«АГУ-Адыиф» Мыекъуапэ — «Звезда» Звенигород — 26:32 (12:13). Чъэпыогъум и 5-м спорт Унэшхоу Кобл Якъубэ ыцIэ зыхьырэм щызэдешIагъэх. Зезыщагъэхэр: М. Герасимов, Д. Слащев.

«Адыиф»: къэлэпчъэIутхэр: Кожубекова, Баскакова; ешIакIохэр: Зубова — 3, Кучеренко — 1, Кириллова — 1, Дмитриева, Дьяченко — 8, Кобл — 3, Серадская, Краснокутская — 2, Морозова — 2, Казиханова — 1, Дворцевая — 3, Загайко — 2. «Звездам» къыхэщыгъэхэр: Климанцева — 5, Ганичева — 5, Никитина — 5, Чернова — 4, Суслова — 4.

ЗэIукIэгъум пчъагъэр зэрэщылъыкIуатэрэм тигъэгугъэщтыгъ: 7:8, 8:9, 10:9, 11:10. Ксения Дьяченкэм IапшъэкIэ лъхъанчэу ыдзыгъэ Iэгуаор ухъумакIохэм апхырыкIи, хъагъэм щычэрэгъугъ — 12:11. Кобл Зурет гупчэм дахэу щешIэ, ухъумакIохэр къызэринэкIыхэзэ Iэгуаор К. Дьяченкэм IэкIегъахьэ. Ксение лъэшэу ыдзырэ Iэгуаор къэлэпчъэIутым къыубытын е къызэкIидзэжьын ылъэкIырэп.

ЕшIэгъур А. Морозовам, А. Дворцеваям, К. Зубовам, А. Загайко, нэмыкIхэм къагъэ­дахэ, ау «Звездам» зэнэкъокъум къырыкIощтыр зыIэкIигъэкIырэп. Командэр псынкIэу ыпэкIэ лъэкIуатэ, «Адыифым» къэлапчъэм Iэгуаор зыдидзэкIэ, нэгъэупIэпIэгъуи 10 ты­римыгъашIэу тикъэлапчъэ Iэгуаор къыдидзэн елъэкIы. Пчъагъэр зэрэлъыкIуатэрэм тифедэ хэлъыгъэп: 17:21, 21:26, 23:27, 26:30.

Пресс-зэIукIэр

— Адыгэ Республикэм имэфэкI фэгъэхьыгъэу тыкъышъуфэгушIо, — къытиIуагъ «Звездам» итренер шъхьаIэу Алексей Гумяновым. — Краснодар тызыщешIэм «Кубань» тытекIуагъ. «Адыифым» апэрэ едзыгъом тигъэ­гумэкIыгъ, шъуикомандэ ешIэкIо дэгъухэр хэтых. Ухъумэн Iофыгъохэр нахьышIоу дгъэ­цакIэхэу тызыфежьэм, текIоныгъэм нахь IэшIэхэу тыфэкIуагъ. Опыт зиIэхэ ешIакIохэр ныбжьыкIэхэм щысэшIу афэхъугъэх, сафэраз.

«Адыифым» итренер шъхьаIэу Александр Реввэ изэфэхьысыжьхэм къащыхигъэщыгъ Ксения Дьяченкэр, Кобл Зурет, къэлэпчъэ­Iутэу Светлана Кожубековар анахь дэгъоу зэрешIагъэхэр. Апэрэ едзыгъом командэхэр яIэпэIэсэныгъэкIэ щызэфэдагъэх.

«Звездам» зэдиштэхэу ешIэкIо пчъагъэ зэрэхэтым, гандболым хэгъозагъэхэм нахь ныбжьыкIаIохэр зылъащэнхэ зэралъэкIырэм А. Реввэ къатегущыIагъ. «Адыифым» илъэс 16 — 17 зыныбжьхэри щешIэх. Типшъашъэ­хэм зыкъызэIуахыным фэшI уахътэ ­ящыкIагъ.

«Звездам»икапитанэу Надежда Осиповар, «Адыифым» икъэлэпчъэIутэу Светлана Кожубековар ешIэкIо анахь дэгъухэу зэхэщакIохэм къыхахыгъэх. ЗыцIэ къетIуагъэхэм спортымкIэ дунэе класс зиIэ мастерэу Лариса Сысоевар афэгу­шIуагъ, нэпэеплъ шIу­хьафтынхэр аритыжьыгъэх.

Сурэтым итхэр: Светлана Кожубековам (агузэгу ит) фэгушIох.