«Налмэсым» щытхъур фаIо
Адыгэ Республикэм и Къэралыгъо академическэ лъэпкъ къэшъокIо ансамблэу «Налмэсым» Урысыем икъалэхэм концертхэр къащитыгъ.
ЗекIонхэм ахэлажьэхэрэм я Дунэе зэхахьэу Санкт-Петербург щызэхащагъэм къэралыгъуи 150-мэ ялIыкIохэр щызэIукIагъэх Петропавловскэ пытапIэм Iофтхьабзэр щылъагъэкIотагъ. Нэбгырэ 1200-рэ зычIэс залым Урысые Федерацием итворческэ куп анахь дэгъухэм концерт игъэкIотыгъэ къыщатыгъ. «Налмэсым» икъашъохэр, адыгэ шъуашэм идэхагъэ зэхэщакIохэм къыхагъэщыгъ. Концертыр къызаухым тиартистхэм къагоуцохэзэ бэмэ нэпэеплъ сурэтхэр атырахыгъэх. Дунэе туризмэм зиушъомбгъунымкIэ мэхьэнэ ин зиIэ зэхахьэм «Налмэсыр» зэрэрагъэблэгъагъэм тигъэгушIуагъ. Адыгэ Республикэм ыцIэ Iофтхьабзэм дахэкIэ щыIугъ.
Концертхэм тагъэгушхо
— Санкт-Петербург къытфэнэгушIохэу тыкъыщагъэкIотэжьыгъ, — къеIуатэ «Налмэсым» ихудожественнэ пащэу, Абхъазым, Пшызэ язаслуженнэ артистэу, Адыгеим инароднэ артистэу Хъоджэе Аслъан. — Республикэу Коми тиконцертхэр щыкIуагъэх.
— Адыгэ мэкъамэхэр, къашъохэр агу рихьыгъэхэу «Налмэсым» икъэшъуакIохэм къэбархэр къытфаIотагъэх.
— Iэгу къызэрэтфытеуагъэхэм изакъоп къыхэзгъэщырэр. Къашъо пэпчъ осэ ин къыфашIыгъ, тиартистхэр пчэгум тырамыгъэкIыжьхэ ашIоигъоу икIэрыкIэу къашъор къашIынэу къялъэIущтыгъэх.
— Аслъан, Республикэу Коми иансамблэ бэмышIэу Адыгеим щыIагъ, шъузэгъусэу концертэу къэжъугъэлъэгъуагъэм Мыекъуапэ тыщеплъыгъ.
— Республикэм и Къэралыгъо орэдыIо-къэшъокIо ансамблэу «Асъя Кыа» зыфиIорэм Виктор Морозовым ыцIэ ехьы. «Сыбыр къыщыублагъэу Къыблэм нэс» ыIоу ансамблэм концертэу Мыекъуапэ, Краснодар къащитыгъэр тщыгъупшэрэп. Искусствэм тизэпхыныгъэхэр щэпытэх.
— Коми апэрэу шъукIуагъ, концертэу къэшъутыгъэхэм бысымхэм сыда анахьэу къахагъэщыгъэр?
— Лъэпкъ искусствэм ибаиныгъэхэр, адыгэ шъуашэм идэхагъэ, адыгэ орэдышъор гум зэрэлъыIэсырэр – ахэр зэдиштэхэу зэрэгъэпсыгъэхэм уасэу къыфашIыгъэм тигъэгушIуагъ. Нэбгырэ 1500-рэ зычIэс залым тIысыпIэ щызымыгъотыгъэхэм ягумэкIхэр къытаIуагъ. Нахьыбэрэ тызэхэхьан зэрэфаер лэжьэкIо къызэрыкIохэм тизэдэгущыIэгъухэм къащыхагъэщыгъ.
— «Налмэсыр» зышIогъэшIэгъонхэм япчъагъэ хэхъуагъ.
— Адыгеир нахьышIоу ашIэ хъугъэ. ЗекIохэм ахэлажьэхэрэм тиреспубликэ зэрагъэлъэгъу ашIоигъу.
— Нижний Новгород шъуипчыхьэзэхахьэ зэрэщыкIуагъэм тыщыгъуаз. Къэлэшхом «Налмэсым» сыд фэдэ лъэужа къыщигъэнагъэр?
— Урысыем икъэлэшхо футболымкIэ дунэе зэIукIэгъухэр щыкIуагъэх, артист цIэрыIохэм концертхэр къыщатых. Къалэм дэсхэм ашIогъэшIэгъоныр макIэп. СыхьатитIум къыкIоцI тиконцерт къэралыгъо филармониеу М. Л. Ростропович ыцIэ зыхьырэм щыкIуагъ.
— Концертым изэхэщакIо хэушъхьафыкIыгъэу укъытегущыIэ зэрэпшIоигъор къытэпIогъагъ.
— Бизнесым пылъ тилъэпкъэгъоу, компаниеу «Каркас Монолитым» изэхэщакIоу Къайнар Нарт Мехьмет Эмин пчыхьэзэхахьэр къалэм иконцерт къэтыпIэ анахь дэгъум щызэхищагъ. Бысымхэри, тэри лъэшэу ащ тыфэраз.
— Урысыем икъэлэшхомэ шъуащыIагъ, зэпхыныгъэхэр творческэ купхэм адэшъушIыгъэба?
— ТызэлъыкIощт, хэгъэгум иобщественнэ-политикэ щыIакIэ чанэу тыхэлэжьэщт. Адыгэ шъуашэм и Маф
— Iоныгъом и 28-м адыгэ шъуашэм и Мафэ тиреспубликэ щагъэмэфэкIыщт.
— Республикэм и Правительствэ иунашъокIэ «Налмэсыр» мэфэкIым иконцерт программэ фэгъэзагъ. Тигуапэу зэхахьэм тыщыуджыщт.
— Филармонием мафэм сыхьатыр 4-м зэхахьэр щаублэщт.
— Лъэпкъ шIэжьым, искусствэм апыщагъэхэр, адыгэ шъуашэм идэхагъэ зэзыгъэлъэгъу зышIоигъохэр зэхахьэм къетэгъэблагъэх.
— ТапэкIи цIыфхэр жъугъэгушIонхэу, шъуигухэлъхэр къыжъудэхъунхэу шъуфэтэIо.
— Тхьауегъэпсэу.
ЕМТIылъ Нурбый.
Сурэтхэм арытхэр: Хъоджэе Аслъан; «Налмэсым» икъэшъуакIохэр.