Къыблэм дзюдомкIэ изэнэкъокъу Адыгэ къэралыгъо университетым физкультурэмрэ дзюдомрэкIэ и Институт щызэхащагъ.

Илъэс 18-м нэс зыныбжь пшъа­шъэхэр, кIалэхэр бэнэпIэ алы­рэгъум щызэIукIагъэх. Краснодар краим, Астрахань, Волгоград хэкухэм, Къырым, Къалмыкъым, Севастополь, Адыгэ Республикэм яныбжьыкIэхэр зэнэкъокъугъэх. БэнэкIо 398-рэ хэлэжьагъ.

Адыгеим зыщызыгъасэхэрэм дышъэу медали 4 къыдахыгъ. Аулъэ Астемир килограмм 55-рэ къещэчы, апэрэ чIыпIэр къыфагъэшъошагъ, ипащэр тренерэу Шъынэхъо Мурат. ЖакIэмыкъо Темыркъан, кг 66-рэ, текIоны­гъэр къыдихыгъ. Адыгэ Республикэм изаслуженнэ тренерхэу Беданыкъо Рэмэзанрэ Хьакурынэ Дамиррэ Т. ЖакIэмыкъом ипащэхэу зэIукIэгъухэм зафигъэхьазырыгъ.

Пшъашъэхэм язэнэкъокъу Хьа­кIэко Данэ къыхэщыгъ. Килограмм 48-м нэс къэзыщэчыхэрэм Данэ атекIуагъ. Нарт пшъашъэм тренерхэу Мерэм Саидэрэ Шъхьэ­лэхъо Адамрэ ипащэх. Екатерина Соловьевам, кг 70-м къехъу, апэрэ чIыпIэр къыфагъэшъошагъ, тренерыр Нэныжъ Байзэт. Бэгъ Суандэ, кг 44-рэ, тыжьыныр къы­дихыгъ, тренерыр Чэтыжъ Алый. ПIатIыкъо Заринэ, кг 63-рэ, ящэ­нэрэ хъугъэ, тренерэу Мерэм Саидэ ипащ. Артем Якушевым, кг 73-рэ, ящэнэрэ чIыпIэр къыдихыгъ. Тренерхэу Арман Галстян, Хьабэхъу Руслъан, Адзынэ Алый ипащэх.

ХагъэунэфыкIырэ чIыпIэхэр къызыфагъэшъошагъэхэр Урысыем икIэух зэнэкъокъоу Москва хэкум икъалэу Дмитровым щыкIощтым хэлэжьэщтых.

Мыекъуапэ щызэхащэгъэ зэнэ­къокъум исудья шъхьаIэу Васкан Погосян зэрилъытэрэмкIэ, Къыблэм ибэнакIохэм хэгъэгум икIэух зэнэкъокъу медаль макIэп къыщахьын алъэкIыщтыр.

— Адыгэ Республикэм ибэнэпIэ еджапIэ зыщызыгъэсагъэхэм ащыщхэр джырэ уахътэ Краснодар краим, нэмыкIхэм якомандэ­хэм афэбанэх, тренерэу Iоф ашIэ, — къытиIуагъ республикэм дзюдомкIэ ихэшыпыкIыгъэ командэ итренер шъхьаIэу, Адыгэ Рес­пуб­ликэм изаслуженнэ тренерэу Бастэ Сэлым. — Шъхьэлэхъо Аслъан, ФыIапшъэ Астемир, Юрий Гадовниковым агъэсагъэхэм ды­шъэр къыдахыгъ. Мыекъопэ бэ­нэпIэ еджапIэм лъапсэу ышIы-гъэр мэпытэ, ныбжьыкIэхэм тагъэгушIо.

Тренерхэу Беданыкъо Рэмэзан, ащ ышнахьыкIэу Байзэт, Псэунэ Мурат, Чэтыжъ Алый, Хьа­курынэ Дамир, Нэпсэу Бислъан, Адзынэ Алый, фэшъхьафхэм тызэрэщагъэгъозагъэу, агъэ­сэрэ бэнакIохэм якъулайныгъэ хагъахъо, еджэх, спортым гъэ­хъагъэ щашIыным пылъых.