«Русская удалым» регъажьэ
Адыгэ Республикэм и Къэралыгъо филармоние и Къэралыгъо оркестрэу «Русская удалым» илъэсыкIэ IофшIэгъур Iоныгъом и 14-м ыублэщт.
ЗыкIыныгъэмрэ Зэзэгъыныгъэмрэ ясаугъэтэу Мыекъуапэ дэтым ыпашъхьэ пчыхьэм сыхьатыр 5-м зэхахьэр къыщызэIуахыщт. «Русская удалым» ихудожественнэ пащэу, Адыгэ Республикэм инароднэ артистэу Андрей Ефименкэм тызэрэщигъэгъозагъэу, концертым зэлъашIэрэ орэдхэр щагъэжъынчыщтых. «Мазэр къепсы», «Валенкэхэр», щыIэныгъэм фэгъэхьыгъэхэр, фэшъхьафхэри искусствэр зышIогъэшIэгъонхэм зэхахыщтых.
А. Егоровым, Л. Цэим домрэмкIэ лъэпкъ орэдышъохэр къырагъэIощтых. О. Штондэ шэнышIу фэхъугъ балалайкэр искусствэм ыбзэкIэ «къыгъэгущыIэ» зыхъукIэ, музыкэу ыгъэжъынчырэм гукIэ зыхищэныр.
Адыгэ лъэпкъ орэдышъохэр Л. Цэим домрэмкIэ къыхидзэщтых, оркестрэр ащ дежъыущт.
Филармонием Iофтхьабзэхэр зэхищэхэзэ шIыкIэшIухэм алъэхъу. Филармонием ипащэу Къулэ Мыхьамэт зэрилъытэрэмкIэ, цIыфхэм искусствэр нахь дэгъоу алъагъэIэсыным фэшI пчэгум концертхэр, нэмыкIхэр зэрэщызэхащэхэрэм зыкъигъэшъыпкъэжьыщт.
Сахьидэкъо Нурбый.
Сурэтым итыр: «Русская удалым» иконцерт макIо. Анастасия Истамуловам орэд къеIо, дирижерыр Блэгъожъ Юныс.