Адыгэ Республикэм самбэмкIэ изэнэкъокъу Тэхъутэмыкъуае щыкIуагъ. ЗэIукIэгъухэм 2002 – 2004-рэ илъэсхэм къэхъугъэ кIалэхэр ахэлэжьагъэх.

СССР-м спортымкIэ имастерэу Мырзэ Джанхъот фэгъэхьыгъэ шIэжь зэнэкъокъур илъэс къэс Тэхъутэмыкъуае щызэхащэ. Мырзэ Джанхъот Щынджые къыщыхъугъ, унэгъо Iужъум щапIугъ. ИкIэлэцIыкIугъом къыщегъэжьагъэу физкультурэмрэ спортымрэ апыщагъэу самбэм, дзюдом, нэмыкI­хэм зафигъасэщтыгъ. Тэхъутэмыкъуае къыщызэIуахыгъэ кIэлэцIыкIу-ныбжьыкIэ спорт еджапIэм итренерэу Джарымэкъо Нурбый ипащэу бэнэкIэ амалхэр къызIэкIигъахьэщтыгъэх.

Апэрэ мастер

— ГукIэгъу зыхэлъ цIыфэу, ныбджэгъушIоу, шъыпкъэныгъэр ыгъэлъапIэу Джанхъот щытыгъ, — къытиIуагъ Урысыем, Адыгеим язаслуженнэ тренерэу Джарымэкъо Нурбый. — ИгуетыныгъэкIэ зыкъыуигъаштэщтыгъ. Щынджые къикIызэ Тэхъутэмыкъуае зыщигъасэщтыгъ. АвтобускIэ, кушъхьэфачъэкIэ е лъэсэу зекIощтыгъ. ЕджапIэм «СССР-м спортымкIэ имастер» зыфиIорэ щытхъуцIэр апэу къыдэзыхыгъэр Мырзэ Джанхъот ары.

Адыгэ къэралыгъо университетыр Джанхъот къыухыгъ. Кобл Якъубэ лъапсэ зыфишIыгъэ Мые­къопэ бэнэпIэ еджапIэм иIэпэ­Iэсэныгъэ щыхигъэхъуагъ, хэгъэгум изэнэкъокъухэм ахэлажьэщтыгъ.

ИшIушIагъэкIэ къытхэт

— Тызэныбджэгъугъ, тызэгъу­сэу спорт зэIукIэгъухэм тащыбанэщтыгъ, — къеIуатэ спортымкIэ мастерэу, Урысыем, Адыгеим язаслуженнэ тренерэу Хъот Юныс. — Джанхъот тренер IофшIэным зыфежьэм, ыгъэсэрэ ныбжьыкIэхэм зэгурыIоныгъэ ахэлъэу ыпIущтыгъэх. ШIушIэ IэпыIэгъухэм афэгъэхьыгъэ Iофыгъохэм гукIи, псэкIи ахэлажьэщтыгъ. ЕджапIэм спорт шъуашэхэр къыфищэфы­щтыгъэх.

Джанхъот ышнахьыкIэу Мырзэ Джанбэч спортымкIэ мастер, дзюдомкIи, самбэмкIи банэщтыгъ. Дзэм къулыкъур зыщехьым Афганистан щыIэу интернациональнэ пшъэрылъэу иIэр ыгъэцэкIагъ, медальхэр къыфагъэшъошагъэх. Джырэ уахътэ Мырзэ Джанбэч Адыгэ Республикэм IофшIэнымкIэ ыкIи социальнэ хэхъоныгъэмкIэ иминистр, ышнахьыжъ фэгъэхьыгъэ зэнэкъокъухэм язэхэщэн хэ­лажьэ.

Джанхъот сатыум пылъыгъ. Пчыхьэм ядэжь къэкIожьызэ хъун­кIакIор IашэкIэ къыпэуцуи, щэ-гынхэр къытырипхъэнкIагъэх. Лажьэ зимыIэ нарт шъаом лъыр кIэ­чъызэ хъункIакIом екIуалIэ­щтыгъ, ау кIочIэгъу фэмыхъоу чIыгум зыфищэигъ…

Зэнэкъокъур

Яонтэгъугъэхэм ялъытыгъэу хагъэунэфыкIырэ чIыпIэхэр къыдэзыхыгъэхэм шъуащытэгъэгъуазэ.

Кушъу Тамерлан, кг 38-рэ, ЛIыхъурэе Мурат, кг 42-рэ, Хьатхъохъу Рустам, кг 45-рэ, Кобл Рэмэзан, кг 48-рэ, Батмэн Амир, кг 52-рэ, Нащ Руслъан, кг 56-рэ, Хьакъуй Анзор, кг 60, Даниил Заприенкэм, кг 65-рэ, Кирилл Литвиновым, кг 70-рэ, ДыдыкI Айтэч, кг 75-рэ, ТIэшъу СултIан, кг 81-рэ, Самир Архиповым, кг 87-рэ, Мызэгъ Дамир, кг 87-м къехъу, апэрэ чIыпIэхэр къафагъэшъошагъэх.

Анцокъо Амир, Лъэцэр Асфар, Хьадпэшъо Дамир, Шъхьэфыжь Алый, ЛIэхъусэжъ Индар, Нэгъой Ислъам, КушпIэ Къэплъан, Бэгъ Тимур, Алалэ Азэмат, Руслан Мозговоим, Янэкъо Ислъам, Нэхэе Долэт, Къэлэкъутэкъо Азэмат ятIонэрэ чIыпIэхэр къыдахыгъэх.

Шыумэфэ Ислъам, Аврам Карабадшаковым, Шъынэхъо СултIан, СтIашъу Анзор, УдыкIэко Бислъан, нэмыкIхэм ящэнэрэ чIыпIэхэр къахьыгъэх.

Тренерхэу Б. Шъэумэным, А. Гъомлэшкым, Н. Джарымэкъом, А. Мырзэм, Е. Демченкэм, Хъ. ГуIэтыжьым, М. ХыдзэлIым, С. Мэрэтыкъом, Д. Хьакурынэм, Д. Липаридзе, М. ХыдзэлIым, А. НэIэтыжьым, нэмыкIхэм бэнакIохэр агъасэх.

ХагъэунэфыкIырэ чIыпIэхэр къызфагъэшъошагъэхэр Къыблэм икIэух зэIукIэгъухэу шэкIогъум и 6 – 9-м Мыекъуапэ щыкIощтхэм ахэлэжьэщтых.

Сурэтхэм арытхэр: Мырзэ Джанхъот; хагъэунэфыкIырэ чIыпIэхэр Тэхъутэмыкъуае къы­щыдэзыхы­гъэхэм ащыщхэр, тренерхэр.