Мыекъопэ бэнэпIэ-еджапIэм лъапсэ фэзышIыгъэу, СССР-м изаслуженнэ тренерэу, я ХХ-рэ лIэшIэгъум Урысыем дзюдомкIэ итренер анахь дэгъоу Кобл Якъубэ фэгъэхьыгъэ зэнэкъокъу апэрэу ПсышIуапэ щыкIуагъ.

Краснодар краимрэ Адыгэ Республикэмрэ ябэнакIохэр дзюдомкIэ зэнэкъокъугъэх. НатIэкъо Мэдин, кг 55-рэ, апэрэ чIыпIэр къыдихыгъ, тренерыр Роман Оробцов. Алексей Щербак, кг 55-рэ, Игорь Костыркин, кг 42-рэ, Пэрэныкъо Амир, кг 26-рэ, ящэнэрэ чIыпIэхэр къахьыгъэх. КIэлэеджакIохэм япащэх тренерхэу Мерэм Саидэ, Беданыкъо Байзэт, Сергей Шутовыр.

БэнэкIо 200-м нахьыбэ алырэгъум щызэIукIагъ. Кобл Якъубэ ехьылIэгъэ къэбархэр, тарихъым епхыгъэ хъугъэ-шIагъэхэр зэхахьэм къыщаIотагъэх.

— Мыекъуапэ щеджагъэхэу спортым цIэрыIо щыхъугъэхэр, Кобл Якъубэ щыIэныгъэм щызышIэщтыгъэхэр ПсышIуапэ щызэIукIагъэх, — къеIуатэ Адыгэ Республикэм дзюдомкIэ испорт еджапIэу Кобл Якъубэ ыцIэ зыхьырэм ипащэу, Адыгеим дзю­домкIэ ихэшыпыкIыгъэ командэ итренер шъхьаIэу Бастэ Сэлым.

Урысыем дзюдомкIэ ихэшыпыкIыгъэ командэ итренер шъхьаIэу, Олимпиадэ джэгунхэм джэрзыр къащыдэзыхыгъэ Тао Хьэсанбый, Урысыем дзюдомкIэ итренерэу Гъэунэ Андзор, Кобл Якъубэ ишъ­хьэгъусэу Джарэт, тренер цIэры­Iом иIахьылхэр, районым иадминистрацие икъулыкъушIэ­хэр, спортым иIофышIэхэр зэнэ­къо­къум еплъыгъэх, зэдэгущыIэгъухэм ахэ­лэжьагъэх, нэпэеплъ сурэтхэр аты­рахыгъэх. ХэушъхьафыкIыгъэ ме­дальхэр бэнакIо­хэм аратыжьыгъэх.

Мыекъуапэ щыкIощт

Урысыем и Кубок дзюдомкIэ къыдэхыгъэнымкIэ тыгъэгъазэм зэнэкъокъоу Мыекъуапэ щыкIощтыр Кобл Якъубэ псаугъэмэ, ыныбжь илъэс 80 зэрэхъущтгъагъэм фэгъэхьыгъ.

ЗэхэщакIохэм тызэрэщагъэгъо­загъэу, Кубокым икъыдэхын ехьылIэгъэ зэIукIэгъухэр игъэкIотыгъэу Мыекъуапэ щызэхащэщтых. Ахэр зыщыIэщтхэ мафэхэр, нэмыкI къэбархэу цIыфхэр зыгъэ­гъозэщтхэр «Адыгэ макъэм» къыщыхэтыутыщтых.

Сурэтым итхэр: Хь. Таор, С. Бас­тэр, А. Гъэунэр, Р. Хьагъу­рыр, Б. Хьатхыр, В. Цамаевыр.