«Ростов-Дон» Ростов-на-Дону – «Адыиф» Мыекъуапэ – 45:16. Iоныгъом и 19-м Ростов-на-Дону щызэдешIагъэх.

Урысыем игандбол бзылъфыгъэ командэ анахь лъэшхэм ащыщэу «Ростов-Доныр» Европэм и Кубок къыдэхыгъэным хэлажьэ. Хэгъэгухэм яхэшыпыкIыгъэ командэхэм яешIэкIо 14 «Ростов-Доным» хэт. Ащ фэдэ командэ лъэшым «Адыифыр» текIоным непэ фэхьазырэп.

«Адыифым» итренер шъхьаIэу Александр Реввэ къытиIуагъ Алина Морозовар, Алиса Дворцеваяр, Диана Казихановар, Кобл Зурет, нэмыкIхэри бэрэ апэкIэ зэрилъыщтыгъэхэр, ау къэлэпчъэIутэу Галина Габисовар, ухъумакIохэр цыхьэшIэгъоу ешIэщтыгъэх. «Ростов-Доныр» еужьырзэ ошIэ-дэмышIэу ыпэкIэ илъыным, хъагъэм Iэгуаор ридзэным зафигъэсагъ, тикъэлэпчъэIутэу Людмила Баскаковар иIэпэIэсэныгъэкIэ къахэщыгъ, бэрэ Iэгуаор къызэкIидзэжьыгъ, ау къэлапчъэм Iэгуаор къызэрэшIудадзагъэр макIэп.

Чъэпыогъум и 5-м «Адыифыр» «Звезда» Звенигород Мыекъуапэ щыIу­кIэщт. Республикэм имэфэкI мафэ типшъашъэхэм гъэхъагъэ ашIынэу, тагъэгушIонэу афэтэIо.