Адыгэ Республикэм футболымкIэ икIэлэцIыкIу-ныбжьыкIэ спорт еджапIэ зыщызыгъасэхэрэр Крас­нодар краим изэIухыгъэ зэнэкъокъу хэлажьэх.

— 2002 — 2003-рэ, 2004-рэ, 2006-рэ илъэсхэм къэхъугъэ кIа­лэхэр апэрэ купым хэтых, — къытиIуагъ республикэм футболымкIэ икIэлэцIыкIу-ныбжьыкIэ спорт еджапIэ ипа­щэу Хьабэхъу Рустем.

— КIэух зэIукIэгъухэр командэхэм аублагъэх.

— Тэтэр Нурбый пэщэныгъэ зыдызэрихьэрэ ешIа­кIохэм ягъэхъагъэ­хэм татегущыIэ сшIоигъу.

— Адыгэ Республикэм иза­служеннэ тренерэу Тэтэр Нурбый 2006-рэ илъэсым къэхъугъэ кIалэхэм япащ. Командэ 12 купым щызэнэкъокъугъ. ПэшIорыгъэшъ зэIукIэгъухэм Адыгеим щыщ кIа­лэхэр дэгъоу ащешIагъэх. Апэрэ чIыпIэм икъыдэхын фэгъэхьыгъэ зэIукIэгъум Славянск-на-Кубани икомандэ щенэкъокъугъэх. ТиешIакIохэм 1:0-у текIоныгъэр къа­хьыгъ.

— Республикэм икIэлэ­еджакIохэм апэрэ чIыпIэр къызэрахьыгъэм сыда къы­хэбгъэщырэр?

— 2008-рэ илъэсым къыщыублагъэу тикIалэхэм апэрэ чIыпIэр зыкIи къафагъэшъошагъэп. Новороссийскэ щыкIогъэ кIэух зэнэ­къокъум тикIалэхэм IэпэIэсэныгъэу къыщагъэлъэгъуагъэм ти­гъэгушIуагъ. ТекIоныгъэм фэбэ­нэнхэм фэшI зэгурэIох, апэкIэ зилъыхэкIэ шIыкIэшIухэр къа­гъотых. Бэрэ апэкIэ зэрэлъыкIуа­тэхэрэм ишIуагъэкIэ ухъумэн Iофыгъохэр агъэцэкIэнхэр нахь IэшIэх къафэхъу.

— Ащ фэдэ ешIакIэм тренерым игущыIэ къыхэщэу олъытэба?

— Тэтэр Нурбый бэшIагъэу ныбжьыкIэхэм Iоф адешIэ, Мые­къопэ «Зэкъошныгъэм» итренерэу, тренер шъхьаIэу щытыгъ. КIалэхэм ариIон фэе гущыIэхэр игъом къегъотых, зэгъэпшэнхэр ешIых.

— Рустем, 1991-рэ илъэсым Тэтэр Нурбый зипэщэ кIэлэцIыкIу командэм Урысыем апэрэ чIыпIэр къызэрэщыдихыгъагъэр спортым пыщагъэхэм ащыгъупшэрэп.

— 1976 — 1977-рэ илъэсхэм къэхъугъэ кIалэхэр командэм хэтыгъэх. Игорь Фильченкэр, ХъокIо Къэплъан, Шэуджэн Хьэсанбый, Пэунэжь Азэмат, нэ­мыкIхэу командэм хэтыгъэхэр футболым щашIагъэх. Москва, Краснодар, Налщык, Мыекъуапэ, фэшъхьаф къалэхэм якомандэхэм ащешIагъэх.

— Футболым цIэрыIо щыхъун зылъэкIыщт кIа­лэхэр непи шъогъасэхэба?

— ЗыкъызэIуахыным, яму­радхэм афэкIонхэм афэшI Iэпы­Iэгъу тафэхъу. Сэнаущыгъэ зы­хэлъ кIэлэцIыкIубэ тэгъасэ, ягуетыныгъэ хагъэхъонэу тэгугъэ.

— Мэшэлахь, спорт псэо­лъэ дэгъухэр Адыгэ Рес­публикэм щагъэпсыгъэх. Футбол ешIэ зышIои­гъохэм япчъагъэ хэхъощтэу тэлъытэ.

— Республикэм и ЛIышъхьэу КъумпIыл Мурат, ащ ыпэкIэ рес­публикэм ипащэу щытыгъэ Тхьа­кIущынэ Аслъан, Правительствэм, Парламентым тафэраз. Ста­дионхэр, спорт псэуалъэхэр яте­плъэкIэ дахэх. Тренер IэпэIасэхэр, спорт зэнэкъокъухэм язэхэщэкIо дэгъухэр тищыкIагъэх. Физкультурэмрэ спортымрэ апыщагъэхэм япчъагъэ зэрэхэхъощтым сицыхьэ телъ. Спортыр псауныгъэм ипытапI.

— Краснодар краим апэрэ чIыпIэр къыщыдэзыхыгъэ командэм иешIакIохэм гъэзетеджэхэр ащыдгъэгъуазэхэмэ дэгъуба?

— Сигуапэу ацIэхэр къесIощтых: Аулъэ Амир, АкIэIу Амир, ГъукIэлI Джамболэт, Бырсыр Сэлым, Едыдж Тамерлан, Колмачев Александр, Катаев Ренат, Нэсыфэ Рэмэзан, Текнеджиан Михаил, ЛIыщэкъо Ренат, Хьа­пыщтэ Алан, Хьапыщтэ Иланд, Хьаткъо Адам, Хьаткъо Астемир.

— ТизэдэгущыIэгъу икIэух тренерым, командэм афэгъэхьыгъэу сыда джыри къытапIо пшIоигъор?

— Командэм итренерэу Тэтэр Нурбый ыныбжь илъэс 70-рэ хъугъэ. ЕшIакIохэм зэнэкъокъум апэрэ чIыпIэр къыщыдахи, пащэу яIэм шIухьафтын дэгъу фашIыгъ. Тиспорт еджапIэ ыцIэкIэ сэри Тэтэр Нурбый, командэм иешIа­кIохэм сафэгушIо, спортышхом нахь цIэрыIо щыхъунхэу афэсэIо.

2002 — 2004-рэ илъэсхэм къэхъугъэ кIалэхэри Краснодар краим изэнэкъокъу чанэу хэлэ­жьагъэх, финалым хэхьагъэх. Тренерхэу Пэунэжь Азэмат, Ба­тырбый Руслъан япащэхэу кIэух зэIукIэгъухэм зафагъэхьазыры. Адыгэ Республикэм имэфэкI ма- фэ тигъэхъагъэхэр фэтэгъэхьы.

— Спортышхом нахь цIэрыIо шъущыхъунэу, шъуигъэхъагъэхэм ахэ­жъугъэхъонэу шъуфэтэIо.

— Тхьауегъэпсэу.

ЕМТIылъ Нурбый.

Сурэтхэм арытхэр: Хьабэхъу Рустам; Краснодар краим ­апэ­рэ чIыпIэр къыщыдэзыхыгъэ командэу Тэтэр Нурбый зипащэр.