Ишъхьарыхъон бзыу тамэу мэбыбы
Лъэпкъ гупшысэр щыIэныгъэм щыпхырищызэ дунаим цIэрыIо щыхъугъэ сурэтышI-модельерэу, Адыгэ Республикэм и Къэралыгъо премие къызфагъэшъошэгъэ СтIашъу Юрэ ыныбжь непэ илъэс 88-рэ мэхъу.
КъокIыпIэм щыпсэурэ лъэпкъхэм искусствэхэмкIэ я Къэралыгъо музееу Мыекъуапэ дэтым ипащэу Кушъу Нэфсэт зэгъэпшэнхэр ышIыхэзэ, СтIашъу Юрэ иIофшIагъэхэм тарихъым лъэгъо шъхьаф къыщагъэнагъэу ылъытагъ.
— Тимузей къычIахьэхэрэр апэ къызыкIэупчIэхэрэр, нахь ашIогъэшIэгъонэу зэплъыхэрэр СтIашъу Юрэ адыгэ шъуашэу, лъэпкъ тхыпхъэу ышIыгъэхэр ары. Музеим икъэгъэлъэгъонхэр Юрэ иIофшIагъэкIэ къегъэбаих, — къыIуагъ Кушъу Нэфсэт.
Гупшысэм икъежьапIэхэр
— Тарихъым, адыгэмэ ящыIэкIэ-псэукIэ сакъыпкъырыкIызэ мэстанэм Iуданэр исэщы, шэкIыр, лэныстэр къэсэштэх. Сурэтэу сыгу илъыр нахь зэрэзгъэкIэрэкIэщтым сыпылъ, — исэнэхьат екIолIакIэу фишIырэм СтIашъу Юрэ тыщегъэгъуазэ. — Мафэ къэс зыгорэм сылъэхъу, дэхагъэм, мамыр псэукIэм ситворчествэ ясэпхы.
Адыгэ Республикэмрэ адыгэ шъуашэмрэ ямэфэкIхэм афэгъэхьыгъэ шъуашэу Ю. СтIашъум джырэблагъэ ышIыгъэр зыми фэдэп. Лъэпкъым иIэпэIасэ къызэриIорэмкIэ, араб зекIоу Аль-Масуди я X-рэ лIэшIэгъум адыгэмэ яхьылIэгъэ къэбархэр зэригъашIэщтыгъэх. Щыгъынэу тилъэпкъэгъухэм ашIырэм цыр зэрэщагъэфедэщтыгъэр зекIолIым шIогъэшIэгъоныгъ. Адыгэхэм цым сатыу рашIыщтыгъ, IэкIыб къэралхэм къа- рыкIыхэрэм аращэщтыгъ.
Шъуашэу ышIыгъэм Ю. СтIашъур игъэкIотыгъэу къытегущыIэрэп, анахьэу къыхигъэщырэр щыгъын фабэу зэрэщытыр ары. Хьазырхэр лъэгъупхъэх, бгъэгур къагъэдахэ.
IэшIагъэр «къегъэгущыIэ»
Апэрэ шъуашэу СтIашъу Юрэ ышIыгъэм «Тыргъэтау» фиусыгъ. Адыгеим инароднэ артистэу Къулэ Амэрбый лъэпкъ шъуашэм техыгъэ къашъоу ыгъэуцугъэр республикэм и Къэралыгъо академическэ ансамблэу «Налмэсым» къешIы. Адыгэ Республикэм изаслуженнэ артисткэу Бэрзэдж Дианэ къашъоу «Тыргъэтаор» къыгъэлъагъо зыхъукIэ, шъуашэм идэхагъи, артисткэм иIэпэIэсэныгъи зэрэзэдиштэхэрэм концертыр къегъэбаи.
Шъуашэхэу «Адыифыр», «Нэфылъ бзыур», гъобэкъое амазонкэу «Налкъутэр», Михаил Черкесскэм фэгъэхьыгъэ шъуашэр, адыгэ бзылъфыгъэ шъуашэу «Саер», нэмыкIхэри дахэх. СурэтышI-модельерым шъуашэхэр «къегъэгущыIэх», псэ зыпыт цIыфым фэогъадэх.
«Гекатей ишъуаш», «Саусэрыкъо ишъуаш» — ахэр дзэкIолIым щыгъхэу къэлъагъох. Зэо-банэхэм цIыфхэр сурэтышIым афищэхэрэп. ИчIыгу къэзыухъумэрэм, шIу фэзышIэ зышIоигъом яобразхэр шъуашэхэм ахэолъагъо. «ТекIоныгъэм исаугъэт» зыфиIорэ хъулъфыгъэ шъошэ плъыжьым мамыр псэукIэм гукIэ ухещэ. ЦIыфым ритырэ тамэхэр зэкIещых, мамыр огум ибыбэным зэрэфэхьазырыр къыуегъашIэ.
Олимпиадэ джэгунхэу Шъачэ щыкIуагъэхэм афэгъэхьыгъэ шъуашэхэр дахэм идэхэжьых. Зэрэдунаеу ахэр щалъэгъугъэх. Къушъхьэу Фыщтым ехьылIэгъэ шъуашэу пшъашъэм щыгъыр тхыпхъэхэм, чыIухэм къагъэкIэракIэ. IапэкIэ уанэсы пшIоигъоу уяплъызэ нэфынэу къатепсэрэм зэригъэжъыухэрэм осэ хэхыгъэ уегъэшIы.
Жъогъо 12-р къызхэлыдыкIырэ шъуашэу «Адыгэ Республикэм» тишъолъыр ис лъэпкъхэр егъэгушхох. Адыгеим икъэралыгъо гъэпсыкIэ зэрэпытэр сурэтышIым къегъэлъагъо. ЩэIагъэ цIыфхэм къызхагъэфэным, мамыр псэукIэм игъэпытэн, нэмыкIхэм афэгъэхьыгъэ шъуашэхэр щыIэныгъэм «къыщэгущыIэх».
— Музеим ны-тыхэм якIэлэцIыкIухэр ягъусэхэу нахьыбэрэ къэрэкIох, — еIо Ю. СтIашъум. — Тарихъыр, искусствэр нахьышIоу зэрагъэшIэнымкIэ амалэу щыIэр арэгъэфед.
— Ти Хэсашъхьэ СтIашъу Юрэ хэт, — къытиIуагъ республикэ общественнэ движениеу «Адыгэ Хасэм» итхьаматэу ЛIымыщэкъо Рэмэзан. – Iофыгъохэм кIэщакIо, зэхэщакIо афэхъу. Кавказ заор зэраухыгъэм фэгъэхьыгъэ тамыгъэу ащ ышIыгъэр Дунэе Адыгэ Хасэм тамыгъэ хэхыгъэу ыштагъ. ЛIэужхэр зэфэзыщэрэ СтIашъу Юрэ имэфэкI фэгъэхьыгъэу гъэзетымкIи тыфэгушIо, нарт бэгъашIэ хъунэу Тхьэм тыфелъэIу.
Орэдым зэрэхэлъэу, уишъхьарыхъон бзыу тамэу мэбыбы, Юр. США-м, Тыркуем, Сирием, Иорданием, Эстонием, Германием, Грузием, Абхъазым, Москва, нэмыкIхэм уащыIагъ, дунэе къэгъэлъэгъонхэм уищытхъу ащаIуагъ. Уиунагъо удатхъэу, уинасып зыдэплъэгъужьэу ущыIэнэу, нарт бэгъашIэ ухъунэу пфэтэIо. Опсэу, Юр!
Сурэтым итыр: СтIашъу Юрэ иIофшIэгъакIэ къегъэлъагъо.