ИгущыIэ щэрыо, инэплъэгъу фабэ
Урысыем, Адыгеим янароднэ артистэу, Абхъазым, Пшызэ язаслуженнэ артистэу Кукэнэ Мурат исэнэхьат къыфэхъугъэ цIыфхэм ащыщ.
Адыгэ Республикэм и Лъэпкъ театрэу Цэй Ибрахьимэ ыцIэ зыхьырэм иартист цIэрыIоу М. Куканэм нахьыбэрэмкIэ къышIырэ рольхэр комедием нахь епхыгъэх.
— Непэ спектаклэм Кукэнэ Муратрэ Зыхьэ Заурбыйрэ хэлэжьэнхэу загъэхьазырымэ, театрэм тыкъэкIощт, — искусствэр зышIогъэшIэгъонхэм телефонкIэ къытаIоу бэрэ къыхэкIы.
Мамый Ерэджыбэ ипьесэ техыгъэу КIуращынэ Аскэрбый ыгъэуцугъэ «Псэлъыхъохэм» анэмыкI артист цIэрыIохэм къамышIыщтми, лъэпкъ культурэм шIушIагъэу щыряIэр щыIэныгъэм хэкIокIэщтэп.
— ЦIыфхэр зэрэдгъэщхыщтхэм изакъоп Iоф зыдатшIэрэр. Театрэм цIыфыр зэрипIурэр ары анахьэу тызлъыплъэрэр, — къеIуатэ Кукэнэ Мурат.
«Тартюф», «Мэдэя», фэшъхьафхэм М. Куканэм рольхэр къащешIы. Зызэрифапэрэм, макъэр зэригъэпсырэм, сценэм зэрэщызекIорэм, нэплъэгъу закъокIэ къыуиIорэм уалъыплъэзэ, артистым исэнаущыгъэ уегъэгушхо.
Гуащэм фэгъэхьыгъэ едзыгъоу къышIырэм, артисткэ цIэрыIоу Жэнэ Нэфсэт игъусэу, унэгъо зэфыщытыкIэм ехьылIагъэм, фэшъхьаф образхэм якъызэIухын зэрэхэлажьэрэм дакIоу, гитарэр къештэшъ, орэдыр къыхедзэ.
ТекIоныгъэм и Мафэ фэгъэхьыгъэ театрализованнэ къэгъэлъэгъонхэм М. Куканэр чанэу ахэлажьэ. ДзэкIолI шъуашэр щыгъ, лIыхъужъныгъэм, зэкъошныгъэм яхьылIэгъэ рольхэр гукIэ къешIых.
— СиIахьылхэр Хэгъэгу зэошхом хэлэжьагъэх, — къеIуатэ Кукэнэ Мурат. — Сяни заом щыIэу ТекIоныгъэм и Мафэ къыгъэблэгъагъ. Сикъоджэ гупсэу Тэхъутэмыкъуае сызыкIожькIэ ным ыпашъхьэ сыщысэу гущыIэ фабэу зэхэсхыхэрэр зыпэсшIынхэ щыIэп.
Театрэм и Илъэс Урысыем щэкIо. Кукэнэ Мурат адыгэхэм я Мафэ еплъыкIэу фыриIэм къытегущыIэзэ, лъэпкъэу дунаим щитэкъухьагъэм зиугъоижьын зэрэфаем гупшысэ хэхыгъэхэр фешIых. Адыгабзэр къэтыухъумэныр, лъэпкъ шэн-хабзэхэр нахьышIоу зетхьанхэр тиIофыгъо шъхьаIэхэм къахегъэщых.
— Сиадыгэбзэ гущыIэ щэрыохэмкIэ, сиорэдкIэ театрэм пыщагъэхэм сыкъызэхахы сшIоигъу, — къеIуатэ Кукэнэ Муратэ. — Театрэм и Илъэс IофшIэнэу щедгъэжьагъэхэр лъыдгъэкIотэнхэм фэшI ткъош республикэхэм ятеатрэхэм нахьыбэрэ тащызэIукIэн, упчIэжьэгъу тащызэфэхъун фае.
Гъогу чыжьэ техьэрэм гъогу благъэр псынкIэу къегъоты.
М. Куканэм ролым псэ къызэрэпигъакIэрэм, игущыIэкIэ къызэрэплъыIэсырэм имэхьанэ лъэхъанэхэм къапкъырэкIы. Сценэм тетэу нахьыбэрэ тызэригъэгушIощтым, лъэпкъ гупшысэм кIуачIэу хилъхьэ шIоигъор щыIэныгъэм зэрэщигъэлэжьэщтым тицыхьэ телъ. ШIэжьыр, культурэр, искусствэр зыщагъэлъэпIэрэ унэгъо дахэм ар щэпсэу, шIушIагъэхэм ялъэуж рэкIо.