Къыблэ федеральнэ шъолъырым хэхьэрэ субъектхэм япащэхэм язэIукIэгъоу Урысые Федерацием щынэгъон­чъагъэмкIэ и Совет исекретарэу Николай Патрушевым зэрищагъэр тыгъуасэ Волгоград щыкIуагъ. ЧIыопс, техногеннэ нэшанэ зиIэ тхьамыкIагъохэр къэмыгъэхъугъэнхэмкIэ шIэгъэн фаехэм зэIукIэгъум щатегущыIагъэх.

Iофтхьабзэм хэлэжьагъэх Урысые Федерацием и Президент и Полномочнэ лIыкIоу Къыблэ федеральнэ шъолъырым щыIэ Владимир Устиновыр, шъолъырхэмрэ хабзэм ифедеральнэ къулыкъухэмрэ япащэхэр. Адыгеим ыцIэкIэ зэIукIэгъум хэлэжьагъ республикэм и ЛIышъхьэу КъумпIыл Мурат.

МашIом зыкъымыштэнымкIэ амал икъухэр зэрахьан зэрэфаем Николай Патрушевым Къыблэ федеральнэ шъолъырым хэхьэрэ субъектхэм япащэхэм анаIэ тыраригъэдзагъ. Унэхэр шIэхэу къагъэплъэу зэрэрагъэ­жьэщтым епхыгъэу газ оборудованиер щынэгъончъэу гъэфедэгъэнми мэхьанэшхо зэриIэр ащ къыIуагъ.

Урысые Федерацием щынэгъончъагъэмкIэ и Совет исекретарь къызэрэхигъэщыгъэмкIэ, машIом зыкъыщимыштэным ищынагъо Къыблэ федеральнэ шъолъырым шъхьащыт. ГъэрекIо гъогогъу мин 59-рэ машIом мыщ зыкъыщиштагъ, ахэм нэбгырэ 722-рэ ахэкIодагъ.

«МашIом зыкъыштэнымкIэ мэзхэм джыри щынагъо зэрашъхьарыт. Мыгъэ КъокIыпIэ Чы­жьэмрэ Сыбыррэ тхьамыкIа­гъоу къащыхъугъэхэм къагъэлъэ­гъуагъ машIом зыкъымыштэ­ным­кIэ шапхъэхэр зэраукъохэрэм тхьамыкIэгъошхохэр къакIэ­лъыкIон зэралъэкIыщтыр», — къыIуагъ Николай Патрушевым.

ЗэIукIэгъум къызэрэщыхагъэ­щыгъэмкIэ, гъэрекIуи, мыгъи ошIэ-дэмышIэ тхьамыкIагъоу шъолъырым къыщыхъугъэхэм нэбгырэ мини 6-м ехъумэ зэрар арахыгъ, сомэ миллиарди 2,2-рэ ахэм чIэнагъэу арагъэшIыгъ.

Экстремизмэм Интернетым щыпэуцужьыгъэным, хабзэм ирегион къулыкъухэм ящынэ­гъончъагъэ гъэлъэшыгъэным, машIом сатыу гупчэхэм закъы­щимыштэнымкIэ шапхъэу щыIэхэр къызэрэдалъытэхэрэм, щынагъоу щыт зэпахырэ узхэр цIыфхэм къямыгъэутэлIэгъэнхэмкIэ былымхъуным ветеринар шапхъэхэр къызэрэщыдалъы­тэхэрэм япхыгъэ Iофыгъохэми зэIукIэгъум щатегущыIагъэх.

Зигугъу къэтшIыгъэ лъэхъаным техногеннэ нэшанэ зиIэ тхьамыкIагъо гори Адыгеим щагъэунэфыгъэп. Ошъушхом ыпкъ къикIыгъэ зы тхьамыкIагъо республикэм къыщыхъугъ. Ащ Мыекъопэ районымкIэ поселкэу Цветочнэм дэт уни 105-рэ кIэлэцIыкIу IыгъыпIэмрэ зэрар арихыгъ. ТхьамыкIагъом къыздихьыгъэ­хэм ядэгъэзыжьынкIэ IофшIэнхэр аухыгъахэх. Зимылъку­кIэ чIэнагъэ зышIыгъэ­хэм Адыгэ Республи­кэм иминистрэхэм я Кабинет иIэпэчIэгъэнэ фонд щыщ зэтыгъо ахъщэ Iэпы­Iэгъу ара­тыгъ.

Адыгеим ипсыхъохэр лъэшэу къызэрэдэкIоегъагъэхэр, ау псыр нэпкъхэм къазэрэдэмыкIыгъэр зэIукIэгъум къыща­Iуагъ. Къэралыгъо программэхэм къадыхэлъытагъэу, республикэм иминистрэхэм я Кабинет иIэпэчIэгъэнэ фонд имылъкукIэ гидротехническэ псэуалъэ­хэр агъэпсых ыкIи агъэцэ­кIэжьых.

Адыгэ Республикэм иавтоном учреждение хэушъхьафыкIыгъэу «Мэзхэм якъэухъумэн фэгъэзэгъэ къулыкъум» илъэсыр къызихьагъэм щегъэжьагъэу мэшIуитIоу мэзхэм къащыхъугъэр агъэкIосэжьыгъ.

БлэкIыгъэ илъэсым джащ фэдэ илъэхъан егъэпшагъэмэ, мыгъэ машIоу къэхъугъэр проценти 7-кIэ зэрэнахь макIэр Iоныгъом и 1-м ехъулIэу къаты­гъагъ. МашIом зыкъымыштэнымкIэ шапхъэхэр зыукъуагъэхэм афэгъэхьыгъэу административнэ Iоф 846-рэ къызэIуахыгъ. Урысыем и МЧС Адыгэ Респуб­ликэмкIэ и ГъэIорышIэпIэ шъхьа­Iэрэ гъэцэкIэкIо, муниципальнэ хабзэм икъулыкъухэмрэ тхьамыкIагъохэр нахь макIэ шIыгъэн­хэм атегъэпсыхьэгъэ амалхэр зэрахьэх.

МашIом зыкъымыштэнымкIэ нэмыкI амалхэри зехьэгъэнхэм Адыгеим и ЛIышъхьэ лъэшэу ынаIэ тырегъэты. Республикэм ипащэхэмрэ Урысыем и МЧС Адыгэ РеспубликэмкIэ и ГъэIорышIэпIэ шъхьаIэрэ мы лъэныкъомкIэ язэдэлэжьэныгъэ лъа­гъэкIотэнэу, мэшIогъэкIосэ постхэм зэхъокIыныгъэхэр афашIынхэу, мэшIогъэкIосэ частхэр зэхащэнхэу рахъухьэ. МэшIогъэкIосэ частэу N 1-м мэшIошхохэр зыгъэкIосэжьыщт часть шъхьаф щызэхэщэгъэным тегъэпсыхьэгъэ Iофхэр зэрахьэх. ЦIыфхэр машIом щыухъумэ­гъэнхэм пае 2023-рэ илъэсым нэс Тэхъутэмыкъое, Красногвардейскэ, Кощхьэблэ, Мыекъопэ районхэм мэшIогъэкIосэ подразделении 6 ащызэхащэнэу рахъухьэ.