2019-рэ илъэсыр — Тхьабысымэ Умарэ и Илъэс
Зэрэдунаеу иорэдхэр щэжъынчых
Адыгэ музыкальнэ культурэм лъэуж дахэ къыхэзыгъэнэгъэ Тхьабысымэ Умарэ ыцIэ зэхимыхыгъэу е ымышIэу Адыгэ Республикэм цIыф исэп пIоми хэукъоныгъэ хъущтэп.
Научнэ-ушэтэкIо институтым иIофышIэхэм ягъусэу, адыгэ къуаджэхэр бэрэ ащ къыкIухьэщтыгъэх, лъэпкъ IорIуатэр къыугъоищтыгъ. ШIэныгъэлэжьэу Гъыщ Нухьэ къызэриIуагъэмкIэ, композиторэу Тхьабысымэ Умарэ научнэ экспедициеу институтым зэхищэщтыгъэхэм ишъыпкъэу ахэлажьэщтыгъ. Джащ фэдэу 1958-рэ илъэсым ХьэдэгъэлIэ Аскэр зэхищэгъэгъэ фольклорнэ экспедицием тыхэтэу, тэ тыстудентэу Умари тигъусэу, Шэуджэн районым тыщыIагъ. Хьатыгъужъыкъуае (Пщычэу) щыщэу, АКъУ-м икIэлэегъаджэу Нэшъулъэщэ Аминэ иунэ тыригъэблагъи тисыгъ. Тхьабысымэ Умарэ уригъусэнкIэ цIыф гупсэфэу щытыгъ, тигъэчэфыщтыгъ, гущыIэгъу къытфэхъущтыгъ, пщынэм къытфеощтыгъ, адыгэ орэдхэр къытфиIощтыгъэх. УедэIу зыхъукIэ узыIэпищэу, гур къыдищаеу, шъхьэкIафэ зыфыуигъэшIэу щытыгъ. Иорэд къэIуакIэрэ ипщынэ къеуакIэрэкIэ узэлъызыкIурэ зэчый Тхьэм къыхилъхьагъэу хэлъыгъ. Ащ ыпсэ хэтIагъэу адыгэ орэдыжъхэу цIыфхэм ахэлъхэр къыугъоищтыгъэх. Тхьабысымэм ыцIэ дышъэ хьарыфкIэ адыгэ лъэпкъым итарихъ, икультурэ хэтхагъ. Къызщыхъугъэ районым игупчэу Кощхьаблэ исаугъэт щагъэуцуныр тефэ.
Композитор цIэрыIоу Тхьабысымэ Умарэ гъэхъагъэу иIэхэр къыдилъытэзэ ар илъэсишъэ зэрэхъугъэр лъэпкъым хегъэунэфыкIы. Джырэ адыгэ музыкальнэ искусствэм лъапсэ фэзышIыгъэ композитор цIэрыIом ищыIэныгъэ гъогу ехьылIэгъэ гукъэкIыжьхэр, тхыгъэхэр, республикэм игъэзет нэкIубгъомэ къарэхьэх, радиомрэ телевидениемрэ якъэтынхэм ахагъахьэх, ащ ыцIэкIэ фестиваль-зэнэкъокъухэр район гупчэхэм ащызэхащэх. Джырэблагъэ Адыгэ Республикэм и Лъэпкъ тхылъеджапIэ сызычIахьэм, мэфэкI къэгъэлъэгъонэу «Адыгэ лъэпкъым иорэдыIу» зыфиIоу нотнэ-музыкальнэ литературэм иотдел ыгъэхьазырыгъэм нэIуасэ зыфэсшIыгъ. Ар зыгъэхьазырыгъэр отделым иIофышIэ чанэу Татьяна Домрачевар ары.
МэфэкI къэгъэлъэгъоныр
Iахьищэу зэтеутыгъэ: апэрэм хэхьэ орэдусым, орэдыIом, пщынэо IэпэIасэм щыIэныгъэ гъогоу къыкIугъэмрэ имузыкальнэ творчествэ зэрэуцугъэмрэ, ятIонэрэ Iахьым Тхьабысымэм иорэдхэр къыздэхьэгъэ тхылъхэр хэлъых. МэкIаем тетэлъагъо композиторым иапэрэ сборникэу «Адыгэ орэдхэр» зыфиIоу 1960-рэ илъэсым къыдигъэкIыгъэр. Ащ къыкIэлъыкIуагъэх «Здравствуй, Кавказ» (1968), Мамый Ерэджыбэ ипьесэу «Щытхъум игъогу» (1969) зыфиIорэр (орэдышъор зытхыгъэр Тхьабысымэ Умар). Я 80 — 90-рэ илъэсхэм къыдигъэкIыгъэ сборникхэу «Гум иорэдхэр» (1983), «Сихэку — сиорэд» (1989), «Тыгъэм орэд фэсэIо» (1993), нэмыкI сборникхэри къэгъэлъэгъоным щэшIэтых. Ахэр адыгабзэкIэ, къэбэртэябзэкIэ, урысыбзэкIэ Мыекъуапэ, Налщык, Краснодар къащытырадзагъэх.
Ежь Тхьабысымэ Умарэ зэрилъытэщтыгъэмкIэ, къыодэIурэ цIыфхэм апае гум зызэIуиубгъукIын фаеу ары. «Ащ нэмыкIэу гупшысэхэрэр искусствэм хэбгъэтхэ хъущтэп, сыдми уизэщ тебгъэунэу музыки, уси, орэди птхынхэ плъэкIыщтэп».
Тхылъ къэгъэлъэгъоным иящэнэрэ Iахь зыфэгъэхьыгъэр хэкум иапэрэ профессиональнэ композиторэу Тхьабысымэ Умарэ ыкIуачIэрэ ишIэныгъэрэ иадыгэ лъэпкъ хэхъоныгъэ егъэшIыгъэным зэрэфигъэIорышIагъэм ехьылIагъэу ратхылIагъэхэр ыкIи къыдагъэкIыгъэ тхылъхэр арых. «Тхьабысымэ Умар. ЩыIэныгъэм инэкIубгъохэр» зыфиIорэ тхылъэу къэгъэлъэгъоным къытырагъэуцуагъэр зытхыгъэхэр музыкантхэу, композиторхэу Бысыдж Муратрэ А. Полянскэмрэ. Краснодар тхылъ тедзапIэм и Адыгэ отделение иIофышIэу И. Атаманенкэр ягъусэу урысыбзэкIэ ар къыдагъэкIыгъ. 2008-рэ илъэсым композиторым итворчествэ фэгъэхьыгъэ тхылъэу «Снова звучит голос твой» зышъхьэр композиторэу Тыкъо Къэплъан къыдигъэкIыгъ. Мы тхылъым къыгот Тхьабысымэ Умарэ илъэси 100 зэрэхъугъэм пае Адыгэ Республикэм и Лъэпкъ тхылъеджапIэ къыдигъэкIыгъэ узыгъэгъозэрэ «Ното-библиографический указатель» зыфиIорэр. Ар зэхэзыгъэуцуагъэр Гусэрыкъо Сусан.
ЗэлъашIэрэ усакIохэу Расул Гамзатовым, КIыщэкъо Алим, МэщбэшIэ Исхьакъ, Баграт Шинкуба, ХьэдэгъэлIэ Аскэр, Жэнэ Къырымызэ, Хъунэго Нурыет, Нэхэе Руслъан, нэмыкIхэми яусэхэм атехыгъэ орэд дахэхэу 600 фэдиз хъоу итхылъхэм къадэхьагъэхэр ытхыгъэх. Мыщ пыдзагъэу Умарэ ыусыгъэ орэдхэмрэ мэкъамэхэмрэ яконцертхэм ахагъахьэзэ лъэпкъ искусствэр лъагэу зыIэтыгъэ цIыф цIэрыIохэу Шъэожъ Розэ, Андзэрэкъо Чеслав, КIыкI Зулхьаджэ, Тыу Шыхьамчэрые, Жэнэ Нэфсэт, Мэт Жаннэ, ЛъэпцIэрыкъо Кимэ, нэмыкIхэми ацIэхэр тэлъэгъух. Джащ фэдэу къэгъэлъэгъоныр нахь гъэшIэгъон къэзышIырэр орэдусым фэгъэхьыгъэу тхакIохэм, композиторхэм, журналистхэм къатхыгъэхэр ащ зэрэхагъэуцуагъэхэр ары. ТхэкIошхоу МэщбэшIэ Исхьакъ игущыIэхэу «Тхьабысымэ Умарэ адыгэ орэдхэм якультурнэ щыIакIэ зыфэдэ къэмыхъугъэ цIыфэу хэт» ыIоу гупчэм ит.
Хэгъэгум щызэлъашIэрэ композиторхэу Родион Щедрин, Ян Френкель, Владислав Казениным, Мурад Кажлаевым творческэ гъусэныгъэ Умарэ адыриIагъ, ащ иIэпэIэсэныгъэкIэ мэхьанэшхо иIагъ, ежь ышъхьэкIэ осэшхо афишIыщтыгъ.
Нотнэ-музыкальнэ литературэм иотдел ипащэу Гусэрыкъо Сусанэ къызэриIуагъэу, композиторым игъэкIотыгъэ авторскэ концертхэр ткъош республикэхэм къащитыщтыгъэх, осэ ин къыфашIыщтыгъ. Ащ имэкъамэхэр зыми хэкIуакIэхэрэп. Сыда зымыуасэр апэрэ адыгэ оперэу «Лэукъан» иорэдышъо мэкъамэ?! Имузыкальнэ произведениехэм рапсодиехэр, сонатэхэр, концертхэр, ораториехэр, нэмыкIхэри ахэтых.
— Фронтым епхыгъэ игукъэкIыжьхэр ащ ипроизведениябэхэм лъапсэ афэхъугъ, — еIо Сусанэ. — ОрэдыIо цIэрыIо Умарэ зыхъугъагъэр 1957-рэ илъэсым Москва щыIэгъэ «декадэм» орэдхэу «Письмо солдату», «Моя Габидет», нэмыкIхэри къызыщеIохэр ары. Жанрэ зэфэшъхьафхэмкIэ тхэщтыгъэ, ар анахьэу зыфэщагъэу зыкъызщигъэлъэгъуагъэр орэдусыныр ары. Умарэ иорэдхэр лъэпкъым илIыхъужъхэм, илэжьакIохэм, иныбжьыкIэхэм, тикъуаджэхэм, мамырныгъэм, шIулъэгъуныгъэм афэгъэхьыгъэх. Ащ иорэдхэр лъэхъанэ пэпчъ диштэу гъэпсыгъэх. Иорэд анахь дэгъухэм ащыщых «О унитIу», «Сикъуадж», «Джэгу», «СикIасэм сыкъыдэшъо», «Адыгееу сигупсэу сикIас» зыфиIохэрэр. Журналистэу ЛIыIужъу Марыет итхыгъэ зэрэщыхигъэунэфыкIырэмкIэ, «Синан» зыфиIорэ орэдым нэмыкI Умарэ ымытхыгъэми, ишIушIагъэ гъунэнчъэу къанэщтыгъ.
Тхьабысымэ Умарэ Урысыемрэ Адыгэ Республикэмрэ янароднэ артистыгъ, АР-м и Къэралыгъо премие илауреатыгъ, Пшызэ шъолъыр искусствэхэмкIэ изаслуженнэ IофышIэшхуагъ, Мыекъуапэ ицIыф гъэшIогъагъ, АР-м икомпозиторхэм я Союз итхьамэтэ гъэшIуагъэщтыгъ, Жъогъо Плъыжьымрэ Хэгъэгу зэошхомрэ яорденхэу а 1-рэ степень зиIэхэм якавалерыгъ ыкIи медальхэу «За взятие Берлина», «За освобождение Варшавы» зыфиIохэрэр къыфагъэшъошэгъагъэх. Адыгэ Республикэм искусствэхэмкIэ иколледж Тхьабысымэм ыцIэ ехьы, композиторыр зыщыпсэущтыгъэ унэу Мыекъуапэ дэтым мыжъобгъу, икъуаджэу Фэдз музей къыщыфызэIуахыгъ.
МэфэкI къэгъэлъэгъоныр лъэпкъым икультурэ, итарихъ къыткIэхъухьэрэ ныбжьыкIэхэм ягъэшIэгъэнымкIэ ишIуагъэ къэкIощт. Илъэпкъ ыпашъхьэ шIушIэгъабэ щызиIэ композиторым, орэдыIом, пщынаом ыцIэ хэгъэгу культурэм хэуцуагъ.
ШэкIо Мир.