Адыгэ Республикэм и Къэралыгъо филармоние Урысыем и Прави­тельствэ игрант къыфагъэшъошагъэу 2019-рэ илъэсым творческэ Iофы­гъохэр егъэцакIэх.

Филармонием иIофтхьабзэ хэлажьэ Адыгэ Республикэм и Къэралыгъо орэдыIо-къэшъокIо ансамблэу «Ис­лъамыер». Дунаим щыцIэрыIо ансамблэмрэ филармонием исимфоническэ оркестрэрэ зэгъусэхэу концертхэр къызэдатых.

МэщбэшIэ Исхьакъ ироманэу «Бзыикъо заом» техыгъэу апэрэ адыгэ оперэу композиторэу Нэхэе Аслъан ыусыгъэр Ростов-на-Дону, Элиста, Астрахань, Волгоград къащагъэлъэ­гъуагъ.

Урысыем культурэмкIэ и Минис­терствэ зэхищэрэ пчыхьэзэхахьэр композиторхэм я Унэу Москва дэтым непэ щыкIощт. Симфоническэ оркестрэм идирижерыр СтIашъу Къэп­лъан, «Ислъамыем» ихудожественнэ пащэр Урысыем, Адыгеим янароднэ артистэу Нэхэе Аслъан.

Концертым хэбзэ къулыкъушIэхэр, Адыгеим илIыкIохэр, культурэмрэ искусствэмрэ яIофышIэхэр, тилъэп­къэгъухэу Москва хэкум щыпсэухэрэр, нэмыкIхэри еплъыщтых.

ЕмтIылъ Нурбый.