Адыгэ Республикэм ия 28-рэ илъэс фэгъэхьыгъэ веломарафонэу Мыекъуапэ щыкIуагъэм нэбгырэ 2500-рэ фэдиз хэлэжьагъ.

Гъатхэм кушъхьэфэчъэ спортым пыщагъэхэм язэIукIэгъухэу тикъалэ щыкIуагъэхэм ябгъа­пшэ­мэ, марафоным хэлэжьагъэхэр фэдитIукIэ нахьыбэ мэхъух.

Зэхахьэр заублэм республикэм и ЛIышъхьэу КъумпIыл Мурат физкультурэм пылъхэм къа­фэгушIуагъ, япсауныгъэ агъэпы­тэнэу афиIуагъ.

Адыгеим и Парламент и Тхьаматэу Владимир Нарожнэр, Правительствэм, Парламентым якъулыкъушIэхэр, районхэмрэ къалэхэмрэ къарыкIыгъэхэр, Мые­къуапэ щыпсэухэрэр марафоным щызэIукIагъэх. Республикэм кушъхьэфэчъэ спортымкIэ и Федерацие ипащэу Анатолий Лелюк къызэрэтиIуагъэу, зэхэщакIохэм пшъэрылъ шъхьаIэу яIэр марафоным къырагъэблэгъагъэхэм япсауныгъэ агъэпытэнымкIэ, язы­гъэпсэфыгъо уахътэ гъэшIэгъонэу агъэкIонымкIэ IэпыIэгъу афэ­хъунхэр ары.

Республикэм физкультурэмкIэ ыкIи спортымкIэ и Комитет журналистхэм апае пэшIорыгъэшъэу зэIукIэгъухэр зэхищагъэх, цIыфхэм макъэ арагъэIунымкIэ шIыкIэшIухэр къагъотыгъэх.

Хэгъэгу зэошхом иветеранэу Валентин Жуковым илъэс 95-рэ ыныбжь. ШэнышIу зэрэфэхъугъэу, кушъхьэфачъэм тесэу къалэм иурамхэм къарыкIуагъ.

— Сигуапэу зэхахьэм сыхэлажьэ, кIэлэцIыкIухэм къащыублагъэу зыныбжь хэкIотагъэмэ анэсыжьэу сыкъяджэ физкультурэм нахьыбэрэ пылъынхэу, — къытиIуагъ В. Жуковым.

Премьер-министрэм игуадзэу Сапый Вячеслав, Адыгэ Респуб­ликэм гуманитар ушэтынхэмкIэ иинститут ипащэу ЛIыIужъу Адам, министрэхэу Мэрэтыкъо Рустем, Мырзэ Джанбэч, республикэм физкультурэмкIэ ыкIи спортымкIэ и Комитет итхьаматэу Дэгужъые Мурат, нэмыкIхэу гущыIэгъу тызыфэхъугъэхэм марафоным зызэриушъомбгъурэр IофшIэгъэ дэгъукIэ алъытагъ.

Кушъхьэфэчъэ спортымкIэ рес­публикэм испорт еджапIэ зыщызыгъэсэрэ пшъашъэхэм янэ-ятэ­хэр, яныбджэгъухэр зэхахьэм ягуапэу къызэрэкIуагъэхэр къытаIуагъ, нэпэеплъ сурэтхэр къа­фэнэжьыщтых.

Мыекъуапэ иурамхэу къафа­гъэнэфагъэхэр, зы къекIокIыгъор километри 7 мэхъу, марафоным хэлажьэхэрэм къакIугъэх, зэкIэмкIи километрэ 43-рэ.

Анахь псынкIэу гъогууанэр къэзыкIущтымкIэ зэнэкъокъугъэ­хэп. Нэбгырэ пэпчъ игуетыныгъэ зэхахьэм къыщигъэлъэгъуагъ.

Пчэгур къэзыгъэдэхагъэхэр

Спорт шъошэ зэкIужьхэр ащыгъэу нэбгырэ пшIы пчъагъэ тлъэ­гъугъэ. Тэхъутэмыкъое районым иадминистрацие физкультурэмкIэ ыкIи спортымкIэ и Комитет ипащэу Джармэкъо Азмэт Бжы­хьэкъоежъым, Тэхъутэмыкъуае, Щынджые, нэмыкIхэм къарыкIыгъэхэр зэхахьэм чанэу зэрэхэлажьэхэрэм тыщигъэгъозагъ.

Щынджые къоджэ псэупIэм ипащэу ПщыукI Алыйрэ ащ игуа­дзэу Пратэкъо Налбыйрэ ку­шъхьэфачъэхэр агъэхьазырыгъэх, спорт шъуашэхэр ащыгъ. Ма­рафоным изэхэщакIохэм афэразэхэу гъогу техьагъэх.

Майкэ гъожьхэр ащыгъэу Бжыхьэкъоежъым щыщ ныб­жьыкIэхэр кушъхьэфачъэхэмкIэ къалэм иурамхэм къарыкIуагъэх. Хьатитэ Алый футбол дэгъоу ешIэ, Адыгеим изэнэкъокъу чанэу хэлажьэ. Кушъхьэфэчъэ спортри зэрэшIогъэшIэгъоныр къытфи­Iотагъ.

Республикэм кушъхьэфэчъэ спортымкIэ иеджапIэ зыщызы­гъасэхэрэ пшъашъэхэр дахэу фэпагъэх. Адыгеим икомандэ зэ­рэхэтхэр яшъуашэхэм атетхагъ. ЯтеплъэкIэ марафоныр къагъэ­кIэракIэ.

Чэчэным къикIыгъэх

Республикэм ибыракъ агъэ­быбатэзэ Чэчэным щыщ кIалэхэр кушъхьэфачъэхэмкIэ къалэм иурамхэр къакIугъэх. Купым ипа­щэу Бекхан Данзаевым къыти­Iуагъ Адыгэ Республикэм испорт­сменхэм ныбджэгъуныгъэ адыряIэу зэIукIэгъухэм зэрахэла­жьэхэрэр. ЯзэфыщытыкIэхэр щы­Iэныгъэм щагъэпытэным фэшI амалышIухэр къызэдагъотых.

Краснодар, Ставрополь край­хэм, Ростов хэкум, нэмыкI шъо­лъырхэм къарыкIыгъэхэр марафоным щытлъэгъугъэх.

Къащ Плъыжьым Адыгеимрэ Чэчэнымрэ яшъолъыр къутамэхэри марафоным щызэIукIагъэх. Юлия Бахваловамрэ Хъызыр За­хираевымрэ зэралъытэрэмкIэ, псауныгъэр зыгъэпытэрэ кушъхьэфэчъэ спортым зызэри­ушъомбгъурэм ишIуагъэкIэ кIэ­лэ­цIыкIухэри нахьыбэ хъухэу зэха­хьэм щызэIукIагъэх.

Дунаим самбэмкIэ гъогогу 11 дышъэр къыщызыхьыгъэу, Урысыем и Къэралыгъо Думэ иде­пу­татэу Хьасанэкъо Мурат иеплъы­кIэхэр щыIэныгъэм къыпкъырэ­кIых. Ащ къызэрэхигъэщыгъэу, рекорд агъэуцуным, апэрэ чIыпIэр къыдахыным зэхахьэм хэлэжьагъэхэр фэбэнагъэхэп. Арэу щытми, ипсауныгъэ зыгъэпытэ зышIоигъохэр кушъхьэфэчъэ марафоным зэфищагъэх.

Адыгэ Республикэм и ЛIы­шъхьэу КъумпIыл Мурат кило­метрэ 43-рэ хъурэ гъогур къызе­кIум ыуж марафоным хэлэжьагъэхэм гущыIэгъу афэхъугъ, нэпэеплъ сурэтхэр атырахыгъэх. Журналистхэм зэдэгущыIэгъу ады­риIагъ.

«ЩыIэкIэ-псэукIэ тэрэз цIыф­хэм яIэным марафоныр фэIорышIэ. Ныбжь зэфэшъхьафхэр зиIэхэр физкультурэмрэ спортымрэ апыщэгъэнхэм тыпылъ. Мыщ фэдэ спорт зэIукIэгъухэм кIэлэцIыкIухэм, ныбжьыкIэхэм ягуетыныгъэ къаIэты. Псауныгъэ пытэ зиIэ лIэужхэр гъэсэгъэнхэр Iофыгъо шъхьаIэхэм ахэтэлъытэ. Мыщ фэдэ зэха­хьэхэм зядгъэушъомбгъуным тапэкIи тыпылъыщт», — къы­Iуагъ КъумпIыл Мурат.

Марафоным чанэу хэлэжьа­гъэхэм, спорт унагъохэм, нэ­мыкIхэм шIухьафтынхэр аратыжьыгъэх.

ЕмтIылъ Нурбый.