Тарихълэжьэу Г. П. Ивановыр къызыхъугъэр илъэси 100 хъугъэ
ШIукIэ тыгу къинагъ
Иванов Гавриил Петр ыкъор 1919-рэ илъэсым чъэпыогъум и 16-м Иркутскэ губерниемкIэ къуаджэу Шестаково къыщыхъугъ.
Илъэси 3 нахь ымыныбжьэу ятэ, илъэси 7-м нэсыгъэу янэ ядунай ахъожьыгъ. Иркутскэ къэралыгъо университетым тарихъымкIэ ифакультет къыухыгъ. Дзэ Плъыжьым къулыкъу щихьызэ, 1938-рэ илъэсым хыкъумэу Хьасан дэжь ылъакъо японцэхэм къыщауIагъ. Сэкъатныгъэ зэриIагъэм къыхэкIэу Хэгъэгу зэошхом илъэхъан зэонэу хъугъэп, ау фронтым Iутхэм апае зышъхьамысыжьэу лэжьагъэ, Сталинград изэтегъэпсыхьажьын хэлэжьагъэхэм ащыщ. Нэмыцхэр зырафыжьхэ нэуж Г. П. Ивановым Пшызэ шъолъыр зыкъигъэзагъ. ВЛКСМ-м икрайком иаппарат щылэжьагъ, инструкторэу ригъажьи, секретарь IэнатIэм нэсыгъ.
Г. П. Ивановым наукэм зызфигъэзагъэр 1945-рэ илъэсым иятIонэрэ кIэлъэныкъу ары. 1949-рэ илъэсым кандидат диссертациер пхырегъэкIы, Краснодар къэралыгъо кIэлэегъэджэ институтым тарихъымкIэ икафедрэ икIэлэегъэджэ шъхьаIэу, етIанэ ащ ипащэу, тарихъымкIэ факультетым идеканэу Iоф ешIэ. Хэгъэгу зэошхом илъэхъан партизанхэр Пшызэ шъолъырым зэрэщызэуагъэхэр, дзэ частхэу ащ итыгъэхэр зэригъашIэу ыкIи ахэм афэгъэхьыгъэу тхэу регъажьэ. 1958 — 1961-рэ илъэсхэм имонографиехэу «Подвиги гвардейцев Кубани», «В тылу врага», «Боевая доблесть кубанцев» зыфиIохэрэр ыкIи нэмыкIхэр къыдегъэкIых.
Г. П. Ивановыр 1965-рэ илъэсым Краснодар къэралыгъо кIэлэегъэджэ институтым научнэ IофшIэнымкIэ ипроректорэу агъэнэфагъ. 1967-рэ илъэсым къыщегъэжьагъэу 1971-рэ илъэсым нэс лэжьакIохэм ядепутатхэм я Краснодар къэлэ Совет идепутатыгъ. КIэлэегъэджэ институтыр Кубанскэ къэралыгъо университет зашIыжьым, егъэджэн IофымкIэ ащ ипроректорыгъ. Советскэ обществэм итарихъкIэ кафедрэр зигугъу къэтшIыгъэ университетым 1974-рэ илъэсым щызэхищагъ ыкIи илъэс 15 ащ ипэщагъ.
Г. П. Ивановым монографие, тхылъ, брошюрэ, статья 90-м ехъу къыдигъэкIыгъ. Анахьэу ахэр советскэ цIыфхэм Хэгъэгу зэошхом лIыхъужъныгъэу щызэрахьагъэмрэ комсомолымрэ афэгъэхьыгъэх. Тарихълэжьхэми, нэмыкI шIэныгъэлэжьхэми ащ иIофшIагъэхэм осэшхо къафашIыгъ. Научнэ тхылъ 20 фэдизмэ яредакторыгъ. Ахэм ащыщых «Очерки истории Краснодарской организации КПСС», «Документы отваги и героизма: Кубань в Великой Отечественной войне 1941 — 1945 гг.», «Все тебе, Родина! Страницы истории кубанского комсомола», «Народный подвиг в битве за Кавказ» зыфиIохэрэр. Иванов Гавриил Петр ыкъор къызыхъугъэр илъэс 80 зыщыхъурэм ехъулIэу ащ Iоф дэзышIагъэхэмрэ ригъэджагъэхэмрэ ягукъэкIыжьхэр зыдэт тхылъэу «Человек. Ученый. Учитель» зыфиIорэр къыдагъэкIыгъ.
Г. П. Ивановым ыцIэ апэу зыщызэхэсхыгъэр тиунэгъо кIоцI ары. Тарихъым изэгъэ- шIэн зэрэпылъыгъэхэм сятэрэ арырэ зэфищэгъагъэх. Сятэ Краснодар зыкIокIэ, амал иIэмэ ар зэригъэлъэгъущтыгъ. ТарихъымкIэ факультетым заочнэу сыщеджэ зэхъур ары ащ нэIуасэ сызыфэхъугъэр. Наукэм сызэрэпыхьагъэр зишIушIагъэр, университетым сычIэхьаным сытезыгъэгушхуагъэр Гавриил Петр ыкъор ары. Университет ужым аспирантурэм сыщеджагъ, кандидат диссертацием итхын пае советскэ обществэм итарихъкIэ кафедрэу Г. П. Ивановыр зипэщагъэм сырапхыгъ. Ащ бэмэ сафигъэсагъ, гу алъысигъэтагъ, кандидат IофшIагъэм итхынкIэ упчIэжьэгъу къысфэхъугъ.
Обществэу «ШIэныгъэм» икрай организацие итхьаматэ игуадзэу щытыгъэ Г. П. Ивановымрэ сэрырэ тызэгъусэу бэрэ Адыгеим ичIыпIэ зэфэшъхьафхэм тащыIэнэу хъугъэ. Ащ илекциехэм губгъо уцупIэхэм, былымэхъо фермэхэм, заводхэм, апшъэрэ, гурыт еджапIэхэм ашIогъэшIэгъонэу ащядэIущтыгъэх. ЦIыфхэм яупчIэхэм джэуап гъэшIэгъонхэр ащ къаритыжьыщтыгъ.
Гавриил Петр ыкъом цIыфхэм псынкIэу екIолIакIэ къафигъотыщтыгъ, агурыIощтыгъ. Мэкъэ дахэкIэ къэзэкъ, урыс лъэпкъ орэдхэр къыIощтыгъэх. Сэмэркъэур икIэсагъ, купэу зыхафэрэр ыгъэдэIон ылъэкIыщтыгъ.
ЦIыфыгъэ инрэ лIыгъэрэ зыхэлъыгъэ тарихълэжь цIэрыIом шIэныгъэшхо къолъыгъ, иIэпэIэсэныгъэ зэрэхигъэхъощтым ренэу пылъыгъ, IофшIэкIошхуагъ. Студентхэр зэрэригъаджэщтыгъэхэм, аспирантхэмрэ кафедрэм къыдыIутхэмрэ яшIэныгъэ хагъэхъоным, общественнэ Iофхэм ишъып-къэу зэрапылъыгъэм имызакъоу, научнэ IофшIагъэхэм адэлэжьэнэуи игъо ифэщтыгъ. ШIэныгъэлэжьым ышъхьэкIэ зыфигъэкIотэжьыщтыгъэп, пшъэрылъэу къыфашIыхэрэр зэкIэ еIолIэнчъэу ыгъэцакIэщтыгъэх, Iэпэдэлэлныгъэ къызыхэзгъафэхэрэр ыгу тефэщтыгъэхэп.
Профессорэу Г. П. Ивановым Адыгеим щыщ шIэныгъэлэжьыбэмэ наукэм щылъыкIотэнхэмкIэ ишIуагъэ аригъэкIыгъ. Гавриил Петр ыкъом къафишIагъэр ахэм ащыгъупшэрэп, игугъу шIукIэ ашIы.
«Гавриилрэ сэрырэ нэIуасэ тызызэфэхъугъэр зэо ужыр ары, — ыгу къэкIыжьыщтыгъ Хэгъэгу зэошхом илъэхъан партизаныгъэу, бэмышIэу зидунай зыхъожьыгъэ Тыу Амин. — А лъэхъаным ВЛКСМ-м и Кощхьэблэ райком исекретарэу сэ сыщытыгъ, Гавриил ВЛКСМ-м и Краснодар крайком исекретарыгъ. IэнатIэр иныгъэми, зыкъытшъхьащимыIэтыкIэу къыддэгущыIэщтыгъ.
Ар скъош шъыпкъэм фэдагъ. Адыгэ къэралыгъо кIэлэегъэджэ институтым ипроректорэу сызыщэтым, Краснодар кIэлэегъэджэ институтым ипроректорэу Г. П. Ивановым бэрэ сыIукIэнэу хъущтыгъэ. Урамэу Ставропольскэм университетым икорпусыкIэ щыгъэпсыгъэнымкIэ, кIэлэегъаджэхэр зыщыпсэущтхэ унэм ишIынкIэ ащ бэ зэшIуихыгъэр. Профессорым Кубанскэ къэралыгъо университетым мыжъобгъу къыщыфызэIухыгъэныр къылэжьыгъэу сэлъытэ».
Филологие шIэныгъэхэмкIэ докторэу, профессорэу Тхьаркъохъо Юныси бэрэ Г. П. Ивановым игугъу шIукIэ ышIы-щтыгъ. «УныбжьыкIэфэ уеджэн фае. Адыгеим научнэ IофышIэхэр ищыкIагъэх» ащ зэриIогъагъэр щыгъупшэу къыхэкIыгъэп.
Гавриил Петр ыкъор нэфаIоу щытыгъ, ытхыгъэхэми шъыпкъагъэр алъэпсагъ. УзытеукIытыхьан нэкIубгъо гори ащ иIофшIагъэхэм ахэбгъотэщтэп. Непи ахэм ауасэ къеIыхыгъэп. Тарихълэжь цIэрыIор 1997-рэ илъэсым мэзаем и 23-м тхэкIыжьыгъэми, непи тщыгъупшэрэп, игугъу шIукIэ бэрэ тэшIы.
Ацумыжъ Казбек. Тарихъ шIэныгъэхэмкIэ доктор.