Урысыем кушъхьэфэчъэ спортымкIэ изэнэкъокъу Адыгэ Республикэм игъогухэм ащыкIуагъ. Хъулъ­фыгъэхэр едзыгъохэм ахэлэжьагъэх.

Хэгъэгум ишъолъырхэм яспорт­смен 80 текIоныгъэм икъыдэхын фэбэнагъ. Мыекъуапэ икIыхэзэ Шэуджэн, Кощхьэблэ, Джэджэ, Апшеронскэ районхэм, нэмыкIхэм ягъогухэр къакIугъэх. Мафэ къэс километри 100-м нахьыбэ къызэранэкIыщтыгъ.

Едзыгъохэм якIэуххэр зызэфа­хьысыжьхэм, Москва хэкум испортсменэу Николай Мартыновым апэрэ чIыпIэр фагъэшъошагъ.

Тиреспубликэ щыщхэм Аджырэ Азэмат къахэщыгъ. Медаль къыдимыхыгъэми, щысэшIу къыгъэлъэгъуагъ. Икъулай ыгъэфедэнымкIэ зэнэкъокъум шIэныгъэу щызэригъэгъотыгъэр къышъхьапэщт.

— Зэнэкъокъум изэхэщэнкIэ республикэм иIэшъхьэтетхэр, спортым, полицием якъулыкъу­шIэхэр IэпыIэгъу къытфэхъугъэх. ГъэзетымкIи «тхьашъуегъэпсэу» ятIожьы тшIоигъу, — къытиIуагъ Адыгэ Республикэм кушъхьэ­фэ­чъэ спортымкIэ и Федерацие итхьаматэу Анатолий Лелюк. — Адыгеир спортышхом нахьы­шIоу щашIэ хъугъэ, тапэкIи Урысыем изэнэкъокъухэр респуб­ликэм щызэхащэщтых.

Загъэхьазыры

Адыгэ Республикэм испорт­сменхэу Елизавета Ошурковамрэ Александр Евтушенкэмрэ Урысыем ихэшыпыкIыгъэ командэхэм ахэтых. Дунаим кушъхьэ­фэчъэ спортымкIэ изэнэкъокъу Iоныгъом и 22-м Англием щырагъэжьэщт. Тиспортсменхэм зэ­IукIэгъухэм зафагъэхьазыры.

СтIашъу Мамыр ипсауныгъэ зыпкъ иуцожьыгъэу Европэм изэIукIэгъухэм ахэлажьэ. Словакием щыкIощт зэIукIэгъоу «Тур Словакии» зыфиIорэм иIэпэIэсэныгъэ къыщигъэлъэгъощт.