IофшIэным, хэгъэгум икъэухъумэн афэхьазырынхэм (ГТО-м) афэгъэхьыгъэ спорт зэIукIэгъухэр Адыгэ республикэ стадионым щыкIуагъэх.

Республикэм имэфэкI мафэ фэгъэхьыгъэ зэнэкъокъум илъэс 13 — 15, 18 — 24-рэ зыныбжьхэр, нэмыкIхэу шIоигъоныгъэ зи­Iэхэр хэлэжьагъэх. Урысыем физкультурэмкIэ ыкIи спортымкIэ щыкIохэрэ Iофтхьабзэхэр псауныгъэм игъэпытэн, спортым пы­щагъэхэм япчъагъэ хэхъоным, цIыфхэм языгъэпсэфыгъо уахътэ нахь гъэшIэгъонэу агъэкIоным фэIорышIэх.

Мыекъопэ районым ихэшы­пыкIыгъэ командэ апэрэ чIыпIэр къыдихыгъ, Тэхъутэмыкъое районым ятIонэрэ чIыпIэр фагъэ­шъошагъ, къалэу Мыекъуапэ ящэ­нэрэ хъугъэ.

Апшъэрэ еджапIэхэм язэнэ­къокъу Адыгэ къэралыгъо университетым апэрэ чIыпIэр къыщыдихыгъ.

Нэбгырэ зырызхэм язэIукIэ­гъухэм хагъэунэфыкIхэрэ чIыпIэхэр къащызыхьыгъэхэр зэхэщакIохэм къыхагъэщыгъэх. Пшъа­шъэхэм язэнэкъокъу Бэгугъэ Бэлэ текIоныгъэр къыщыдихыгъ, ар Тэ­хъутэмыкъое районым щыщ. Шэуджэн районым къикIыгъэ Вик­тория Белоконь тыжьыныр ыхьыгъ, Мыекъуапэ щыщ пшъа­шъэу Виктория Жденевам джэрзыр къыдихыгъ.

КIалэхэм язэнэкъокъу хэлэ­жьагъэхэмкIэ Мыекъуапэ щыщэу Егор Гончаровым дышъэр фа­гъэшъошагъ, Теуцожь районым къикIыгъэ Бэгъушъэ Артур тыжьыныр къыдихыгъ, шэуджэн районым икомандэ хэтэу Беслан Биджеловым ящэнэрэ чIыпIэр ыхьыгъ.

— Нэбгыри 100-м нахьыбэ ГТО-м ишапхъэхэр игъэкъугъэнхэм хэлэжьагъ, — къытиIуагъ Адыгэ Республикэм физкульту­рэм­кIэ ыкIи спортымкIэ и Коми­тет иIофышIэу Елена Ткачен­кэм. — Спорт лъэпкъ зэфэ­шъхьафхэм яIэпэIэсэныгъэ къыщагъэлъэ­гъуагъ. ГТО-м ишапхъэ­хэр зэрэра­гъэ­къу­хэрэм дакIоу, япсауныгъэ игъэпытэн зэрэпылъхэм тегъэгушIо.

Дзэм къулыкъушIэ кIощтхэ кIалэхэм кIуачIэр апсыхьэ. Атлетикэ псынкIэм, гимнастикэм, нэ­мыкI спорт лъэпкъхэм апыщагъэхэм яныбджэгъухэр, янэIуасэхэр зэIукIэгъухэм къарагъэбла­гъэх. Мэшэлахь. Адыгэ Респуб­ликэм испорт псэуалъэхэр зэтегъэпсыхьагъэх. Рекордхэр амыгъэуцущтхэми, зэнэкъокъухэм ахэ­лажьэхэрэм япсауныгъэ зэрагъэпытэщтым, IофшIэным нахь фэхьазыр зэрэхъущтхэм тицыхьэ телъ.