ЩыIэныгъэм иорэдыIу тагъэгугъэ
Урысыем иорэдыIо цIэрыIоу Лев Лещенкэм ипчыхьэзэхахьэ Адыгэ Республикэм и Къэралыгъо филармоние чъэпыогъум и 19-м щыкIощт.
Лев Лещенкэр Адыгеим иныбджэгъушIу. Иконцертхэм Мыекъуапэ дэт стадион шъхьаIэм, къэлэ паркым, филармонием тыщяплъыгъ. Илъэс 50 хъугъэу сценэм орэд къызэрэщиIорэм фэгъэхьыгъэ зэхахьэхэр хэгъэгум щызэхещэх.
Анна Герман игъусэу шIулъэгъу орэдэу дискым тыритхагъэр, «Родительский дом» зыфиIорэр, нэмыкIхэри гъашIэм жъы щыхъущтхэп, уямызэщэу уядэIу. Олимпиадэ джэгунхэу 1980-рэ илъэсым Москва щыкIуагъэхэр стадионым щызэфашIыжьхэзэ, мышъэ цIыкIум исурэт ошъогум ратIупщыхьэзэ Лев Лещенкэм къыIогъэ орэдыр, фэшъхьафхэри щыIэныгъэм хэкIуакIэхэрэп.
Музыкальнэ искусствэм анахьэу къыхэдгъэщырэр В. Харитоновым игущыIэхэм атехыгъэу композиторэу Д. Тухмановым ыусыгъэ орэдэу «ТекIоныгъэм и Маф» зыфиIорэр ары. Тарихъ гъэшIэгъон ащ пылъыр. Артист зэфэшъхьафхэм хорыр ягъусэу орэдыр къаIоу аублэгъагъ, ау икъу фэдизэу орэдым псэ къыпагъэкIэн, цIыфхэм алъагъэIэсын алъэкIыщтыгъэп.
Лев Лещенкэм орэдыр зыфагъэшъуашэм, гупшысэу композиторымрэ тхакIомрэ халъхьагъэр къызэIуихыгъ. Хэгъэгу зэошхом иветеранхэм, дзэкIолIхэм апашъхьэ орэдыр къыщиIонэу зырегъажьэм, залым чIэсхэр къэтэджыгъэхэу зэредэIущтыгъэхэр цIыфхэм ащыгъупшэрэп. Нэпсыр къызэхыгъэ нэбгырипшI пчъагъэ орэдыIом къекIолIагъ, «тхьауегъэпсэу» къыраIожьыгъ.
Филармонием неущ щыкIощт концертым Лев Лещенкэм ирепертуар хэт орэдхэу щыIэныгъэм щыщ хъугъэхэр щызэхэтхыщтых. ЗэхэщакIохэм искусствэр зышIогъэшIэгъонхэр орэдыIо цIэрыIом ипчыхьэзэхахьэ рагъэблагъэх.