Урысые Федерацием и Президент и Полномочнэ лIыкIоу Къыблэ федеральнэ шъолъырым щыIэ Владимир Устиновым республикэхэм, крайхэм ыкIи хэкухэм япащэхэм ягъусэу тыгъуасэ округым и Совет изэхэсыгъо зэхищэгъагъ. Ар зыфэгъэхьыгъагъэр хабзэм ирегиональнэ ыкIи имуниципальнэ къулыкъухэм къэралыгъо ныбжьыкIэ политикэр зэрэпхыращыщтым иIофыгъохэр ары.

Мы Iофтхьабзэм хэлэжьа­гъэх митрополитэу Меркурий, Урысыем иныбжьыкIэхэм ялIыкIо­хэр, правопорядкэмрэ лъып­лъэн IофхэмрэкIэ къулыкъухэм яIэшъхьэтетхэр. Видеоселектор шIыкIэм тетэу рекIокIыгъэ Iоф­тхьабзэм Адыгэ Республикэм ыцIэкIэ хэлэжьагъ Адыгеим и ЛIышъхьэу КъумпIыл Мурат.

Владимир Устиновым къызэрэхигъэщыгъэмкIэ, мыр округым и Совет иапэрэ зэхэсы­гъоу щыт, ар ныбжьыкIэ политикэм фэгъэхьыгъ. Урысые Федерацием щынэгъончъагъэмкIэ и Совет иунашъохэу илъэсэу икIыгъэм бэдзэогъум рахъухьэгъагъэхэм ягъэцэкIэн фытегъэ­псыхьагъэу ыкIи ащ къыпкъырыкIэу ар кIуагъэ.

«Къэралыгъом ихэгъэгу кIоцI политикэкIэ апшъэрэ мэхьанэ зэратыхэрэм мы Iо­фы­гъор ащыщ. НыбжьыкIэхэм социальнэ лъэныкъомкIэ ягу­мэкIыгъохэр ары хабзэм икъу­лыкъухэм анаIэ ренэу зытырагъэтын фаер. Шъолъыр про­граммэхэр гъэцэ­кIагъэ мэхъух, ау ащ дакIоу къэIо­гъэн фае Iэтахъохэмрэ ныбжьыкIэхэмрэ зэрахьэрэ бзэджэшIагъэхэр зэрэбэр, ны-тыхэр зышъхьарымытыжьхэм, ныбжьыкIэхэм IофшIэн зэрамыгъо­тырэм ыкIи нэмыкIхэм яп­хыгъэ Iофыгъохэр зэшIохыгъэ хъугъэхэп», — къыIуагъ Владимир Устиновым.

Ащ нэмыкIэу Урысыем и Президент и Полномочнэ лIыкIоу Къыблэ федеральнэ шъо­лъырым щыIэм анаIэ тыраригъэдзагъ культурэмкIэ региональнэ ыкIи муниципальнэ уч­реж­дениехэм, гъэсэныгъэ тедзэ язытырэ организациехэм, кIэлэцIыкIу спорт еджапIэхэм, патриотическэ объединениехэм ыкIи ныбжьыкIэхэм ятворчествэ зягъэушъомбгъугъэнымкIэ гуп­чэхэм яIофшIэн нахьышIоу зэхащэн зэрэфаем.

Экстремизмэм пэшIуекIорэ бэнэныгъэр гъэлъэшыгъэным, зэрарышхо къэзыхьырэ сектэхэм гъогур афызэпыбзыкIыгъэным, ныбжьыкIэ программэхэм мылъкоу апэIуагъахьэрэр нахьыбэ шIыгъэным, ныбжьыкIэхэм ягукъэкI дэгъухэм, игъоу алъэгъухэрэм грантхэмкIэ IэпыIэгъу ятыгъэным, джащ фэдэу яхэгъэгу шIу алъэгъоу ахэр пIугъэнхэмкIэ стратегие зыкI къыхэхыгъэным, дин конфессие зэфэшъхьафхэм ялIыкIохэр а IофшIэным нахь игъэкIотыгъэу къыхэгъэлэжьэгъэнхэм мэхьанэшхо зэряIэр къыхагъэщыгъ.

Митрополитэу Меркурий, джащ фэдэу Краснодар краим, Волгоград ыкIи Ростов хэкухэм, Къырым ыкIи Адыгеим япащэхэр зэхэсыгъом къыщыгущыIагъэх.

Адыгэ Республикэм и ЛIышъхэу КъумпIыл Мурат къызэрэхигъэщыгъэмкIэ, ныбжьыкIэ политикэм ылъэныкъокIэ рес­публикэ ыкIи муниципальнэ программэхэр нахь шIогъэ ин хэлъэу щыIэныгъэм щыпхырыщыгъэнхэмкIэ Iофтхьэбзэ те­дзэхэр мы лъэхъэнэ благъэхэм Адыгеим щырахъухьащтых.

«Непэ ехъулIэу къэралыгъо ныбжьыкIэ политикэр респуб­ликэм щыгъэцэкIэгъэным иIоф фэгъэзэгъагъэр Адыгэ Респуб­ликэм гъэсэныгъэмрэ шIэны­гъэм­рэкIэ и Министерств ары. Арэу щыт нахь мышIэми, нахь шIогъэ ин а Iофым къытыным пае шъхьа­фэу Iоф зышIэщт хабзэм икъулыкъу гъэнэфагъэ зэхэт­щэщт», — къыIуагъ КъумпIыл Мурат.

Ащ дакIоу Адыгеим и ЛIышъхьэ къызэрэхигъэщыгъэмкIэ, ныбжьыкIэ политикэр лъэныкъо заулэхэмкIэ республикэм щыпхырыщыгъэ мэхъу: волонтерствэр, дзэ-патриот пIуныгъэр, унэгъо ныбжьыкIэхэм IэпыIэгъу ятыгъэныр, ныбжьыкIэ предпринимательствэр, сэнаущыгъэ зыхэлъ ныбжьыкIэхэм IэпыIэгъу ятыгъэныр ыкIи щыIэкIэ-псэукIэ тэрэзыр пхырыщыгъэныр.

«Мы илъэсым къэралыгъо программэу ныбжьыкIэхэм япхыгъэр гъэцэкIэгъэным пае Iофтхьабзэхэу зэшIуахыщтхэм апэIуагъэхьанэу республикэм ибюджет сомэ миллион 13 къыха­гъэкIыщт. Илъэсэу къи­хьа­щтым программэ гуадзэу «Къэ­ра­лыгъо ныбжьыкIэ политикэр пхырыщыгъэныр» зыфиIорэм тегъэпсыхьагъэу илъэс къэс бюджет ахъщэу а гухэлъхэм апэIудгъахьэрэм хэдгъэхъощт», — къыкIигъэтхъыгъ КъумпIыл Мурат.

Адыгеим и ЛIышъхьэ ипсалъэ джащ фэдэу къыщыхигъэщыгъ сэнаущыгъэ зыхэлъ ныбжьыкIэхэм я Слетэу «Фыщт» зыфиIорэм регион статус иIэ зэ­рэ­хъу­гъэр. Мы илъэсым къушъ­хьэу Фыщт ылъапэ дэжь Адыгеим, Краснодар краим, Къэ­бэртэе-Бэлъкъарым ыкIи Къэрэщэе-Щэрджэсым ялIыкIо 500 фэдиз къыщызэрэугъои­гъагъ.

«Къушъхьэ лъапэм нэсэу кIалэхэр тигъусэхэу гъогур зэрэпсаоу зэпытчыгъ, лагерыр зэтетыутыгъ ыкIи зыгъэгумэкIыхэрэ Iофыгъохэм шъхьэ­ихыгъэу татегущыIагъ. Къыблэ федеральнэ шъолъырым исубъект пстэуми игъо афэсэлъэгъу а Iофтхьабзэм къы­хэлэжьэнхэу ыкIи ныбжьыкIэхэм игъоу алъэ­гъурэ, гу­хэлъ-гупшысэ шIагъоу яIэхэм къадырагъэштэнэу. ЗэрэсшIошIырэмкIэ, ащ фэдэ Iоф­тхьабзэхэм шъолъырхэр нахь зэпэблагъэ зэришIыщтхэм имы­закъоу, ныбжьыкIэ политикэм ылъэныкъокIэ нахь шIогъэ ин къэзытыщт унашъо­хэр штэгъэнхэмкIи яшIуагъэ къэкIощт», — къыIуагъ КъумпIыл Мурат.

Шъугу къэтэгъэкIыжьы: ныбжьыкIэхэм яаужырэ Слетэу щыIагъэм Краснодар краим, Къэбэртэе-Бэлъкъарым ыкIи Къэрэщэе-Щэрджэсым къарыкIыгъэ лIыкIохэм къадырагъэштагъ Адыгеим иволонтер проект инэу «Тлъапсэ къэтыухъумэн» зыфиIорэм. Ар зыфэгъэхьыгъагъэр тарихъ-культурэ ыкIи чIыопс кIэныр къэухъумэгъэныр ары.

Владимир Устиновым къызэрэхигъэщыгъэмкIэ, Адыгеим и ЛIышъхьэ къахилъхьэгъэ Iофыгъор гъэшIэгъонэу ыкIи амалышIухэр къытыхэу щыт, лъэшэу тынаIэ тетэу тыхэп­лъэнри ищыкIагъ.

Адыгэ Республикэм и ЛIышъхьэ къызэгущыIэм гуфакIохэм ягупчэу «Адыгеим иволонтерхэр» зыфиIорэм фэгъэхьыгъэу къыIотагъ. Ащ студент объединение 19 ыкIи еджапIэхэм ащызэхэщэгъэ волонтер отряди 141-рэ хэхьэ. «Добровольцы России» зыфиIорэм Адыгеим щыщ нэбгырэ мин 11,4-м ехъу щатхыгъ. Урысые кIэлэцIыкIу-ныбжьыкIэ дзэ-патриот движениеу «Юнармия» зыфиIорэм ирегион штаб юнармейцэ мини 4-м ехъу къызэлъе­убыты. Унэгъо ныбжьыкIэхэм зыщыпсэущтхэ унэхэмкIэ яIоф­хэм язытет нахьышIу шIыгъэным пае илъэсэу икIыгъэм сертификат 284-рэ аратыгъагъ, мы илъэсым – сертификат 339-рэ (сомэ миллион 240-м ехъу). НыбжьыкIэ политикэм изы лъэ­ныкъохэм ащыщ сэнаущыгъэ зыхэлъ ныбжьыкIэхэм IэпыIэгъу ятыгъэныр. Регион проектэу «Успех каждого ребенка» зыфиIорэр гъэцэкIагъэ хъуным пае гупчэу «Полярис-Адыгея» зыцIэр республикэм къыщызэIуа­хыгъ, гъэсэныгъэ зыщарагъэ­гъотырэ гупчэу «Сириусым» ехьыщырэу ар щыт.

Адыгэ Республикэм и ЛIышъхьэ ипресс-къулыкъу