ШэнышIу зэрэхъугъэу, Адыгэ Республикэм и Мафэ фэгъэхьыгъэ шыгъачъэхэр игъэкIотыгъэу Мыекъуапэ щызэха­ща­гъэх.

Адыгэ Республикэм и ЛIышъхьэу КъумпIыл Мурат, республикэм и Премьер-министрэу Александр Наролиныр, Адыге­им и Парламент и Тхьаматэу Владимир Нарожнэр, хэбзэ къулыкъушIэхэр, республикэм щыпсэухэрэ лъэпкъ­хэр, хьа­кIэхэр зэнэкъокъум еплъыгъэх.

Къэбэртэе-Бэлъкъарым, Къэ­рэщэе-Щэрджэсым, Краснодар краим, Адыгеим яшыухэр шыкъэчъапIэм щызэIукIагъэх. Куль­турэм, искусствэм яIофышIэхэм мэфэкIыр къагъэдэхагъ. Къэ­ралыгъо телерадиокомпаниеу «Адыгеим» ижурналистэу Ахэ­джэго Рузанэ зэрищэгъэ концер­тым орэдыIо цIэрыIоу Дзыбэ Мыхьамэт, республикэ филармонием иэстрадэ купэу «Ошъу­тенэр», ансамблэу «Синдикэр», нэмыкIхэри хэлэжьа­гъэх. Артистхэм орэдхэр къа­Iуа­гъэх, лъэпкъ къашъохэр къа­­шIыгъэх.

Республикэм ихэхъоныгъэ­хэм, культурэм, спортым афэгъэхьыгъэ нэрылъэгъу IэпыIэгъухэр, кIэлэцIыкIу джэгупIэхэр узыIэпащэу гъэпсыгъагъэх. СатыушIхэм къызэIуахыгъэхэ щапIэхэр цIыфхэм кIуапIэ афэ­хъугъэх.

Шыгъачъэхэр

Адыгэ Республикэм и ЛIы­шъхьэу КъумпIыл Мурат спортым пыщагъэхэм, зэнэкъокъум еплъыхэрэм къафэгушIуагъ, шIоу щыIэр къадэхъунэу афиIуагъ.

— Республикэм шы спортымкIэ иеджапIэ бэмышIэу тыщыIагъ, тренерхэм, спорт­сменхэм таIукIагъ. Шы спортым зегъэушъомбгъугъэным, шым ехьылIэгъэ шэн-ха­бзэхэр къэIэтыжьыгъэнхэм япхыгъэ унэшъо хэхыгъэхэр тапэкIи дгъэцэкIэщтых, — къы­Iуагъ КъумпIыл Мурат.

Шыгъачъэхэр заублэхэм, Хэ­гъэгу зэошхом иветеранхэм ацIэкIэ агъэнэфэгъэ шIухьафтынхэм якъыдэхын шыухэр фэбэнагъэх. Метрэ 1000-р къы­закIум, Титан Кавказым апэрэ чIыпIэр фагъэшъошагъ, А. Хьа­санэкъом шыр иунай. Капитан Флинтым ятIонэрэ чIыпIэр къы­дихыгъ, Блокыр ящэнэрэ хъугъэ.

Адыгэ Республикэм иветеранхэм я Совет итхьаматэу Къуаджэ Аслъан спортсменхэм афэгушIуагъ, шIухьафтынхэр аритыжьыгъэх.

Республикэм и Парламент ишIухьафтынхэм афэгъэхьыгъэ зэIукIэгъум метрэ 1600-м щызэнэкъокъугъэх. Апэрэ чIыпIэр Кэт Ласым ыхьыгъ. А. Хьаса­нэкъом шыр ий. Ученикыр ятIо­нэрэ хъугъэ, Р. Болэкъом шыр иунай. Балбелбим ящэнэрэ чIыпIэр ыхьыгъ.

ШIухьафтын шъхьаIэу Адыгэ Республикэм и ЛIышъхьэ ыгъэ­нэфагъэр сомэ мин 500 хъущтыгъэ. Шыухэр метрэ 2400-м щызэнэкъокъугъэх. Апэрэ къе­кIокIыгъом шыухэр благъэу зэхэтыгъэх, апэ ишъыщтыр язэ­рэгъашIэщтыгъэп. ЯтIонэрэ къекIокIыгъом жьыфым кIуа­чIэкIи, гупшысагъэкIи пэшIуе­кIощтхэр къыщынэфагъэх.

Дзыбэ Мыхьамэт иунэе шэу Избирателыр зыпкъ итэу купым къыпхырыкIыгъ, метрэ заулэкIэ апэ къишъыгъ. Шансон ятIонэрэу къэсыжьыгъ, Квейтыр ящэнэрэ хъугъэ. Урысыем IофшIэнымкIэ и ЛIыхъужъэу, зэлъашIэрэ тхакIоу МэщбэшIэ Исхьакъ ти ЛIышъхьэу КъумпIыл Мурат ыцIэкIэ спорт­сменхэм афэгушIуагъ, гущыIэ фабэхэр ариIуагъэх, шIухьафтынхэр аритыжьыгъэх.

Адыгэ Республикэм изаслуженнэ артистэу Дзыбэ Мыхьамэт шIухьафтын къыфэзышIыгъэхэм «тхьашъуегъэпсэу» къа­риIожьыгъ. МэщбэшIэ ­Исхьакърэ Тутэ Зауррэ зэдаусыгъэ орэ­дэу адыгэхэм афэгъэхьыгъэр М. Дзыбэм пчэгум къыщиIуагъ.

Республикэм и Правительствэ ишIухьафтынхэм якъыдэхын метрэ 1400-м шыухэр щызэнэ­къокъугъэх. Р. Хахалевым иунэе шэу Галэ апэрэ чIыпIэр къыди­хыгъ. Шанитэ ятIонэрэ, Бенели ящэнэрэ хъугъэх.

Правительствэм и Тхьаматэ игуадзэу Сапый Вячеславрэ АР-м физкультурэмкIэ ыкIи спортымкIэ и Комитет ипащэу Дэгужъые Муратрэ гъэхъагъэ зышIыгъэ спортсменхэм афэгушIуагъэх, шIухьафтынхэр ара­тыжьыгъэх.

Адыгэ шэн-хабзэхэм, зэкъош­ныгъэм игъэпытэн, лъэпкъ шIэ­жьым яхьылIагъэхэ зэнэкъо­къухэр гъэшIэгъоныгъэх. Нартхэм афэгъэхьыгъэ зэIукIэгъум Буян щытекIуагъ. Барон ятIо­нэрэ, Байкал ящэнэрэ хъугъэх.

Нарт Саусырыкъо фэгъэ­хьыгъэ зэнэкъокъур Трамым ыхьыгъ. Громыр ятIонэрэ, Капризыр ящэнэрэ хъугъэ.

Адыгэ шыум фэгъэхьыгъэ апэрэ зэнэкъокъум мэхьэнэ ин иIагъ. Лъэпкъ шъуашэр шыум зэ­рэщыгъым, ар зэрэ­зэрихьэ­рэм, шым зэрэтесым, нэмыкI­хэм зэхэщакIохэр алъыплъа­гъэх.

Апэрэ чIыпIэр Наш Асфар къыдихыгъ. Республикэ общест­веннэ движениеу «Адыгэ Хасэр» зэIукIэгъум кIэщакIо фэхъугъ. «Шыу Хасэу» зэхищагъэм нэ­бгырэ 250-м ехъу хэт. Тхьапшъэ­къо Альберт япащэу шэн-ха­бзэхэм, шы спортым языкъе­гъэIэтыжьын пылъых.

Израиль, Тыркуем, Сирием, Иорданием, къош республикэхэу Къэбэртэе-Бэлъкъарым, Къэрэщэе-Щэрджэсым къарыкIыгъэхэ тилъэпкъэгъухэр шыгъачъэм щытлъэгъугъэх, гущы­Iэгъу тафэхъугъ.

Кобэщычэ Хьасанэрэ Шыумафэрэ ыкIи Абрэдж Руслъан афэгъэхьыгъэ шIэжь зэIукIэ­гъухэри шыухэм яIагъэх.

— ЗэкIэ тлъэгъугъэр тшIо­гъэшIэгъон, зэхэщакIохэм тагъэ­гушIуагъ, — къытиIуагъ Израиль ит адыгэ къуаджэу Кфар-Камэ ихасэ ипащэу Нэпсэу Зэчэрые.

Бэчыжъ Бэлэ шым тесэу адыгэ шъуашэм идэхагъэ, шыр къызэригъашъорэр тлъэгъугъэх. Республикэм иIэпэIэсэ цIэрыIоу Еутых Асе ыгъэнэфэгъэ шIухьафтынхэр зэнэкъокъум ча­нэу хэлэжьэгъэ шыухэм афагъэшъошагъэх.

ЕмтIылъ Нурбый. Сурэтхэр зэхахьэм къыщытетхыгъэх.