъуи 5-м щызэнэкъокъущтых. «Хабзэр —лъапсэ», «СилIакъу — силъэпкъ», «Сэнаущ зэнэкъокъу», «Адыгэ шхынхэр» зыфиIохэрэм ащыте­кIуагъэхэр къыхагъэщыщтых. «Пшъэшъэ тхьаматэр» кIэух зэIу­кIэгъоу зэхэщакIохэм алъытэ. Пшъэшъэ дахэхэм анахь дэхэжьэу къыхахыщтым щытхъуцIэ шъхьаIэр фагъэшъошэщт.

Анахь гъэшIэгъон хъущт зэнэ­къокъухэм ахалъытэ ятфэнэрэ едзыгъор. Пшъашъэм иIэпэIэсэныгъэ къащылъэгъощт дышъэи­да­гъэм, лъэпкъ пкъыгъохэм, тхып­хъэхэм яхэдыкIын, нэмыкIхэм.

ЗэхэщэкIо купым хэтхэм тызэрэщагъэгъозагъэу, пшъэшъи 9 зэнэкъокъущт. ДыдыкI Камилэ, Унэрэкъо Данэ, ЖэнэлI Асыет, Гъыщ Фатимэ, Сыджыхь Хъан, ЛIэхъусэжъ Анжелэ, Датхъужъ Джэнэт, ЛIыбзыу Шан, Трахъо Залинэ ядэхагъи, яIэпэIэсэныгъи, сэнаущэу ахэлъыри фестиваль-зэнэкъокъум къыщагъэлъэгъощтых.

— Зэнэкъокъоу «Адыгэ пшъа­шъэм» мэхьэнэ ин иIэу сэлъытэ, — къытиIуагъ Адыгэ Республикэм культурэмкIэ изаслуженнэ IофышIэу, зэлъашIэрэ археологэу Тэу Аслъан. — НахьыпэкIэ зэхащэгъэ фестивальхэм сяплъыгъ. Илъэс къэс зэIукIэгъухэр нахь гъэшIэгъон мэхъух. ОсэшI купым хэтхэм зэфагъэ ахэлъэу анахь зытефэрэр къыхахынэу, шIухьафтын шъхьаIэр фагъэшъошэнэу сэгугъэ. Пэсэрэ лъэхъаным къыщегъэжьагъэу адыгэхэм пшъэшъэ дахэм икъыхэхын епхыгъэ зэIу­кIэгъухэр зэхащэщтыгъэх. Шэн-хабзэхэр къыдалъытэхэзэ зэнэкъо­къум цIыфыбэ къыращалIэщтыгъ. «Адыгэ пшъашъэм» фэгъэхьыгъэ фестивалыр мэфэкIышхом фэдэу зэхащэ сшIоигъу.

Фестивалыр рамыгъажьэзэ IэпэIасэхэм яIофшIагъэхэр филармонием къыщагъэлъэгъощтых, лъэпкъ орэдхэр къыщаIощтых, щыуджыщтых. Лъэпкъ искусствэр зышIогъэшIэгъонхэр фестивалым рагъэблагъэх, ыпкIэ хэмылъэу зэнэкъокъум еплъынхэ алъэкIыщт.