Марафоным хэлэжьагъэх
Тызыхэт илъэсыр — театрэм и Илъэс. Ащ фэгъэхьыгъэ Iофтхьабзэу чIыпIэ зэфэшъхьафхэм ащызэхащэхэрэм ащыщэу анахь игъэкIотыгъэу хъугъэр Урысые театральнэ марафоныр ары.
Ар илъэсым иапэрэ мазэ Владивосток къыщырагъэжьэгъагъ, илъэсым ыкIэм Калининград щаухыжьыщт.
Шъолъыр театрэхэр зыхэлэжьэхэрэ Iофтхьабзэхэм марафоным итамыгъэ щызэIэпахы. Мы лъэхъаным ар Астрахань къэсыгъ, марафоныр зыщылъагъэкIотэрэ къалэхэм ар я 63-рэ хъугъэ. Нэужым эстафетэр къалэхэу Краснодар, Волгоград, Севастополь, Ростов-на-Дону, Элиста, Мыекъуапэ къанэсыщт.
Астрахань къэсыгъэ марафоным Урысыем и Къыблэ федеральнэ шъолъыр исубъектхэм къарыкIыгъэ купхэр хэлэжьагъэх. Ахэм Адыгеим икIыгъэ творческэ купри ахэтыгъ. Субъект зэфэшъхьафхэм къагъэхьазырыгъэ къэгъэлъэгъонхэм зы сценэ ин дахэ угу къагъэкIыщтыгъ. МэфэкIым къыращэлIэгъэ пстэумэ хьакIэхэр, къэлэдэсхэр яплъыгъэх. Лъэпкъ пэпчъ, театрэ пэпчъ къэгъэлъэгъонэу къагъэхьазырыгъэхэр ашIогъэшIэгъоныгъэх. Москва къикIыгъагъ Урысыем культурэмкIэ иминистрэу Владимир Мединскэр зипэщэ купыр. КъэгущыIагъэхэм Къыблэ шъолъырым щыпсэухэрэм якультурэ ибаиныгъэ къагъэхьазырыгъэ пстэум къызэрахэщырэр къаIуагъ.
Адыгеим икIыгъэхэм лъэпкъ къашъохэр къашIыгъэх, музейхэм яэкспонат гъэшIэгъонхэр, дышъэидэм игухьарэхэм ядэхагъэ къагъэлъэгъуагъ. Урысыем щызэхащэгъэ театральнэ марафоныр шIэхэу Краснодар къынэсыщт.