«Ошъутенэм» имэкъамэхэр
ЛIэшIэгъу плIанэм ехъугъэу Iоф ешIэ Мыекъуапэ щызэхэщэгъэ литературнэ объединениеу «Ошъутен» зыфиIорэм. Мыщ къэкIох ыкIи дахэу щызэдэгупшысэх литературэр зикIасэхэу, усэныр сэнэхьат зыфэхъугъэхэр.
Ахэр аныбжьхэмкIи, Iофэу ашIэрэмкIи, яеплъыкIэхэмкIи зэтекIых, ау фэщэныгъэ-гупсагъэу тхэным фыряIэм зэрепхых. Зэфэдэу сыдигъуи янэплъэгъу итыр поэзиеу шъо пчъагъэу ыкIи мэкъэмэ зэфэшъхьафыбэу зэхэлъыр ары.
«Рифмы Оштена» зыфиIорэ тхылъыкIэу бэмышIэу Адыгэ Республикэм итхылъ тедзапIэ къыщыдэкIыгъэм автор 34-мэ яусэхэр къыдэхьагъэх. Ахэр: Адэшэс Мурат, А. Адельфинскэр, Кирилл Анкудиновыр, Надежда Байновар, Вера Визировар, Ксения Борисовар, Вартан Крикоровыр, Евгений Любецкий, Хьакурынэ Руслъан, Цуамыкъо Долэт, мыхэм анэмыкIхэри.
«Тэ тичIыгу нахь шIагъо мы дунаишхом тетэп», — еIо Цуамыкъо Долэт. ГукIи псэкIи чIыпIэ гупсэм пытэу зэрепхыгъэр кIигъэтхъэу, о уичIыгоу лъэпэрыкIор зыщыпшIыгъэу, зипсыорхэр шIэтэу, зыкъушъхьэхэр пытэу, сакъэу, лэжьыгъэр зыщыбагъоу, онджэкъ машIор зыщыблэрэм; узщапIугъэу, узщалэжьыгъэу, жъи кIи зыщызэрэшIэу, сыдигъуи къызщыуажэхэрэм пэпшIын зэрэщымыIэр, лъэпкъым хэлъ фэбэгъэ-гупцIэнагъэр чIыгуми бэшIагъэу зыIуищагъэу, зыхищагъэу, къыхэкIыжьзэ, лIэужхэм къызэрафэкIожьырэр усакIом иусэ сатырхэм къащиIотыкIыгъ.
Тхылъым автор зэфэшъхьафхэм ятхыгъэ 250-рэ фэдизрэ дэт, къэIуакIэу, гъэпсыкIэу, купкIэу яIэр зытхырэм ыгу тешIыкIыгъэу, усэ пычыгъо жъынч зэфэшъхьафхэмкIэ ушъагъэ. Адыгеим ичIыопс хьалэмэт идэхэгъэ-гоIугъэ, икъушъхьэхэр, имэзхэр, ипсыхъохэр, ицIыфхэр нэгум къыкIагъэуцох. ЕтIани гупшысэу ахалъхьагъэмкIэ тэри, тхылъеджэхэм, тыздагъэгупшысэныр афэукIочIыгъ.
АР-м и Къэралыгъо шIухьафтын литературэмкIэ бэмышIэу зыфагъэшъошагъэу Надежда Байновам иусэхэми мыщ чIыпIэ щаубытыгъ. «Молюсь», «В чем замысел творца?», «Тревожно мне», «Друг остался», «Родина, малая Родина», «Я заглянула в мир забытой веры», ахэм анэмыкIхэми усэкIо бзылъфыгъэм игупшысэ зыфэдэр, зынэсырэр, идунэегурыIуакIэ пэблагъэ уашIы, поэзиеу гулъэчIэ макъэм ижьыкъащэ укIэдэIукIын амал къыуатызэ, о пшъхьэкIэ узэрагъэплъыжьы, щыIэныгъэм уфапIу. Ащ иусэу «В чем замысел творца?» зыфиIорэм щыкIегъэтхъы хэти ренэу зыфэсакъыжьэу, зыдэплъыхыжьэу, ыIуи, ышIи, къыгъэшIэгъэ илъэсхэри ышыжьхэу акъыл зафэкIэ щыIэн зэрэфаер, псынкIэгъэ-гуIэныр щыIэныгъэм зэрэхэмызагъэрэр, гугъэ лъэбэкъу пэпчъ, пфэгъэхъуи, къыбдэмыхъуи къыдэплъытэжьызэ, уихэукъоныгъэхэм уямыпэкIаоу, бгъэтэрэзыжьхэзэ, улъыкIотэн зэрэфаер тегъашIэ. Дунаишхор къэзыгъэшIыгъэм инэфыпс нэрымылъэгъу тызэрэхэтыр хэти зэхатшIэу, лъэбэкъу къончэ-сэнчэ гугъуемылIыкIэ а нэфыр зэрэтымыгъэкIосэщтым тыпылъын зэрэфаер, кIосэгъахэр хэгъэнэжьыгъуае зэрэхъурэр, зы гущыIэ цIыкIу закъоу узфэмысакъыгъэмкIэ ер ппхъын зэрэплъэкIыщтыр къыдгурегъаIо. Авторыр къытэджэ тысакъынэу, шIу тшIэнэу, акъыл тхэлъынэу.
Надеждэ усэ къодыерэп, щыIэныгъэм пае зышъхьамысыжьэу мэгупшысэ, маплъэ…, зэхишIэрэр бэдэд: цIыфыр цIыфым пэчыжьэ мэхъу; къиным жьы хэти къыригъащэрэп — тиI шхыни, тиI щыгъыни, уни, тахъти, адэ псэ зыпыт пстэумэ гукIэгъу икъу зэфыряIа? Джащ паекIэ дунэешхор Iэягъэм щиухъумэу, усакIор тхьэм елъэIу гъэшIэгъонэу, мэкъэ шъэфкIэ, жэм диIухьажьэу, нэфылъэр къызэкIэчыгъо имыфагъэу, остыгъи, машIуи афемыжьэзэ. Нэфшъэгъо е чэщныкъо тхьэлъэIур занкIэу макIо зэраIорэми Байновам исатырхэм урагъэгупшысэ.
Надежда Байновам ипоэзие зэрэшъуашIом, купкI зэриIэм тхылъым къыдэхьэгъэ иусэ 20 фэдизым урагъэгупшысэ, акъыл зэтеуцуагъэмрэ гумрэ пытэу зэрэзэгоуцуагъэхэм ищыс итворчествэ, къыгъэшIэгъэ илъэсхэм ахихыгъэ губзыгъагъэр сатырхэм къахэщы.
Литературэр зикIасэхэу, ар иамал къызэрихьэу зылэжьхэрэм яусэхэр, зыр зым нахь гъэшIэгъонэу, къыдэхьагъэх «Рифмы Оштена» зыфиIорэ сборникым. Адыгеим ичIыопс идэхагъэ цIыфыгум икъэбзагъэ пэщачэу щытмэ, мамыр огур зэрэзэIухыгъэщтыр, цIыфхэр шIу зэрэзэрэлъэгъущтхэр, узэготмэ узэгурыIоу узэрэлъэшыр кIагъэтхъыгъ тхылъым къыдэхьагъэхэ усакIохэм, ясатырхэр гъэшIэгъоных, нэфынэх.
Мамырыкъо Нуриет.