Аужырэ илъэсипшIым шIэныгъэлэжьхэм къаIо чIыгу шъхьашъом изытети итеплъи зэхъокIыныгъэхэр зэрафэхъухэрэр. Мылылъэ инхэр мэжъух ыкIи зэщэкъох, зэлъаубытыщтыгъэ шъолъырхэм къащэкIэ, чIышъхьашъом зызэблехъу.

ТапэкIэ илъэс мычыжьэхэм тыкъэзыуцухьэрэ дунаим изытет ащ фэдэщтмэ, мылылъэхэм азыщанэ фэдизыр зэрэткIущтыр специалистхэм къыхагъэщы. Джащ фэдэ зэхъокIыныгъэхэр Темыр Кавказми щагъэунэфы.

Росгидрометымрэ Кавказ биосфернэ заповедникым иIофышIэхэмрэ заповедникым имылылъэхэм язытет зыфэдэр зэрагъэшIэнэу рагъэжьагъ. Геофизическэ институтым (къ. Налщык) ишIэны­гъэлэжь куп заповедникым испециалистхэр ягъусэхэу ащ ишъолъыр къабыбы­хьагъ, хыкъумэу хэтхэм сурэтхэр къатырахыгъэх. Ахэм къушъхьэхэу ЧIы­гушъхь, Цахвоа, Фыщт имылылъэхэр ахэхьэх. «НэмыкI чIыпIэхэми зэращы­хъурэм фэдэу Кавказ заповедникми имылхэм къащыкIэу рагъэжьагъ. Мы лъэхъанымкIэ ар экологием фэгъэхьыгъэ Iофыгъо инэу шIэныгъэлэжьхэм апашъхьэ къеуцо, — къаIуагъ уплъэкIунхэр зышIыхэрэм. — Ахэм унаIэ атетынэу, къэхъун ылъэкIыщтхэм уягупшысэнэу щыт».

Специалистхэм къызэраIорэмкIэ, мылылъэхэр къэжъухэу зэрэрагъэжьагъэр дунаир нахь фабэ къызэрэхъурэм епхыгъ. ЧIыгум температурэу иIэми къызыхахъокIэ, егъэшIэрэ мылхэри нахь псынкIэу къэткIухэу рагъэжьэщт.

(Тикорр.).